Yobu 11 - BIBLIA Maandiko Matakatifu Kwa Watu Wote 2002

¹ Kisha Zofari wa inchi ya Namati akamujibu Yobu:

² Wingi huu wa maneno uachwe tu bila kujibiwa? Mutu wa maneno mengi anaonyesha kwamba hana kosa?

³ Kupapayuka kwako kutanyamazisha watu? Kama ukichekelea watu, hakuna atakayekupatisha haya?

⁴ Wewe unasema: “Masemi yangu ni safi, mimi sina kosa mbele ya Mungu.”

⁵ Heri Mungu angefungua kinywa chake na kutoa sauti yake kwa kukujibu!

⁶ Angekuelezea siri za hekima, maana yeye yuko na maarifa mengi. Ujue kwamba Mungu hakuhesabu makosa yako yote.

⁷ Unaweza kuvumbua siri za Mungu na kujua ukomo wa Mungu Mwenye Uwezo?

⁸ Ukubwa wake unapita mbingu; wewe unaweza nini? Kimo chake kinapita kuzimu; wewe unaweza kujua nini?

⁹ Ukubwa ule unapita urefu wa dunia, unapita upana wa bahari.

¹⁰ Kama Mungu akipita, akimufunga mutu na kumuhukumu, nani anayeweza kumuzuia?

¹¹ Mungu anajua watu wasiofaa; anaona uovu vilevile bila magumu.

¹² Mupumbafu hawezi kuwa na maarifa. Punda wa pori ni punda wa pori tu.

¹³ Yobu, ukifanya moyo wako mukamilifu, utainua mikono yako kwa kumwomba Mungu!

¹⁴ Kama uovu uko katika mukono wako, uutupilie mbali. Usikubali ubaya ukuwe katika nyumba yako.

¹⁵ Halafu utainua uso wako bila kosa, utakuwa imara bila kuwa na hofu.

¹⁶ Utazisahau taabu zako zote; utazikumbuka tu kama mafuriko yaliyopita.

¹⁷ Maisha yako yataangaa kuliko jua la muchana kati, giza lake litabadilika kuwa mapambazuko.

¹⁸ Utakuwa na uhakika maana kuna tumaini; utalindwa na kupumzika salama.

¹⁹ Utalala bila kuogopeshwa na mutu; watu wengi watakuomba musaada.

²⁰ Lakini waovu macho yao yatafifia, njia zote za kutorokea zitawapotea; tumaini lao la mwisho ni kukata roho!