Yobu 19 - BIBLIA Maandiko Matakatifu Kwa Watu Wote 2002

¹ Kisha Yobu akajibu:

² Mutaendelea kunitesa mpaka wakati gani, na kunivunjavunja kwa maneno?

³ Mara hizi zote kumi mumenitukana. Basi, hamusikii haya kunitendea vibaya?

⁴ Hata kama ingekuwa nimekosa kweli, kosa langu linanielekea mimi mwenyewe.

⁵ Munaishusha hali yangu mupate kujipandisha; munanitusi kwa kunyenyekezwa kwangu.

⁶ Mujue kwamba Mungu amenitendea vibaya na kuninasa katika wavu wake.

⁷ Ninalalamika: “Mateso makali!” lakini sijibiwi. Ninaita kwa sauti kubwa, lakini sipati haki yangu.

⁸ Njia yangu ameiziba kwa ukuta kusudi nisipite, njia zangu amezitia giza.

⁹ Amenivua utukufu wangu; ameiondoa taji yangu juu ya kichwa.

¹⁰ Amenivunja pande zote, nami nimekwisha; tumaini langu ameliongoa kama muti.

¹¹ Ameichochea kasirani yake juu yangu; ameniona kuwa kama adui yake.

¹² Majeshi yake yananifikia kwa pamoja; yametengeneza njia ya kuja kwangu, yamepiga kambi kuizunguka nyumba yangu.

¹³ Mungu amewaweka wandugu zangu mbali nami; warafiki zangu wakubwa wamenitoroka kabisa.

¹⁴ Wandugu zangu na warafiki hawanisaidii tena.

¹⁵ Wageni katika nyumba yangu wamenisahau; wajakazi wangu wananiona kuwa mugeni. Mimi nimekuwa kwao mutu wasiyemujua.

¹⁶ Ninamwita mutumishi wangu lakini haitikii, ninalazimishwa kumusihi sana kwa maneno.

¹⁷ Nimekuwa harufu mbaya kwa muke wangu; chukizo kwa wandugu zangu wa tumbo.

¹⁸ Hata watoto wadogo wananizarau; wakati ninapojitokeza wao wananizomea.

¹⁹ Warafiki zangu wakubwa wanachukizwa nami, wale niliokuwa nikiwapenda wamenigeuka.

²⁰ Mwili wangu umebakia tu mifupa na ngozi, nimeponyoka kisha kupoteza yote.

²¹ Munionee huruma, munionee huruma, enyi warafiki zangu; maana mukono wa Mungu umenigusa.

²² Kwa nini munanifuatilia kama Mungu? Mbona hamutosheki na mwili wangu?

²³ Heri maneno yangu yangeandikwa! Heri yangeandikwa katika kitabu!

²⁴ Heri yangechorwa kwa chuma na risasi juu ya jiwe kusudi yadumu!

²⁵ Ninajua wazi Mukombozi wangu anaishi. Kwa mwisho yeye atasimama hapahapa katika dunia.

²⁶ Na nyuma ngozi yangu kuharibika hivyo, nitamwona Mungu nikiwa na mwili huu.

²⁷ Mimi mwenyewe nitakutana naye. Mimi mwenyewe na si mwingine nitamwona kwa macho. Moyo wangu unachomwa kwa kumungojea.

²⁸ Ninyi munaweza kujisemesha: “Tutamufuatilia namna gani? Namna gani tutapata kwake maneno ya kumushitaki?”

²⁹ Lakini muogope azabu, chuki yenu isiwaletee kifo. Mujue kwamba kutakuwa hukumu!