Yobu 15 - BIBLIA Maandiko Matakatifu Kwa Watu Wote 2002

Sehemu ya pili ya Mazungumuzo ( 15.1–21.34 ) Masemi ya pili ya Elifasi

¹ Kisha Elifasi wa inchi ya Temani, akajibu:

² Mwenye hekima anajibu bila kufikiri na kujaa maneno ya burebure?

³ Anajitetea kwa maneno yasiyofaa na yasiyokuwa na maana?

⁴ Lakini wewe, woga wa Mungu si ndani yako; nawe unakataa kufikiri mbele ya Mungu.

⁵ Uovu wako ndio unaongoza kinywa chako, nawe unachagua kusema kama wadanganyifu.

⁶ Maneno yako mwenyewe yanakuhukumu, sio mimi; masemi yako yanashuhudia juu yako.

⁷ Wewe ndiwe mutu wa kwanza kuzaliwa? Wewe ulizaliwa mbele ya kuwa kwa vilima?

⁸ Ulipata kuwa katika shauri la Mungu? Wewe ndiwe peke yako mwenye hekima?

⁹ Unajua kitu gani tusichokijua sisi? Unafahamu kitu gani tusichokifahamu sisi?

¹⁰ Kati yetu kuna wazee wenye hekima, wenye miaka mingi kuliko baba yako.

¹¹ Faraja Mungu anazokupa ni ndogo sana? Au neno lake la upole kwako si kitu?

¹² Mbona moyo unakusukuma kukasirika na kutoa macho makali,

¹³ hata kumwasi Mungu na kusema maneno mabaya kama yale?

¹⁴ Mutu ni nini hata aweze kuwa na moyo safi? Yule aliyezaliwa na mwanamuke atapata kuwa mwenye haki?

¹⁵ Ikiwa Mungu hawaaminii hata wamalaika wake, nazo mbingu si safi mbele yake,

¹⁶ kefu sasa mwanadamu anayekuwa chukizo na mupotovu, mwanadamu anayetenda uovu kama kunywa maji!

¹⁷ Sasa unisikilize, nami nitakuonyesha, nitakuambia yale niliyoona,

¹⁸ mafundisho ya wenye hekima, mambo ambayo wazee wao hawakuficha,

¹⁹ ambao Mungu aliwapa hiyo inchi peke yao, wala hakuna mugeni aliyepita kati yao.

²⁰ Mwovu atateseka kwa maumivu siku zote, miaka yote watesaji waliyopangiwa.

²¹ Sauti za vitisho zitamupigia kelele katika masikio. Anapozani amestawi, mwangamizi atamushambulia.

²² Mwovu hana tumaini la kutoka katika giza; mwisho wake ni kufa kwa upanga.

²³ Anatangatanga kutafuta chakula, akisema: “Kiko wapi?” Anajua kwamba siku ya giza inamukaribia.

²⁴ Taabu na uchungu, vinamutisha; vinamushambulia kama jeshi la mufalme anayekuwa tayari kwa vita

²⁵ kwa sababu amenyoosha mukono wake apigane na Mungu na kujivuna kumupinga yule Mungu Mwenye Uwezo.

²⁶ Anakimbia kwa kiburi kwa kumushambulia, akiwa na ngao yenye mafundo makubwa.

²⁷ Uso wake umenona kwa mafuta, na kiuno chake kimenenepa.

²⁸ Ameishi katika miji iliyoachwa wazi, katika nyumba zisizokaliwa na mutu, nyumba zilizotakiwa zikuwe lundo la uharibifu.

²⁹ Mutu yule hatakuwa tajiri hata kidogo; wala utajiri wake hautadumu katika dunia.

³⁰ Hataponyoka giza la kifo. Ndimi za moto zitakausha vichipukizi vyake, maua yake yatapeperushwa na upepo.

³¹ Aache kutumainia udanganyifu, maana udanganyifu ndio utakaokuwa zawadi yake.

³² Atalipwa kikamilifu mbele ya kufa kwake, na wazao wake hawatadumu.

³³ Atakuwa kama muzabibu unaoangusha zabibu mbichi, kama muzeituni unaopoteza maua yake.

³⁴ Wote wasiomwogopa Mungu hawatapata watoto, moto utateketeza mahema ya wanaokula kituliro.

³⁵ Wanatunga udanganyifu na kuzaa uovu. Mioyo yao inapanga udanganyifu.