Mezali 31 - BIBLIA Maandiko Matakatifu Kwa Watu Wote 2002

Mashauri ya mufalme

¹ Maneno ya mufalme Lemueli. Mashauri aliyopewa na mama yake:

² Nikuambie nini mwana wangu? Nikuambie nini mwana wangu niliyezaa? Nikuambie nini wewe niliyeomba kwa Mungu?

³ Usimalize nguvu zako kwa wanawake, usiwape mali yako wale wanaoangamiza wafalme.

⁴ Haifai, ee Lemueli, haifai wafalme kunywa divai, wala wakubwa kutamani vileo.

⁵ Wakikunywa watasahau maagizo ya sheria, na kuwanyima haki wenye taabu.

⁶ Umupe mutu anayekaribia kufa kinywaji kikali, uwape divai wale wenye huzuni tele;

⁷ wakunywe na kusahau umasikini wao, wasikumbuke tena taabu yao.

⁸ Lakini wewe, useme kwa ajili ya wote wanaokuwa bubu; na kutetea haki za wote wasiojiweza.

⁹ Sema kwa ajili yao na kuamua kwa haki, linda haki za wamasikini na wakosefu.

Muke mwema

¹⁰ Muke mwema atapatikana wapi? Bei yake ni kali kuliko ushanga!

¹¹ Mume wake anamwamini kwa moyo na hatakosa faida.

¹² Hamutendei mume wake mabaya hata kidogo, lakini anamutendea mazuri maisha yake yote.

¹³ Anatafuta sufu na kitani, na kufanya kazi kwa mikono yake kwa bidii.

¹⁴ Yeye ni kama mashua za biashara: analeta chakula chake kutoka mbali.

¹⁵ Anaamuka mbele ya mapambazuko kwa kutayarishia jamaa yake chakula na kuwagawanyia kazi watumishi wake.

¹⁶ Anafikiri kununua shamba, kisha analinunua, na kulima zabibu kwa faida ya jasho lake.

¹⁷ Yuko tayari kufanya kazi kwa nguvu na kuimarisha mikono yake.

¹⁸ Anatambua kwamba shuguli zake zina faida; anafanya kazi hata usiku kwa mwangaza wa taa yake.

¹⁹ Anasokota nyuzi kwa mikono yake mwenyewe, kwa vidole vyake mwenyewe anasuka nguo zake.

²⁰ Anafungua mukono wake kwa kuwapa wamasikini, ananyoosha mukono kwa kusaidia wakosefu.

²¹ Haogopi juu ya jamaa lake wakati wa baridi kali, maana kila mutu yuko na nguo za kutosha.

²² Anajitengenezea matandiko, nguo zake ni za rangi nyeusi-nyekundu za kitani safi.

²³ Mume wake ni mutu mwenye kuheshimiwa katika baraza, anapoikaa katikati ya wazee wa inchi.

²⁴ Mwanamuke huyu anatengeneza nguo na kuziuzisha, anawauzishia wachuuzi mikaba.

²⁵ Nguvu na heshima ndizo sifa zake. Anacheka anapofikiri juu ya wakati unaokuja.

²⁶ Anafungua kinywa kwa kusema kwa hekima; anawashauri wengine kwa wema.

²⁷ Anachunguza yote yanayofanyika katika nyumba yake; hakai bure hata kidogo.

²⁸ Watoto wake wanaamuka na kumushukuru, mume wake anaimba sifa zake.

²⁹ Anasema: “Wanawake wengi wametenda mambo ya ajabu, lakini wewe umewashinda wote.”

³⁰ Mapendezi ni udanganyifu na uzuri wa uso haukawii, lakini mwanamuke anayemwogopa Yawe atasifiwa.

³¹ Jasho lake linastahili kulipwa. Shuguli zake zinapaswa kuheshimiwa popote.