Yobu 6 - BIBLIA Maandiko Matakatifu Kwa Watu Wote 2002

¹ Yobu akamujibu Elifasi:

² Heri uchungu wangu ungepimwa, nayo mateso yangu yote yangewekwa katika mizani!

³ Yangekuwa mazito kuliko muchanga wa bahari. Ni kwa hiyo maneno yangu hayana maana!

⁴ Mishale ya Mungu Mwenye Uwezo imenichoma; nafsi yangu imekunywa sumu yake. Vitisho vya Mungu vimenipata.

⁵ Punda wa pori analia akiwa na majani, au ngombe akiwa na malisho?

⁶ Kitu kisichokuwa na onjo kinaweza kuliwa bila chumvi? Sehemu nyeupe ya yai ina utamu wowote?

⁷ Sina hamu ya kuvigusa vyakula hivyo, hivyo ni vyakula vinavyonichukiza.

⁸ Heri ningejibiwa kwa ombi langu, Mungu angenipatia kile ninachotamani,

⁹ angependezwa kunipondaponda, angenyoosha mukono wake juu yangu na kuniua!

¹⁰ Hiyo ingekuwa faraja yangu, ningefurahi katika maumivu yasiyokuwa na huruma, kwa sababu sikukataa maagizo ya Mungu Mutakatifu.

¹¹ Sina nguvu ya kuweza kuendelea. Sijui mwisho wangu utakuwa namna gani, nipate kuvumilia.

¹² Nguvu zangu ni kama za mawe? Au mwili wangu kama shaba?

¹³ Kweli kwangu hakuna kitu cha kunisaidia; musaada wowote ni mbali nami.

¹⁴ Anayekataa kutendea mema rafiki yake, anakataa kumwogopa Mungu Mwenye Uwezo.

¹⁵ Warafiki zangu wamenidanganya kama kijito, wamenidanganya kama mifereji isiyokuwa na maji,

¹⁶ ambayo imejaa barafu, na teluji imejificha ndani yake.

¹⁷ Wakati wa kipwa inatoweka, wakati wa jua kali inakauka.

¹⁸ Wasafiri wanapotea njia zao wakitafuta maji, wanapanda katika jangwa na kukufia kule.

¹⁹ Wasafiri toka Tema wanatafutatafuta, wasafiri toka Sheba wanatumainia.

²⁰ Wanachukizwa kwa kutumainia bure, wanafika kwenye vijito hivyo na kuuzika.

²¹ Ninyi mumekuwa kama vijito hivyo, munaona hasara yangu na kuogopa.

²² Nimesema munipe zawadi? Au munitolee sehemu ya mali zenu?

²³ Au muniokoe toka katika mikono ya adui? Au munikomboe toka katika mukono wa watesaji?

²⁴ Munifundishe, nami nitanyamaza. Munieleweshe jinsi nilivyokosa.

²⁵ Maneno ya kweli yana nguvu kubwa! Lakini makaripio yenu yanafaa kwa nini?

²⁶ Munazani kwamba munaweza kuchunguza maneno? Maneno ya mutu aliyekata tamaa ni upepo tu.

²⁷ Ninyi munasubutu hata kuwapigia wayatima kura; munauzisha hata rafiki yenu!

²⁸ Lakini sasa muniangalie tafazali. Mimi sitasema uongo mbele yenu.

²⁹ Tafazali mugeuke, kusikuwe uovu; muache sasa, kwa ajili ya haki yangu.

³⁰ Munazani kwamba nimesema uovu? Munafikiri kwamba mimi siyatambui machungu?