Yobu 14 - BIBLIA Maandiko Matakatifu Kwa Watu Wote 2002

¹ Mutu anazaliwa na mwanamuke, ana siku chache, na taabu nyingi.

² Anachanua kama maua, kisha ananyauka. Anakimbia kama kivuli na kutoweka.

³ Ee Mungu, kwa nini unajali hata kumwangalia na kuanza kusamba naye?

⁴ Nani anayeweza kutoa kitu kisafi kutoka kitu kichafu? Hakuna anayeweza.

⁵ Siku za kuishi za mwanadamu zimepimwa. Ee Mungu, umepanga hesabu ya miezi yake; hawezi kupita mupaka uliomwekea.

⁶ Angalia pembeni basi, umwache, kusudi apate kufurahia siku zake kama mutumishi wa mushahara.

⁷ Muti ukikatwa, kuna tumaini la kuota, unaweza kuchipuka tena.

⁸ Japo mizizi yake itazeeka katika udongo, na shina lake kukufia ndani ya udongo,

⁹ lakini kwa harufu tu ya maji utachipuka, utatoa matawi kama chipukizi.

¹⁰ Lakini mutu anakufa na ule ndio mwisho wake. Akisha kutoa roho, anabakiliwa na nini tena?

¹¹ Kama vile maji yanavyokauka katika ziwa, na muto unavyokoma kutiririka,

¹² ndivyo mutu anavyokufa, wala haamuki tena. Hataamuka tena wala kusisimuka, hata pale mbingu zitakapotoweka.

¹³ Heri ungenificha katika kuzimu, ungenificha mpaka kasirani yako itulie, nawe ungenipimia muda kwa kunikumbuka tena.

¹⁴ Mutu akikufa anaweza kuishi tena? Siku zangu zote za kazi ningekungoja mpaka wakati wa kufunguliwa ufike.

¹⁵ Halafu ungeniita, nami ningeitika, wakati ungetaka kuniona mimi kiumbe chako.

¹⁶ Kwa hiyo ungeweza kuhesabu hatua zangu, ungeacha kuchunguza zambi zangu.

¹⁷ Makosa yangu yangefungiwa katika mufuko, nawe ungefunika uovu wangu.

¹⁸ Lakini milima inaanguka nayo mawe yanaongoka pahali pake.

¹⁹ Mitiririko wa maji inakulakula mawe, mvua kubwa inaleta mumomonyoko wa udongo. Ndivyo nawe unavyoharibu tumaini la mwanadamu.

²⁰ Wewe unamwangusha mwanadamu, naye anatoweka milele; unaubadilisha uso wake na kumutupilia mbali.

²¹ Watoto wake wakiheshimika, yeye hana habari. Wakizarauliwa, yeye haoni kabisa.

²² Anasikia tu maumivu ya mwili wake, na kuomboleza tu hali yake mbaya.