Yobu 34 - BIBLIA Maandiko Matakatifu Kwa Watu Wote 2002

¹ Kisha Elihu akaendelea kusema:

² Musikilize maneno yangu, enyi wenye hekima, munitegee masikio yenu, ninyi wenye ujuzi.

³ Sikio linapima maneno, kama vile ulimi unavyoonja chakula.

⁴ Basi, tuchague sasa yanayokuwa sawa, tuamue kati yetu yanayokuwa mazuri.

⁵ Basi, Yobu amesema: “Mimi Yobu sina kosa, Mungu ameniondolea haki yangu.

⁶ Ingawa sina kosa, ninaonekana kuwa mwongo. Kidonda changu hakiponi ingawa sina kosa.”

⁷ Ni nani anayekuwa kama Yobu ambaye kwake mazarau ni kama kunywa maji?

⁸ Anaandamana na watenda maovu, anatembea na watu waovu.

⁹ Maana amesema: “Mutu hapati faida yoyote na kujisumbua kumupendeza Mungu.”

¹⁰ Kwa hiyo munisikilize, enyi wenye ujuzi. Mungu hawezi kufanya uovu hata kidogo; Mungu Mwenye Uwezo hawezi kufanya kosa.

¹¹ Mungu atamulipa mutu kadiri ya matendo yake, atamulipiza kulingana na mwenendo wake.

¹² Ni ukweli mutupu: Mungu hafanyi jambo ovu. Mungu Mwenye Uwezo hapotoshi haki hata kidogo.

¹³ Kuna yule aliyemupatia mamlaka juu ya dunia? Uwezo wake juu ya ulimwengu ni wake peke yake.

¹⁴ Kama Mungu angejifikiri tu yeye mwenyewe, akiondoa pumzi yake ya uzima katika dunia,

¹⁵ viumbe vyote vingeangamia kabisa, naye mwanadamu angerudi katika mavumbi.

¹⁶ Kama una akili sikiliza; sikiliza ninachokuambia.

¹⁷ Anayetawala ulimwengu kwa sheria zake anachukia haki? Utasubutu kumuhukumu mwenye haki na mwenye nguvu,

¹⁸ anayemwambia mufalme “Wewe ni wa ovyo!” na watu wenye heshima “Ninyi ni waovu!”

¹⁹ Yeye hawapendelei wakubwa, wala kuwajali watajiri kuliko wamasikini, maana wote hao ni kazi ya mikono yake.

²⁰ Kufumba na kufumbua hao wamekufa; wanatikiswa usiku na kuaga dunia; nao wenye nguvu wanaondolewa bila kutumia nguvu za mutu.

²¹ Macho ya Mungu yanachunguza mienendo ya watu; yeye anaziona hatua zao zote.

²² Hakuna weusi wala giza kubwa ambamo watenda maovu wanaweza kujificha.

²³ Mungu hahitaji kumujulisha mutu wakati wa kumuleta mbele ya tribinali yake.

²⁴ Anawaangamiza wenye nguvu bila uchunguzi, na kuwaweka wengine pahali pao.

²⁵ Kwa maana anayajua matendo yao yote, anawapindua usiku waangamie.

²⁶ Anawapiga mbele ya watu kwa ajili ya uovu wao,

²⁷ kwa sababu wameacha kumufuata yeye, wakazarau njia zake zote.

²⁸ Hata wakasababisha kilio cha wamasikini kimufikie Mungu. Mungu akasikiliza kilio cha wale walioteswa.

²⁹ Kama Mungu akinyamaza, nani anayeweza kumuhukumu? Kama akificha uso wake, nani anayeweza kumwona, ikiwa ni taifa au mutu mumoja?

³⁰ Anafanya hivyo, mutu mubaya asitawale, au wale wanaohatarisha maisha ya watu.

³¹ Labda mutu atamwambia Mungu hivi: “Nimekosa, sitatenda zambi tena.

³² Unionyeshe makosa nisiyoweza kuyaona. Kama nimetenda mabaya, sitayarudilia tena.”

³³ Mungu atapaswa kumwazibu kama unavyoona wewe? Wewe ndiwe unayeamua, wala si mimi. Basi, sema unachofikiri wewe.

³⁴ Mutu yeyote mwenye akili, na kila mwenye hekima anayenisikiliza atasema:

³⁵ “Yobu anaongea bila kutumia akili, maneno yake hayana maana.”

³⁶ Heri Yobu angechunguzwa mpaka mwisho, kwa maana anajibu kama watu waovu.

³⁷ Anaongeza uasi juu ya zambi zake; anaeneza mashaka kati yetu, na kuzidisha maneno yake juu ya Mungu.