Mezali 3 - BIBLIA Maandiko Matakatifu Kwa Watu Wote 2002

Maonyo kwa vijana

¹ Mwana wangu, usisahau mafundisho yangu, lakini kwa moyo wako ushike amri zangu.

² Maana vitakupa wingi wa siku, maisha marefu na fanaka kwa wingi.

³ Wema na uaminifu zisitengane nawe. Uvifunge katika shingo lako; uviandike ndani ya moyo wako.

⁴ Hivyo utakubaliwa na kusifiwa, mbele ya Mungu na mbele ya wanadamu.

⁵ Umutumainie Yawe kwa moyo wako wote, wala usitegemee akili zako mwenyewe.

⁶ Umutambue Mungu katika kila kitu unachofanya, naye atasawanisha njia zako.

⁷ Usijione wewe mwenyewe kuwa mwenye hekima; umwogope Yawe na kujiepusha na uovu.

⁸ Hiyo itakuwa dawa kwa mwili wako, na kitu cha kutuliza mifupa yako.

⁹ Umuheshimu Yawe kwa mali yako, na kwa malimbuko ya mazao yako yote.

¹⁰ Kwa hiyo gala zako zitajaa ngano, na mitungi yako itafurika na divai mupya.

¹¹ Mwana wangu, usizarau azabu ya Yawe, wala usiuzike kwa maonyo yake;

¹² maana Yawe anaonya yule anayemupenda, kama vile baba anavyomwonya mwana wake mupenzi.

¹³ Heri mutu anayetambua hekima, mutu yule anayepata ufahamu.

¹⁴ Hekima ni bora kuliko feza, ina faida kuliko zahabu.

¹⁵ Hekima ni ya maana sana kuliko mawe ya bei kali, hakuna kitu unachotamani kinachoweza kulingana nayo.

¹⁶ Itakupa maisha marefu, mali na heshima.

¹⁷ Njia zake ni za kupendeza, zote zinaelekea kwenye amani.

¹⁸ Hekima ni muti wa uzima kwa wote wanaoipata; wana heri wote wanaoshikamana nayo.

¹⁹ Kwa hekima Yawe aliweka misingi ya dunia, kwa akili aliziimarisha mbingu.

²⁰ Kwa maarifa yake vilindi vilipasuka, na mawingu yakadondosha umande.

²¹ Mwana wangu, shika hekima safi na akili; usiviache vitoweke mbele ya macho yako,

²² navyo vitakuwa uzima katika nafsi yako, na pambo zuri katika shingo lako.

²³ Halafu utaweza kwenda zako kwa usalama, wala muguu wako hautajikwaa.

²⁴ Unapolala, hautakuwa na hofu, utapata usingizi muzuri.

²⁵ Usiogope juu ya tisho la rafla, wala shambulio kutoka kwa waovu,

²⁶ maana Yawe ndiye atakayekutegemeza, atakuepusha usipate kunaswa katika mutego.

²⁷ Usimunyime mutu anayehitaji musaada, ikiwa una uwezo wa kufanya hivyo.

²⁸ Usimwambie jirani yako “Kwenda na urudie kesho, halafu nitakupatia” wakati wewe unaweza kumupa anachohitaji leo.

²⁹ Usipange maovu juu ya jirani yako anayeishi karibu nawe bila wasiwasi.

³⁰ Usigombane na mutu bila sababu, ikiwa hajakuzuru kwa lolote.

³¹ Usimwonee wivu mutesaji, wala usiige mwenendo wake.

³² Maana waovu ni chukizo kwa Yawe, yeye anawafanya watu wa usawa kuwa warafiki zake.

³³ Yawe analaani nyumba za waovu, lakini anabariki makao ya wenye haki.

³⁴ Yeye anazarau wenye mazarau, lakini anakubali wanyenyekevu.

³⁵ Wenye hekima watavuna heshima, lakini wapumbafu watapata haya.