Yobu 3 - BIBLIA Maandiko Matakatifu Kwa Watu Wote 2002

Yobu anaomboleza

¹ Kisha hayo, Yobu akaamua kusema. Akalaani siku aliyozaliwa.

² Yobu akasema:

³ Iangamie siku ile niliyozaliwa, usiku ule iliposemwa: “Mimba ya mutoto mwanaume imepatikana.”

⁴ Siku ile ikuwe giza! Na kutoka juu Mungu asijishugulishe nayo, wala mwangaza wowote usiiangaze!

⁵ Itawaliwe na giza kubwa sana, mawingu mazito yaifunike. Giza la muchana liitishe!

⁶ Usiku ule giza kubwa liufunike! Usihesabiwe katika siku za mwaka, usitiwe katika hesabu ya siku za mwezi.

⁷ Usiku ule ukuwe tasa, sauti ya furaha isiingie ndani yake.

⁸ Ulaaniwe na wale wanaolaani siku, wale wafundi wanaoamusha Leviatani.

⁹ Nyota zake za mapambazuko zififie, utamani kupata mwangaza, lakini usipate, wala usione mwangaza wa mapambazuko.

¹⁰ Usiku ule ukuwe hivi, kwa sababu haukufunga tumbo la mama, wala kuficha taabu nisizione.

¹¹ Kwa nini sikukufa nilipozaliwa? Kwa nini kutoka tu katika tumbo sikutoweka?

¹² Kwa nini mama yangu alinizaa? Kwa nini nilipata kunyonya?

¹³ Maana ningekuwa nimezikwa, kimya; ningelala na kupumzika

¹⁴ pamoja na wafalme na watawala wa dunia waliojijengea upya miji kutoka mabomoko,

¹⁵ pamoja na wakubwa waliokuwa na zahabu, waliojaza nyumba zao feza tele.

¹⁶ Kwa nini sikukuwa kama mutoto aliyezaliwa mufu ambaye hakuona mwangaza?

¹⁷ Kule kwa wafu waovu hawasumbui mutu, kule wanaochoka wanapumzika.

¹⁸ Kule wafungwa wanastarehe pamoja, hawasikii hata kidogo sauti ya wasimamizi.

¹⁹ Wakubwa na wadogo wako kule, nao watumwa wamepata uhuru mbali na bwana zao.

²⁰ Kwa nini kumujalia mwangaza na uzima yule anayekuwa katika taabu, anayekuwa na huzuni ndani ya moyo,

²¹ anayetamani kifo lakini hakufi, anayetafuta kifo kuliko hazina iliyofichwa.

²² Mutu kama yule atashangilia sana na kufurahi atakapokufa na kuzikwa!

²³ Kwa nini kumujalia uzima mutu ambaye njia zake zimefungwa, mutu ambaye Mungu amemwekea kizuizi?

²⁴ Kuugua ndicho chakula changu. Malalamiko yangu yanatiririka kama maji.

²⁵ Kile ninachoogopa kimenipata; ninachohofu ndicho kilitokea.

²⁶ Sina amani wala utulivu; sipumziki, taabu imenifikia.