Yobu 9 - BIBLIA Maandiko Matakatifu Kwa Watu Wote 2002

¹ Kisha Yobu akajibu:

² Kweli ninajua kama ni hivi. Lakini mutu anaweza namna gani kuwa haki mbele ya Mungu?

³ Kama mutu angesubutu kushindana naye, hataweza kufika mbali, hata kujibu ulizo moja kati ya elfu.

⁴ Yeye ni mwenye hekima sana na nguvu nyingi. Nani aliyepingana naye, akashinda?

⁵ Yeye anahamisha milima bila yenyewe kutambua, anaipindua mbali kwa hasira yake.

⁶ Yeye anaitikisa dunia kutoka pahali pake, na nguzo zake zinatetemeka.

⁷ Anaamuru jua lisipande, anafunika nyota zisiangaze.

⁸ Yeye peke yake alitandaza mbingu, na kuyakanyaga mawimbi ya bahari.

⁹ Yeye aliweka makundi ya nyota katika anga: Dubu, Orioni, Kilimia, na Vyumba vya Kusini.

¹⁰ Ndiye anayetenda mambo makubwa yasiyoeleweka, mambo ya ajabu yasiyokuwa na hesabu.

¹¹ Anapita karibu nami lakini simwoni, kisha anajiendea zake bila mimi kumutambua.

¹² Yeye akitwaa kitu kwa rafla, nani anayeweza kumuzuia? Nani anayeweza kumwuliza: “Unafanya nini?”

¹³ Mungu hatazuia hasira yake; Rahabu na wasaidizi wake wanainama chini mbele yake.

¹⁴ Nitaweza namna gani basi kumujibu Mungu? Nitachagua wapi maneno ya kumwambia?

¹⁵ Ingawa sina kosa, siwezi kumujibu. Ninapaswa kumwomba mwamuzi wangu huruma.

¹⁶ Hata kama ningemwita naye akijibu, nisingeweza kuamini kwamba ananisikiliza.

¹⁷ Yeye ananiponda kwa zoruba, anaongeza vidonda vyangu bila sababu.

¹⁸ Haniachi hata nipumue; maisha yangu anayajaza uchungu.

¹⁹ Kama ni kushindana, yeye ana nguvu sana! Na kama ni kutafuta juu ya haki, nani atakayemuleta mbele ya tribinali?

²⁰ Ingawa sina kosa, maneno yangu yenyewe yangenihukumu. Ingawa mimi ni mukamilifu, yangehakikisha kwamba mimi ni mupotovu.

²¹ Mimi ni mukamilifu. Siangalii nafsi yangu. Ninachukia maisha yangu.

²² Yote ni mamoja, kwa hiyo ninasema: Mungu anawaangamiza wakamilifu na waovu.

²³ Musiba unapoleta kifo cha rafla, anachekelea hasara ya wasiokuwa na kosa.

²⁴ Inchi ikitiwa katika utawala wa mwovu, Mungu anafunga macho ya waamuzi wake! Kama si yeye anayefanya hivyo, ni nani basi?

²⁵ Siku zangu zinaenda mbio kuliko mukimbiaji, zinakimbia bila kuona faida.

²⁶ Zinapita mbio kama mashua ya matete, kama tai anayerukia mawindo yake.

²⁷ Ninasema: “Nitasahau malalamiko yangu, niondoe uso wangu wa huzuni na kuwa na furaha!”

²⁸ Lakini ninaogopa maumivu yangu yote, maana ninajua Mungu hataniona kuwa sina kosa.

²⁹ Ikiwa nitahukumiwa kuwa na kosa, kwa nini basi nijisumbue bure?

³⁰ Hata kama nikinawa na teluji, na kujitakasa mikono kwa sabuni,

³¹ hata hivyo, atanitumbukiza katika shimo kwenye uchafu, na nguo zangu zitanichukia.

³² Mungu si mutu kama mimi nipate kumujibu, hata tuweze kwenda katika tribinali pamoja.

³³ Hakuna mwamuzi kati yetu ambaye angetuamua sisi wawili.

³⁴ Mungu aniondolee hiyo fimbo ya kunipiga, na kitisho chake kisinitie hofu!

³⁵ Halafu ningeweza kusema bila kumwogopa; maana si vile ninavyokuwa ndani yangu.