Zaburi 102 - BIBLIA Maandiko Matakatifu Kwa Watu Wote 2002

Maombi katika taabu

¹ Maombi ya mutu anayekuwa katika taabu ambaye anamutolea Yawe malalamiko yake.

² Ee Yawe, usikie maombi yangu, na kilio changu kikufikie.

³ Usijifiche mbali nami wakati wa taabu! Unitegee sikio lako, unijibu upesi wakati ninapokuomba!

⁴ Siku zangu zinapita kama moshi; mifupa yangu inaungua kama katika furu.

⁵ Nimepondekana kama majani na kunyauka; sina hata hamu ya chakula.

⁶ Kutokana na kuugua kwangu, nimebaki mifupa na ngozi.

⁷ Nimekuwa kama ndege katika jangwa, kama bundi kwenye matongo.

⁸ Ninalala macho wazi, kama ndege anayekuwa peke yake juu ya paa.

⁹ Muchana kutwa waadui zangu wananisimanga, wanaonichekelea wanatumia jina langu kwa kulaani.

¹⁰ Majivu yamekuwa chakula changu, machozi yanachangana na kinywaji changu,

¹¹ kwa sababu ya kasirani na hasira yako, maana umeniokota na kunitupilia mbali.

¹² Maisha yangu ni kama kivuli cha magaribi; ninanyauka kama majani.

¹³ Lakini wewe, ee Yawe, unatawala milele; jina lako linakumbukwa katika vizazi vyote.

¹⁴ Wewe utasimama na kurehemu Sayuni, maana wakati umefika wa kuuhurumia, wakati wake uliopangwa umefika.

¹⁵ Watumishi wako wanapenda muji ule, ijapokuwa ni mabomoko sasa; wanauonea huruma, ingawa umeharibika kabisa.

¹⁶ Mataifa yataheshimu jina la Yawe; wafalme wote katika dunia wataogopa utukufu wake.

¹⁷ Yawe atajenga upya Sayuni, na kuonyesha utukufu wake.

¹⁸ Atakubali maombi ya mukosefu; wala hatakataa maombi yao.

¹⁹ Andika jambo hili kwa ajili ya vizazi vinavyokuja kusudi watakaozaliwa kisha wamusifu Yawe,

²⁰ kwamba alichungulia chini kutoka katika pahali pake patakatifu. Yawe aliangalia dunia kutoka mbinguni,

²¹ akasikia malalamiko ya wafungwa, akawaachilia huru waliohukumiwa kuuawa.

²² Watu watatangaza jina la Yawe kule Sayuni; sifa zake zitatangazwa kule Yerusalema,

²³ wakati mataifa yatakapokusanyika pamoja na falme zitakapokutana kumwabudu Yawe.

²⁴ Mungu amenipunguzia nguvu ningali kijana; amefupisha maisha yangu.

²⁵ Ee Mungu wangu, usinihamishe sasa wakati ningali bado kijana. Ee Yawe, wewe unadumu milele.

²⁶ Wewe uliumba dunia tokea zamani, mbingu ni kazi ya mikono yako.

²⁷ Vitatoweka na kuchakaa kama nguo, lakini wewe utabaki. Utavibadilisha kama nguo, navyo vitapita.

²⁸ Lakini wewe unabaki sawasawa, na maisha yako hayana mwisho.

²⁹ Watoto wa watumishi wako watakaa salama; wazao wao wataimarishwa mbele yako.