Yobu 38 - BIBLIA Maandiko Matakatifu Kwa Watu Wote 2002

Mungu anamujibu Yobu

¹ Halafu Yawe akamujibu Yobu kutoka katika zoruba:

² Nani wewe unayevuruga mipango yangu kwa maneno yasiyokuwa na akili?

³ Ujikaze kama mwanaume, nami nitakuuliza nawe utanijibu.

⁴ Ulikuwa wapi nilipoiweka misingi ya dunia? Uniambie, kama una maarifa.

⁵ Ni nani aliyeweka vipimo vyake, unajua bila shaka! Au nani aliyenyoosha kamba juu yake kwa kuipima?

⁶ Nguzo za dunia zimesimikwa juu ya nini, au nani aliyeliweka jiwe lake la musingi,

⁷ nyota za asubui zilipokuwa zikiimba pamoja, na wana wa Mungu wakapiga vigelegele vya shangwe?

⁸ Ni nani aliyefunga mafuriko ya bahari wakati yalipozuka na kuvuma kutoka katika vilindi?

⁹ Ni nani aliyefunika bahari kwa mawingu na kuiviringishia giza kubwa,

¹⁰ aliyeiwekea bahari mipaka na kuizuia kwa vifungio na milango

¹¹ na kuiambia: “Mwisho wako ni hapa, si zaidi! Mawimbi yako ya nguvu yatakomea hapa!”

¹² Yobu, tangu uzaliwe umekwisha kuamuru kupambazuke na kufanya mapambazuko yajue pahali pake,

¹³ kusudi yapate kukamata dunia kwa pembe zake na kuwatikisa watenda mabaya?

¹⁴ Dunia inageuka na kupata rangi kama nguo; kama udongo wa mufinyanzi unavyogeuzwa na muhuri.

¹⁵ Lakini waovu watanyimwa mwangaza wao, mukono wanaonyoosha kwa kupiga watu utavunjwa.

¹⁶ Umepata kufika kwenye chemichemi za bahari au kutembea juu ya sakafu ya kilindi cha bahari?

¹⁷ Umekwisha kuonyeshwa milango ya kifo au kuona milango ya makao ya giza kubwa?

¹⁸ Unajua ukubwa wa dunia? Uniambie kama unajua haya yote.

¹⁹ Makao ya mwangaza yako wapi? Kwenye nyumba ya giza ni wapi,

²⁰ kusudi upate kupeleka kwenye makao yake, na kuifahamu njia ya kwenda kule kwake.

²¹ Wewe unapaswa kujua, wewe ambaye umekwisha ishi miaka mingi!

²² Umekwisha kuingia katika akiba za teluji, au kuona akiba za mvua ya mawe

²³ ambavyo nimeviweka kwa ajili ya wakati wa fujo, kwa ajili ya siku ya mapigano na vita?

²⁴ Unajua mwangaza unagawanywa kwa njia gani, au namna gani upepo wa mashariki unavyosambazwa katika dunia?

²⁵ Nani aliyechora katika anga njia kwa ajili ya mvua? Nani aliyeonyesha radi njia yake katika mawingu,

²⁶ nayo ikasababisha mvua kunyesha katika inchi kusikoishi mutu na katika jangwa ambako hakuna mutu,

²⁷ kusudi ikunyweshe inchi kavu na yenye kukauka na kuifanya ioteshe majani?

²⁸ Mvua ina baba? Au nani amezaa matone ya umande?

²⁹ Barafu ilitoka katika tumbo la nani? Nani aliyezaa teluji?

³⁰ Maji yanageuka kuwa magumu kama jiwe, na uso wa bahari unaganda.

³¹ Angalia makundi ya nyota: Unaweza kuifunga minyororo Kilimia, au kuviregeza vifungo vya Orioni?

³² Unaweza kuongoza nyota kwa wakati wake, au kumwongoza Dubu pamoja na vitoto vyake?

³³ Unayajua maagizo ya mbingu? Unaweza kuzipangia utaratibu wao katika dunia?

³⁴ Unaweza kupiga vigelegele na kuyaamuru mawingu yakufunike kwa mutiririko wa mvua?

³⁵ Wewe ukiamuru umeme uangaze, utakufikia na kusema: “Nipo hapa”?

³⁶ Ni nani aliyemujulisha kwarara kujaa kwa muto Nili au aliyemwambia jogoo kwamba mvua inakuja?

³⁷ Nani mwenye akili ya kuweza kuhesabu mawingu au kuinamisha vibuyu vya maji kule katika mbingu

³⁸ kusudi mavumbi katika dunia yagandamane na udongo ushikamane na kuwa matope?

³⁹ Unaweza kumwindia simba dike au kuishibisha hamu ya simba wakali

⁴⁰ wanapojificha ndani ya matundu yao, au kulala katika maficho wakivizia?

⁴¹ Ni nani anayewapa vibombobombo chakula chao, vitoto vyao vinaponililia mimi Mungu, na kurukaruka huku na kule kwa njaa?