Yobu 4 - BIBLIA Maandiko Matakatifu Kwa Watu Wote 2002

Sehemu ya kwanza ya Mazungumuzo ( 4.1–14.22 ) Masemi ya Elifasi

¹ Kisha Elifasi wa inchi ya Temani akamujibu Yobu:

² Mutu akijaribu kukuambia neno utakasirika? Lakini nani anayeweza kujizuia kusema?

³ Sikiliza! Wewe umewafundisha wengi, na kuiimarisha mikono ya wazaifu.

⁴ Maneno yako yamewainua moyo, umewaimarisha waliokosa nguvu.

⁵ Lakini sasa shida imekupata nawe unaregea. Imekugusa, nawe unafazaika.

⁶ Kumwogopa Mungu si ndilo tegemeo lako? Na ukamilifu wa mwenendo wako si ndilo tumaini lako?

⁷ Fikiri sasa: nani asiyekuwa na kosa ambaye amepata kuangamia? Au, watu wa usawa wamepata kutupiliwa?

⁸ Mimi nimeona kwamba wanaopanda uovu na ubaya wanavuna yaleyale.

⁹ Mungu anawaangamiza kwa pumzi yake; wanateketezwa kwa kuvuma kwa hasira yake.

¹⁰ Waovu wananguruma kama simba mukali, lakini meno yao inavunjwa.

¹¹ Simba mwenye nguvu anakufa kwa kukosa chakula, na watoto wa simba dike wanatawanywa!

¹² Siku moja, niliambiwa neno kwa siri, sikio langu lilisikia manongonezo yake.

¹³ Ilikuwa usiku wakati watu wanapoota ndoto, wakati usingizi muzito unawashika watu.

¹⁴ Nikashikwa na hofu na kutetemeka; mifupa yangu yote ikagonganagongana.

¹⁵ Upepo ukapita mbele ya uso wangu, nywele za mwili wangu zikasimama.

¹⁶ Kitu kimoja kikasimama mbele yangu. Nilipokiangalia sikukitambua kabisa. Kulikuwa umbo moja mbele yangu. Kulikuwa kimya, kisha nikasikia sauti:

¹⁷ “Mwanadamu anaweza kuwa mwenye haki mbele ya Mungu? Mutu anaweza kuwa safi mbele ya Muumba wake?

¹⁸ Mungu hawaaminie hata watumishi wake, na wamalaika wake anawaona wana kosa.

¹⁹ Zaidi sana wanadamu, viumbe vya udongo, watu ambao musingi wao ni mavumbi, ambao wanaweza kupondwapondwa kama chawa!

²⁰ Wanadamu wanaangamia kwa saa chache tu; wanaangamia milele bila kuacha hata alama.

²¹ Kama uzi unaoshikilia uzima wao ukikatwa, wao wanakufa, tena bila kuwa na hekima”.