Yobu 23 - BIBLIA Maandiko Matakatifu Kwa Watu Wote 2002

¹ Kisha Yobu akajibu:

² Hata leo malalamiko yangu ni ya uchungu. Ninapata maumivu na kuugua.

³ Heri ningejua pahali nitakapomupata Mungu! Ningeweza kwenda hata karibu naye.

⁴ Ningeleta maneno yangu mbele yake, na kumutolea utetezi wangu.

⁵ Ningeweza kujua atakachonijibu, na kuelewa atakachoniambia.

⁶ Angeshindana nami kwa nguvu zake zote? Hapana! Bila shaka angenisikiliza.

⁷ Pale, mutu wa usawa anaweza kujitetea. Mungu, mwamuzi wangu angeamua kuwa sina kosa milele.

⁸ Ninakwenda mbele, lakini simupati; ninarudi nyuma, lakini siwezi kumwona.

⁹ Ninamutafuta upande wa kushoto lakini simwoni; ninageukia upande wa kuume, lakini siwezi kumwona.

¹⁰ Lakini yeye anajua njia ninayofuata; atakapomaliza kunipima nitatoka mule safi kama zahabu.

¹¹ Ninamufuata kabisa; njia yake nimeishikilia wala sikugeuka pembeni.

¹² Sijaacha hata kidogo kushika amri yake; maneno yake nimeyatunza ndani ya moyo wangu.

¹³ Lakini yeye habadiliki, nani anayeweza kumugeuza? Kitu anachotaka, ndicho anachofanya!

¹⁴ Anatimiza yote aliyonipangia; na mengi kama hayo yako katika akili yake.

¹⁵ Kwa hivyo, ninatetemeka kwa hofu mbele yake; hata nikifikiri tu ninapatwa na woga.

¹⁶ Mungu amefanya moyo wangu uregee, Mungu Mwenye Uwezo amenitia hofu.

¹⁷ Maana nimepatwa na giza, na giza kubwa limetanda katika uso wangu.