Yobu 16 - BIBLIA Maandiko Matakatifu Kwa Watu Wote 2002

¹ Halafu Yobu akajibu:

² Mambo kama yale nimeyasikia mengi; ninyi ni wafariji wenye kutaabisha!

³ Mwisho wa maneno haya ya bure ni wakati gani? Au ni kitu gani kinachowasukuma kujibu?

⁴ Kama mungekuwa mimi, na mimi ninyi, ningeweza kusema kama ninyi. Ningeweza kutunga maneno juu yenu, na kutikisa kichwa changu.

⁵ Ningeweza kuwatia moyo kwa maneno yangu, na maneno yangu ya faraja yangewatuliza.

⁶ Lakini nikisema maumivu yangu hayatulii, na nikikaa kimya hayaondoki.

⁷ Kweli Mungu amenichakalisha, ameharibu kila kitu karibu nami.

⁸ Amenifanya ninyauke na huo ni ushuhuda juu yangu. Kukonda kwangu kumenishitaki na kushuhudia juu yangu.

⁹ Amenirarua kwa hasira na kunichukia, amenisagia meno, na adui yangu ananitonolea macho.

¹⁰ Watu wanafungua vinywa vyao na kunichekelea. Makundi kwa makundi wananizunguka na kunipiga makofi kwenye mashavu.

¹¹ Mungu amenitia katika mikono ya wapotovu na kunitupa katika mikono ya waovu.

¹² Nilikuwa nimestarehe, lakini akanivunjavunja. Alinikamatia katika shingo na kunipasua vipandevipande. Akanifanya shabaha ya mishale yake,

¹³ akanipiga mishale kutoka kila upande. Amenipasua figo bila huruma, na nyongo yangu akaimwanga chini.

¹⁴ Ananivunja na kunipiga tena na tena; ananishambulia kama askari.

¹⁵ Nimejishonea nguo za gunia; utukufu wangu nikautupa katika mavumbi.

¹⁶ Macho yangu ni mekundu kwa sababu ya kulia, kope zangu zimekuwa nyeusi sana,

¹⁷ ingawa sijatesa watu kwa mukono wangu, na maombi yangu kwa Mungu ni safi.

¹⁸ Ewe dunia, usifunike damu yangu iliyomwangika; kilio changu kienee kila pahali.

¹⁹ Nina uhakika kwamba nina mushuhuda wangu mbinguni; mwenye kunitetea yuko kule juu.

²⁰ Warafiki zangu wanizarau; ninatoa machozi kumwomba Mungu.

²¹ Heri mutu angenitetea mbele ya Mungu, kama vile inavyofanyika katika dunia kati ya watu wawili.

²² Kweli, miaka yangu ni michache, nami nitakwenda kule ambako sitarudi.