Zaburi 103 - BIBLIA Maandiko Matakatifu Kwa Watu Wote 2002

Maombi makubwa ya shukrani

¹ Zaburi ya Daudi. Ee nafsi yangu, umusifu Yawe; nafsi yangu yote isifu jina lake takatifu!

² Ee nafsi yangu, umusifu Yawe! Usisahau hata kidogo matendo mazuri yake yote.

³ Ananisamehe uovu wangu wote, na kuniponyesha magonjwa yote.

⁴ Ananiokoa kutoka kifo, na kunijalia wema na rehema zake.

⁵ Anajaza maisha yangu na raha, hata ninabaki kijana mwenye nguvu kama tai.

⁶ Yawe anahukumu kwa haki; anawajalia wanaoteswa haki zao.

⁷ Alimujulisha Musa njia zake, aliwaonyesha watu wa Israeli matendo yake makubwa.

⁸ Yawe ni mwenye rehema na huruma; ni muvumilivu na mwingi wa wema.

⁹ Hatukaripii siku zote, wala hasira yake haidumu milele.

¹⁰ Yeye hatuazibu kama tunavyostahili; hatulipizi kadiri ya uovu wetu.

¹¹ Kama vile anga linavyokuwa juu mbali na dunia, ndivyo kipimo cha wema wake kinavyokuwa kwa watu wanaomwabudu.

¹² Kama mashariki inavyokuwa mbali na magaribi, ndivyo anavyotenga zambi zetu mbali nasi.

¹³ Kama vile baba anavyohurumia mwana wake, ndivyo Yawe anavyohurumia wote wanaomwabudu.

¹⁴ Mungu anajua jinsi tulivyoumbwa; anajua kwamba sisi ni mavumbi.

¹⁵ Maisha ya mwanadamu ni kama majani tu, yanachanua kama maua:

¹⁶ upepo unapovuma juu yake yanatoweka, na mahali yalipokuwa hapaonekani tena.

¹⁷ Lakini wema wa Yawe unadumu milele, kwa wale wote wanaomwabudu; na haki yake inadumu vizazi vyote,

¹⁸ kwa wote wanaoshika agano lake, wanaokumbuka kutii amri zake.

¹⁹ Yawe ameweka kiti chake cha kifalme mbinguni; yeye anatawala juu ya vitu vyote.

²⁰ Mumusifu Yawe, enyi wamalaika wakubwa, enyi munaotimiza amri zake na kutimiza neno lake!

²¹ Mumusifu Yawe, enyi kundi lote la mbinguni, enyi watumishi wake munaotimiza mapenzi yake!

²² Mumusifu Yawe, enyi viumbe vyake vyote; mumusifu popote munapokuwa katika utawala wake. Ee nafsi yangu, umusifu Yawe!