Yobu 41 - BIBLIA Maandiko Matakatifu Kwa Watu Wote 2002

¹ Yeyote anayeona yule nyama mukubwa anakufa moyo na kuzimia.

² Hakuna mutu yeyote mukali anayesubutu kumushitua. Nani, basi anayeweza kusimama mbele yangu?

³ Nani aliyenipa kitu, kusudi nipate kumurudishia? Chochote kinachokuwa chini ya mbingu ni changu.

⁴ Sitaacha kukuelezea juu ya viungo vya yule nyama mukubwa au juu ya nguvu zake na umbo lake zuri.

⁵ Nani anayeweza kuondoa nguo yake ya inje? Nani anayeweza kutoboa nguo ya chuma anayovaa?

⁶ Nani anayeweza kufungua kinywa chake? Meno yake pande zote ni kitisho!

⁷ Mugongo wake umefanywa kwa mistari ya ngao iliyoshikamana pamoja kama kwa muhuri.

⁸ Kila mumoja umeshikamana na mwingine, hata hewa haiwezi kupenya katikati yake.

⁹ Imeunganishwa pamoja, hata haiwezekani kuitenganisha.

¹⁰ Akipiga chafya, mwangaza unatokea, macho yake yanametameta kama jua inapotokea.

¹¹ Katika kinywa chake kunatokea mienge inayowaka, cheche za moto zinaruka inje.

¹² Katika pua yake kunafuka moshi, kama vile chungu kinachochemuka, kama vile nyasi inayowaka.

¹³ Pumzi yake inawakisha makaa; ulimi wa moto unatoka ndani ya kinywa chake.

¹⁴ Shingo yake ina nguvu ajabu, nyama yule anapotokea watu wanapatwa na hofu.

¹⁵ Mishipa yake imeshikamana pamoja, imara kama chuma wala haitikisiki.

¹⁶ Moyo wake ni mugumu kama jiwe, mugumu kama jiwe la kusagia.

¹⁷ Anapoinuka, mashujaa wanashikwa na woga, kwa pigo moja wanazimia.

¹⁸ Hakuna upanga unaoweza kumuumiza, wala mukuki, mushale au nguo ya chuma.

¹⁹ Kwake chuma ni laini kama unyasi, na shaba kama muti uliooza.

²⁰ Mushale hauwezi kumukimbiza; akitupiwa mawe ya mujeledi anayaona kama maganda.

²¹ Kwake, gongo ni kama kipande cha bua; anacheka akitupiwa mikuki kwa wingi.

²² Tumbo lake ni kama limefunikwa na vigae vikali; anakwaruza na kurarua udongo kama chombo cha kulima.

²³ Anatikisatikisa bahari kama maji yanayochemuka, anaifanya itoe pofu kama chupa ya mafuta.

²⁴ Anapopita anaacha nyuma kitambulisho kinachoangaa; pofu nyeupe inaonekana ikielea juu ya bahari.

²⁵ Katika dunia hakuna kinachofanana nayo; hicho ni kiumbe kisichokuwa na hofu.

²⁶ Kinawaona kuwa si kitu wote wenye kiburi; hicho ni mufalme wa nyama wote wakali.