Yona 2 - BIBLIA Maandiko Matakatifu Kwa Watu Wote 2002

¹ Kisha, Yawe akaamuru samaki mukubwa amumeze Yona, naye akabaki ndani ya tumbo la samaki huyo kwa muda wa siku tatu, usiku na muchana.

Maombi ya Yona

² Basi, Yona akiwa ndani ya tumbo la samaki yule, akamwomba Yawe Mungu wake,

³ akisema: Kwa sababu ya taabu yangu, nilikuomba, ee Yawe, nawe ukanisikiliza; toka chini kuzimu, nilikulilia, nawe ukasikiliza kilio changu.

⁴ Ulinitupa katika kilindi, katikati ya bahari, maji mengi yakanizunguka, mawimbi na maji mengi vikapita juu yangu.

⁵ Nilizani kwamba nimetupwa mbali nawe; nisiweze kuliona tena hekalu lako takatifu.

⁶ Maji yalinizunguka na kunisonga; kilindi kilinifikia kila upande, majani ya bahari yakanifunika kichwa.

⁷ Niliteremuka mpaka kwenye misingi ya milima, katika inchi ambayo milango yake imefungwa milele. Lakini wewe, ee Yawe, Mungu wangu, umenipandisha nikiwa muzima kutoka mule ndani ya shimo.

⁸ Roho yangu ilipoanza kunitoka, nilikukumbuka, ee Yawe, maombi yangu yakakufikia katika hekalu lako takatifu.

⁹ Watu wanaoabudu sanamu za miungu ya bure, wanautupilia mbali uaminifu wao kwako.

¹⁰ Lakini mimi, kwa wimbo wa shukrani, nitakutolea sadaka, na kutimiza viapo vyangu. Yawe, ndiye anayeokoa.

¹¹ Basi, Yawe akamwamuru yule samaki, naye akamutapika Yona kwenye inchi kavu.