Zaburi 10 - BIBLIA Maandiko Matakatifu Kwa Watu Wote 2002

Maombi juu ya mateso

¹ Ee Yawe, mbona unasimama mbali? Kwa nini unajificha wakati tuko katika taabu?

² Waovu wanatesa wamasikini kwa kiburi. Mitego yao iwanase wao wenyewe!

³ Mwovu anajisifia tamaa zake mbaya, anapata faida kwa njia mbaya, anazarau na kumukataa Yawe.

⁴ Katika majivuno yake anasema: “Mungu hatagundua. Hakuna Mungu.” Hayo ndiyo mawazo yake yote.

⁵ Njia za mwovu zinafanikiwa siku zote; hukumu zako ziko mbali na mawazo yake, na anazarau waadui zake wote.

⁶ Anawaza ndani ya moyo: “Sitakuwa na wasiwasi; sitapatwa na taabu katika maisha.”

⁷ Kinywa chake kimejaa laana, udanganyifu na ukorofi; ni mwepesi kusema maneno ya kuchukiza na maovu.

⁸ Anajificha karibu na vijiji akivizia, amwue kwa siri mutu asiyekuwa na kosa. Yuko macho kumuvizia muzaifu;

⁹ anajificha katika maficho yake kama simba. Anavizia apate kuwakamata wamasikini; anawanasa kwa mutego wake na kuwachukua.

¹⁰ Muzaifu anashambuliwa na kuangushwa chini; anaangushwa kwa ukali wa mutu mwovu.

¹¹ Mwovu anawaza ndani ya moyo wake: “Mungu amesahau; ameficha uso wake, haoni kitu!”

¹² Ee Yawe, simama sasa uwaazibu! Usiwasahau wanaoteswa.

¹³ Ee Mungu, kwa nini mwovu anakuzarau, na kusema kwamba wewe haujali kitu?

¹⁴ Lakini wewe unawaona wenye taabu na shida; nawe uko tayari kuwasaidia siku zote. Muzaifu anakutegemea wewe, ee Mungu, wewe umekuwa siku zote musaada wa yatima.

¹⁵ Uvunje nguvu za mutu mwovu; ukomeshe uovu wake wote, usikuwe tena.

¹⁶ Yawe ni mufalme milele na milele! Mataifa yatatoweka katika inchi yake.

¹⁷ Ee Yawe, unapokea maombi ya muzaifu; unamutia moyo na kumutegea sikio.

¹⁸ Utawatendea haki wayatima na wanaoteswa, mwanadamu anayekuwa mavumbi asiweze tena kuleta hofu.