Yobu 12 - BIBLIA Maandiko Matakatifu Kwa Watu Wote 2002

¹ Halafu Yobu akajibu:

² Hakika! Ninyi ni watu wa hekima. Hekima itakufa wakati ule mutakapokufa.

³ Mimi nami nina ufahamu kama ninyi. Mimi si mutu wa akili ndogo kuliko ninyi. Yote muliyosema kila mutu anajua.

⁴ Nilikuwa mutu wa kumwomba Mungu na kupata jibu lake. Sasa, watu wananichekelea. Wanachekelea mutu mukamilifu, mwenye haki.

⁵ Mutu mwenye raha anazarau taabu; taabu ni kwa wale wanaoteleza.

⁶ Makao ya wanyanganyi yana amani. Wenye kumuchokoza Mungu wako salama; nguvu yao ni mungu wao.

⁷ Lakini uulize nyama nao watakufundisha; uulize ndege nao watakuambia.

⁸ Au uulize mimea nayo itakufundisha; sema na samaki nao watakuarifu.

⁹ Nani kati ya viumbe hivyo, asiyejua kwamba Yawe ametenda yale?

¹⁰ Uzima wa kila kiumbe, pumzi ya kila mwanadamu, viko katika mikono yake.

¹¹ Sikio halipimi maneno kama vile ulimi unavyoonja chakula?

¹² Hekima iko kwa watu wazee, maarifa kwa walioishi muda murefu.

¹³ Lakini hekima na uwezo ni vya Mungu. Yeye ana maarifa na ujuzi.

¹⁴ Akibomoa, hakuna anayeweza kujenga upya; akifunga mutu, hakuna anayeweza kumufungua.

¹⁵ Akizuia mvua, inchi inakauka; akiifungulia, inchi inaharibika.

¹⁶ Yeye ana nguvu na hekima. Wanaodanganywa na wanaodanganya ni wake.

¹⁷ Anawatembeza washauri miguu wazi, anawafanya waamuzi kuwa wapumbafu.

¹⁸ Anavua wafalme mikaba yao, na kuwafunga kamba za wafungwa katika viuno.

¹⁹ Anaacha makuhani watembee uchi; na kuwaangusha wenye nguvu.

²⁰ Ananyanganya washauri zawadi yao ya kusema, anaondolea wazee ufahamu wao.

²¹ Anamwagia wakubwa mazarau, anawaondolea wenye uwezo nguvu yao.

²² Anafunua vilindi vya giza, na kuleta katika mwangaza mambo yaliyokuwa katika giza.

²³ Anayaongeza mataifa kisha anayaangamiza, anayafanya yapanuke kisha anayatawanya.

²⁴ Anaondolea viongozi wa watu ujuzi wao, anawafanya watangetange katika jangwa kusikokuwa njia,

²⁵ wakipapasapapasa katika giza kusikokuwa mwangaza; na kuwafanya wapepesuke kama walevi.