Zaburi 105 - BIBLIA Maandiko Matakatifu Kwa Watu Wote 2002

Mungu na watu wake

¹ Mumushukuru Yawe, mutangaze ukubwa wake, mujulishe mataifa mambo aliyotenda!

² Mushangilie, mumwimbie Mungu sifa, mueleze matendo yake ya ajabu!

³ Mujisifu kwa ajili ya jina lake takatifu; wanaomutafuta Yawe wafurahi.

⁴ Mumutafute Yawe mwenye nguvu; mumutafute Yawe siku zote.

⁵ Mukumbuke matendo ya ajabu aliyotenda, miujiza yake na hukumu alizotoa,

⁶ enyi wazao wa Abrahamu mutumishi wake, enyi wazao wa Yakobo muchaguliwa wake.

⁷ Yeye ndiye Yawe, Mungu wetu; hukumu zake zina nguvu katika dunia yote.

⁸ Yeye anashika agano lake milele, anatimiza ahadi zake kwa vizazi elfu.

⁹ Anashika agano alilofanya na Abrahamu, na ahadi aliyomwapia Isaka.

¹⁰ Alimusimamishia Yakobo ahadi yake, akamuhakikishia agano hilo la milele.

¹¹ Alisema: “Nitawapa inchi ya Kanana, nayo itakuwa mali yenu wenyewe.”

¹² Watu wa Mungu walikuwa wachache tu, tena walikuwa wageni katika inchi ya Kanana.

¹³ Walitangatanga kutoka taifa mpaka taifa, kutoka inchi moja mpaka inchi ingine.

¹⁴ Lakini Mungu hakuruhusu wateswe; kwa ajili yao aliwaonya wafalme, akisema:

¹⁵ “Musiwaguse wachaguliwa wangu; musiwazuru manabii wangu!”

¹⁶ Mungu alileta njaa katika inchi yao, akafunga njia zao zote za kupata chakula.

¹⁷ Lakini aliwatangulizia mutu mumoja, Yosefu aliyekuwa ameuzishwa kuwa mutumwa.

¹⁸ Walimufunga miguu kwa minyororo, na kikomo cha chuma kwenye shingo,

¹⁹ mpaka kile alichotabiri kilipotimia. Neno la Yawe likahakikisha kwamba alikuwa na haki.

²⁰ Mufalme wa Misri akaamuru afunguliwe; mutawala wa mataifa akamwachilia huru.

²¹ Alimuweka kuwa musimamizi wa serikali yake, na mukubwa wa mali yake yote,

²² awaongoze wakubwa wa serikali yake sawa anavyopenda, na kuwafundisha wazee wake hekima.

²³ Halafu Israeli akaingia katika inchi ya Misri; Yakobo akakuwa mugeni katika inchi ya Hamu.

²⁴ Yawe akawafanya watu wake wazae sana; akawajalia nguvu kuliko waadui zao.

²⁵ Aliwafanya Wamisri wawachukie watu wake, wakawatendea watumishi wake vibaya.

²⁶ Kisha akamutuma Musa mutumishi wake, akamutuma pamoja na Haruni muchaguliwa wake.

²⁷ Wakafanya maajabu ya Mungu kati ya Wamisri, na miujiza katika inchi hiyo ya Hamu.

²⁸ Mungu akaleta giza juu ya inchi; lakini Wamisri wakakataa kutii amri zake.

²⁹ Akageuza mito yao kuwa damu, akaua samaki wao wote.

³⁰ Vyura wakajaa juu ya inchi yao, hata katika nyumba ya mufalme.

³¹ Mungu akaamuru, kukatokea makundi ya mainzi, na imbu katika inchi yote.

³² Kwa pahali pa mvua akawatumia mvua ya mawe, na radi iliyounguza inchi yao yote;

³³ akaharibu mizabibu na miti yao ya tini; akavunja miti ya inchi yao.

³⁴ Mungu akaamuru, kukatokea nzige, na mapanzi maelfu yasiyohesabiwa;

³⁵ wakatafuna mimea yote katika inchi, wakakula mazao yao yote.

³⁶ Aliua wazaliwa wa kwanza katika inchi yao, ndilo chipukizi la kwanza la jamaa za Wamisri.

³⁷ Kisha akawaondoa watu wa Israeli katika inchi, wakikuwa na feza na zahabu; wala hakuna hata mumoja wao aliyejikwaa.

³⁸ Wamisri walifurahia kuondoka kwao, maana hofu iliwashika kwa sababu yao.

³⁹ Mungu alitandaza wingu juu ya watu wake, na moto kusudi uwaangazie usiku.

⁴⁰ Waliomba, naye akawaletea kwale, akawapa mukate kutoka mbinguni kwa wingi.

⁴¹ Alipasua jiwe maji yakabubujika; yakatiririka katika jangwa kama muto.

⁴² Alikumbuka ahadi yake takatifu aliyomupa Abrahamu mutumishi wake.

⁴³ Basi akawaondoa watu wake katika inchi, wachaguliwa wake wakaimba na kushangilia.

⁴⁴ Aliwapa inchi za mataifa na kuwatolea mashamba ya wenyeji,

⁴⁵ kusudi watu wake watii masharti yake, na kufuata sheria zake. Haleluia!