Zaburi 104 - BIBLIA Maandiko Matakatifu Kwa Watu Wote 2002

Kumusifu Muumba

¹ Umusifu Yawe, ee nafsi yangu! Ee Yawe, Mungu wangu, wewe ni mukubwa kabisa! Umevaa utukufu na mamlaka.

² Umejifunika mwangaza kama kanzu, umekunjua mbingu kama hema;

³ umejenga makao yako katika mbingu juu ya maji. Umeyafanya mawingu kuwa gari lako nawe unatembea katika anga.

⁴ Unaufanya upepo kuwa mujumbe wako, moto na ndimi zake kuwa watumishi wako.

⁵ Umeiweka dunia imara juu ya misingi yake, isitikisike hata milele.

⁶ Uliifunika dunia kwa bahari kama nguo, na maji yakaimeza milima mirefu.

⁷ Ulipoyakaripia, yalikimbia; yaliposikia ngurumo yako, yalitelemuka mbio.

⁸ Yaliporomoka toka milima mpaka katika mabonde, mpaka pahali ulipoyatengenezea.

⁹ Uliyawekea hayo maji mipaka yasiyoweza kutambuka, kusudi yasifunike tena dunia.

¹⁰ Umetokeza chemichemi katika mabonde, na vijito vyao vinapita kati ya vilima.

¹¹ Hivyo vinakunywesha wanyama wote wa pori, na humo punda wa pori wanatulizia kiu chao.

¹² Ndege wanajenga chicha zao katika miti ya hapo, wanatua katika matawi yake na kuimba.

¹³ Toka juu angani, unainyeshea milima mvua, nayo dunia unaishibisha kwa baraka yako.

¹⁴ Unaotesha majani kwa ajili ya mifugo, na mimea kwa matumizi ya mwanadamu kusudi naye apate chakula chake toka udongo:

¹⁵ apate divai ya kumuchangamusha, mafuta ya muzeituni ya kumwangarisha, na mukate wa kumupa nguvu.

¹⁶ Miti mikubwa ya Yawe inapata maji ya kutosha; ndiyo mierezi ya Lebanoni aliyoipanda.

¹⁷ Humo, ndege wanajenga chicha zao, korongo wanafanya makao yao katika misunobari.

¹⁸ Milima mirefu ni makao ya mbuzi wa pori; makimbilio ya sungura wa pori ni chini ya mawe.

¹⁹ Umeumba mwezi kwa kutupimia nyakati, nalo jua linalojua wakati wa kutua.

²⁰ Unaleta giza, nao usiku unaingia; nao wanyama wote wa pori wanatoka:

²¹ simba wakali wananguruma wanapokosa mawindo yao, wanakungojea wewe Mungu uwape chakula chao.

²² Jua linapopanda, wanarudi kwao, na kujipumzisha ndani ya mapango yao.

²³ Hapo mwanadamu naye anaenda kwenye kazi zake; naye anatumika mpaka magaribi.

²⁴ Ee Yawe, matendo yako ni mengi sana! Umeyafanya kwa hekima yote! Dunia imejaa viumbe vyako!

²⁵ Mbali kule kuna bahari kubwa na pana, ambamo kumejaa viumbe visivyokuwa na hesabu, viumbe vizima, vikubwa na vidogo.

²⁶ Mashua zinasafiri humo, na yule nyama mukubwa Leviatani uliyemwumba achezee humo.

²⁷ Hao wote wanakungojea wewe, uwapatie chakula chao kwa wakati wake.

²⁸ Wanaokota kitu chochote unachowapa; ukiwafungulia mukono, wanashiba vyakula vizuri.

²⁹ Ukiwageuzia mugongo, wanaogopa; ukiondoa pumzi yao, wanakufa na kurudi ndani ya mavumbi walimotoka.

³⁰ Ukiwapulizia pumzi yako, wanaumbwa; wewe unafanya vitu vipya katika dunia.

³¹ Utukufu wa Yawe unadumu hata milele; Yawe anapendezwa na matendo yake mwenyewe.

³² Anaiangalia dunia, nayo inatetemeka; anagusa milima, nayo inatoa moshi!

³³ Nitamwimbia Yawe maisha yangu yote; nitamusifu Mungu wangu muda wote nitakaoishi.

³⁴ Upendezwe na hayo mashairi yangu, ee Yawe, maana wewe ndiye furaha yangu.

³⁵ Wenye zambi wote waondolewe katika dunia, waovu wote wasikuwe tena! Umusifu Yawe, ee nafsi yangu! Haleluia!