Mezali 4 - BIBLIA Maandiko Matakatifu Kwa Watu Wote 2002

Mafaa ya hekima

¹ Wana wangu, musikilize maadibisho ya baba yenu, mutege sikio mupate kuwa na akili.

² Maana ninawapa kanuni zuri, musikatae mafundisho yangu.

³ Mimi vilevile nilikuwa mutoto kwa baba yangu, nilikuwa mupole, kipenzi cha mama yangu.

⁴ Baba yangu alinifundisha hiki: “Shika kwa moyo maneno yangu, shika amri zangu nawe utaishi.

⁵ Ujipatie hekima, ujipatie ufahamu; usisahau wala kuzarau maneno yangu.

⁶ Usimwache hekima, nayo itakutunza; umupende, nayo itakulinda.

⁷ Jambo la musingi ni kujipatia hekima; toa vyote unavyokuwa navyo ujipatie akili.

⁸ Shikamana sana na hekima, nayo itakutukuza; ukiishikilia itakupa heshima.

⁹ Itavalisha kilemba cha neema kwenye kichwa chako, atakupa taji lenye utukufu.”

¹⁰ Mwana wangu, sikia na kupokea maneno yangu, kusudi upate kuwa na miaka mingi ya kuishi.

¹¹ Nimekufundisha njia ya hekima, nimekuongoza katika njia ya usawa.

¹² Ukitembea hatua zako hazitazuizwa, wala ukikimbia hautajikwaa.

¹³ Shika mafundisho ya hekima na usimwache iponyoke, uishike kwa uangalifu maana ni uzima wako.

¹⁴ Usijiingize katika njia ya waovu, wala usifuate mwenendo wa watu wabaya.

¹⁵ Epuka njia hiyo wala usiikaribie; ujiepushe nayo, uende zako.

¹⁶ Waovu hawalali hata kidogo wasipotenda uovu; hawapati usingizi wasipomukwaza mutu.

¹⁷ Maana uovu ndicho chakula chao, mateso makali ndiyo divai yao.

¹⁸ Njia ya wenye haki ni kama mwangaza wa asubui mapema, ambao unaangaza zaidi na zaidi hata muchana kamili.

¹⁹ Lakini njia ya waovu ni kama giza nene, hawajui kinachowafanya wajikwae.

²⁰ Mwana wangu, sikia kwa uangalifu maneno yangu, utegee sikio masemi yangu.

²¹ Usiyaache yatoweke mbele ya macho, uyafunge ndani ya moyo wako.

²² Maana hayo ni uzima kwa mutu anayeyapata, ni dawa kwa mwili wake wote.

²³ Linda moyo wako kwa uangalifu wote, maana mule munatokea chemichemi za uzima.

²⁴ Tenga mbali nawe luga potovu; wala midomo yako isiseme maneno madanganyifu.

²⁵ Uyaelekeze macho yako mbele sawasawa, kope zako zipige sawasawa.

²⁶ Chunguza sana njia utakayopitia, na hatua zako zote zitakuwa kamili.

²⁷ Usigeukie kuume wala kushoto; epusha muguu wako mbali na uovu.