Mezali 6 - BIBLIA Maandiko Matakatifu Kwa Watu Wote 2002

Maonyo mane

¹ Mwana wangu, kama umejitolea kubeba deni ya mwenzako, ikiwa umetoa ahadi yako kwa ajili ya mutu yule,

² ikiwa umejifunga kwa maneno yako mwenyewe, utajinasa kwa ahadi uliyofanya;

³ ujue kwamba uko chini ya mamlaka ya mwenzako, lakini mwana wangu, ukitaka kujiokoa, basi fanya hivi: umwendee mutu yule mara moja, umusihi akupe uhuru wako.

⁴ Usiache macho yako yapate usingizi, wala kope za macho yako zisinzie.

⁵ Ujiokoe kwa kujitoa katika mutego ule, ujiponyeshe kama vile paa au ndege anayemutoroka mwindaji.

⁶ Ewe muvivu! Kwenda kuchunguza siafu, fikiri juu ya namna yake ya kuishi upate hekima.

⁷ Siafu hana kiongozi, mukubwa, wala mutawala;

⁸ lakini anajiwekea chakula wakati wa kipwa, anajikusanyia akiba wakati wa mavuno.

⁹ Ewe muvivu, utalala pale mpaka wakati gani? Utaamuka wakati gani katika usingizi wako?

¹⁰ Unasema: “Acha nilale kidogo tu, acha nisinzie kidogo! Uniache nikunje mikono nipumzike kidogo!”

¹¹ Wakati ule umasikini utakushambulia kama munyanganyi, ukosefu utakufuata kama mwizi mwenye silaha.

¹² Mutu mwovu, mutu asiyefaa kitu, anatangatanga akisema maneno mapotovu.

¹³ Anakonyeza jicho kwa kuwakosesha wengine, anaparuza kwa miguu na kufanyia watu kitambulisho kwa vidole.

¹⁴ Akiwa amejaa mabaya ndani ya moyo, anatunga maovu. Anaamusha ugomvi kila pahali.

¹⁵ Kutokana na hayo hasara itamupata kwa rafla; kwa rafla atapondekana vibaya wala hatapata kupona.

¹⁶ Kuna vitu sita Yawe anavyochukia, hata saba ambavyo ni chukizo kwake:

¹⁷ Macho ya kiburi, ulimi mudanganyifu, mikono inayoua wasiokuwa na kosa,

¹⁸ moyo unaopanga mipango miovu, miguu inayokuwa mbio kutenda maovu,

¹⁹ mushuhuda wa uongo anayesema uongo, na mutu anayechochea fitina kati ya wandugu.

Maonyo juu ya uasherati

²⁰ Mwana wangu, shika amri za baba yako, wala usisahau mashauri ya mama yako;

²¹ uyaweke siku zote ndani ya moyo, uyafunge katika shingo lako.

²² Yatakuongoza katika njia yako, yatakulinda wakati unapolala, yatakushauria unapoamuka.

²³ Maana amri hizi ni taa, na shauri hilo ni mwangaza. Maonyo hayo ya mafundisho ni njia ya uzima.

²⁴ Yatakulinda mbali na mwanamuke mubaya, yatakuepusha na maneno matamu ya mwanamuke mugeni.

²⁵ Usimutamani mwanamuke yule kwa uzuri wake, wala usikubali kunaswa kwa kope za macho yake.

²⁶ Mutu anapoteza kipande cha mukate kwa kahaba, lakini mwanamuke muzinzi atapoteza uzima wako wote.

²⁷ Mutu anaweza kuweka moto kwenye kifua chake na nguo zake zikose kuungua?

²⁸ Mutu anaweza kukanyaga makaa ya moto na miguu yake ikose kuungua?

²⁹ Ndivyo mwanaume anayelala na muke wa mwenzake anavyokuwa; yeyote anayemugusa mwanamuke yule hataacha kuazibiwa.

³⁰ Watu hawamuzarau sana mutu akiiba kwa sababu ya njaa,

³¹ lakini akipatikana anapaswa kulipa mara saba, tena atatoa mali yote anayokuwa nayo.

³² Anayezini hana akili kabisa; anajiangamiza yeye mwenyewe.

³³ Atapata vidonda na mazarau; haya atakayopata haitatoka juu yake.

³⁴ Maana wivu wa mume unamufanya kuwa mukali kabisa; wakati atakapolipiza kisasi hana kitu cha kuhurumia.

³⁵ Hatakubali malipo yoyote; wala kutulizwa na zawadi zako nyingi.