Yobu 36 - BIBLIA Maandiko Matakatifu Kwa Watu Wote 2002

¹ Kisha Elihu akaendelea kusema:

² Univumilie kidogo, nami nitakuonyesha kitu; maana ningali bado na cha kusema kwa ajili ya Mungu.

³ Nitaleta hekima yangu kutoka mbali sana, na kuonyesha kwamba Muumba wangu ni wa haki.

⁴ Kweli maneno yangu si ya uongo; mwenye elimu kamili yuko hapa nawe.

⁵ Sikia! Mungu ni mwenye nguvu wala hamuzarau mutu yeyote; uwezo wa akili yake ni mukubwa sana!

⁶ Hawaachilii waovu waendelee kuishi; lakini anawapatia wanaoteswa haki zao.

⁷ Haachi kuwalinda watu wa haki; nao anawaweka kuwa wafalme watawale na kutukuzwa.

⁸ Lakini kama watu wakifungwa minyororo, wakinaswa katika kamba za mateso,

⁹ Mungu anawaonyesha matendo yao maovu, na kwamba wao ni watu wenye kiburi.

¹⁰ Anafungua masikio wasikie mafundisho, na kuwaamuru warudi na kuacha uovu.

¹¹ Wakimutii Mungu na kumutumikia, wanafanikiwa katika siku zao zote; miaka yao yote inakuwa ya furaha.

¹² Lakini wasipomutii, wanaangamia kwa upanga, na kufa kwa kukosa akili.

¹³ Waovu wanapenda kukasirika; hawamwombi musaada anapowafunga.

¹⁴ Wanakufa wangali bado vijana, maisha yao yanaisha kama ya washerati.

¹⁵ Lakini Mungu anawaokoa wenye kuteswa kwa mateso yao, anatumia shida zao kwa kuwafumbua macho.

¹⁶ Mungu alikutoa katika taabu, akakuweka pahali pakubwa pasipo shida, na juu ya meza yako amekutayarishia vyakula vizuri.

¹⁷ Lakini sasa umehukumiwa kama mwovu, hukumu ya haki imekupata.

¹⁸ Angalia kasirani isikuvute kwa kuzarau, au usiache ukubwa wa mali za kukukomboa ukupotoshe.

¹⁹ Kilio chako kitafaa kukutoa katika taabu, au nguvu zako zote zitakusaidia?

²⁰ Usitamani usiku ukuje, ambapo watu wanapotoweka.

²¹ Angalisho! Usielekee uovu maana umepewa mateso kwa kukuepusha na uovu.

²² Kumbuka ukubwa wa uwezo wa Mungu; nani anayeweza kufundisha kama yeye?

²³ Nani basi aliyeweza kumupangia njia yake, au anayeweza kumwambia: “Umekosa”?

²⁴ Usisahau kusifu matendo yake ambayo watu wameyashangilia.

²⁵ Watu wote wameona mambo Mungu aliyofanya; mwanadamu anayaona kutoka mbali.

²⁶ Mungu ni mukubwa sana hata hatuwezi kumujua; muda wa maisha yake hauchunguziki.

²⁷ Yeye anayavuta kwake maji ya bahari, na kutoka ukungu anafanya matone ya mvua.

²⁸ Anayafanya mawingu yanyeshe mvua, na kuwatiririshia wanadamu kwa wingi.

²⁹ Nani anayejua jinsi mawingu yanavyotanda, au jinsi radi inavyonguruma kwake katika anga?

³⁰ Yeye anatandaza umeme wake kumuzunguka, na kuvifunika vilindi vya bahari.

³¹ Kwa mvua anawakulisha watu na kuwapatia chakula kwa wingi.

³² Anaukamata umeme kwa mikono yake, kisha anapiga nao shabaha.

³³ Radi inatangaza kuja kwa Mungu; hata nyama wanajua kwamba anakuja.