Mwanzo 9 - BIBLIA Maandiko Matakatifu Kwa Watu Wote 2002

Mungu anafanya agano na Noa

¹ Mungu akamubariki Noa na wana wake, akiwaambia: “Muzae, muongezeke, mujaze inchi.

² Nyama wote, ndege wote wa anga, viumbe vyote vinavyotambaa juu ya inchi na samaki wote wa bahari watakuwa na hofu na kuwaogopa ninyi. Wote wamewekwa chini ya mamlaka yenu.

³ Nyama wote wenye uzima watakuwa chakula chenu; ninawapa nyama hao kama vile nilivyowapa mimea kuwa chakula chenu.

⁴ Lakini musikule nyama wenye damu, maana uzima uko katika damu.

⁵ Damu ya uzima wenu nitaidai. Nitaidai kutoka kwa kila nyama na mwanadamu. Atakayemwua mwanadamu mwenzake, nitamudai uzima wake.

⁶ Anayemwanga damu ya mwanadamu, damu yake itamwangwa na mwanadamu; maana mwanadamu aliumbwa kwa mufano wa Mungu.

⁷ Nanyi muzae, mwongezeke, muzae kwa wingi, mwongezeke katika inchi.”

Upinde wa mvua

⁸ Kisha Mungu akamwambia Noa na wana wake:

⁹ “Ninasimamisha agano langu nanyi na wazao wenu

¹⁰ na viumbe vyote vyenye uzima, ndege, nyama wa kufugwa na wa pori, wote waliotoka katika chombo pamoja nanyi.

¹¹ Ninasimamisha agano langu nanyi, kwamba hakutatokea tena mafuriko ya maji kwa kuangamiza inchi nzima au viumbe vyote vyenye uzima.”

¹² Tena Mungu akasema: “Hiki ndicho kitambulisho cha agano ninalofanya kati yangu nanyi na kila kiumbe chenye uzima kinachokuwa pamoja nanyi kwa vizazi vyote vinavyokuja:

¹³ ninaweka upinde wangu katika mawingu, nao utakuwa kitambulisho cha agano kati yangu na dunia.

¹⁴ Kila mara nitakapofunika dunia kwa mawingu, na huo upinde wa mvua utakapoonekana katika mawingu,

¹⁵ nitakumbuka agano langu nanyi na viumbe vyote vyenye uzima. Maji hayatageuka hata kidogo kuwa mafuriko ya kuangamiza viumbe vyote vyenye uzima.

¹⁶ Huo upinde utakapotokea katika mawingu, nitauona na kukumbuka agano hilo la milele kati yangu na viumbe vyote vyenye uzima katika dunia.”

¹⁷ Mungu akamwambia Noa: “Hiki ndicho kitambulisho cha agano ambalo nimesimamisha na viumbe vyote vyenye uzima katika dunia.”

Noa na wana wake

¹⁸ Wana wa Noa waliotoka katika chombo walikuwa Semu, Hamu na Yafeti. Hamu alikuwa baba ya Kanana.

¹⁹ Hao ndio wana watatu wa Noa na kutokana nao watu walienea katika dunia yote.

²⁰ Noa alikuwa mulimaji wa kwanza kupanda mizabibu.

²¹ Akakunywa divai, akalewa, kisha akalala uchi ndani ya hema yake.

²² Hamu, baba ya Kanana, akaona uchi wa baba yake, akatoka inje na kuwaambia wandugu zake wawili.

²³ Lakini Semu na Yafeti wakatwaa nguo, wakaiweka juu ya mabega yao, wakakwenda kinyumenyume na kufunika uchi wa baba yao. Waliangalia pembeni, wala hawakuuona uchi wa baba yao.

²⁴ Ulevi wa Noa ulipokwisha naye alipojua alivyotendewa na mwana wake mudogo,

²⁵ akasema: “Kanana alaaniwe! Atakuwa mutumwa wa watumwa kwa wandugu zake.”

²⁶ Tena akasema: “Semu abarikiwe na Yawe, Mungu wangu! Kanana akuwe mutumwa wake.

²⁷ Mungu amuzidishe Yafeti, aishi katika hema za Semu; Kanana akuwe mutumwa wake.”

²⁸ Nyuma ya mafuriko ya maji, Noa aliishi miaka mia tatu na makumi tano,

²⁹ kisha akakufa akiwa na umri wa miaka mia tisa na makumi tano.