Mezali 27 - BIBLIA Maandiko Matakatifu Kwa Watu Wote 2002

¹ Usijisifie kwa ajili ya kesho. Haujui siku ya leo itakuletea nini.

² Acha watu wengine wakusifu, kuliko kujisifu kwa mudomo wako wewe mwenyewe.

³ Jiwe ni zito na muchanga vilevile, lakini uchokozi wa mupumbafu ni muzito zaidi.

⁴ Kasirani ni kali na hasira inaangamiza; lakini ni nani anayeweza kupingana na wivu?

⁵ Afazali mutu anayekuonya waziwazi, kuliko yule anayeficha upendo.

⁶ Makaripio ya rafiki yanaonyesha uaminifu, lakini busu la adui ni udanganyifu.

⁷ Aliyeshiba anakataa hata asali, lakini kwa mwenye njaa kila chakula kichungu ni kitamu.

⁸ Mutu aliyepotea mbali na kwake ni kama ndege aliyepotea mbali na chicha yake.

⁹ Mafuta na marasi vinafurahisha moyo, vilevile utamu wa urafiki kuliko kujitoshelea mwenyewe.

¹⁰ Usisahau warafiki zako wala wa baba yako. Ukipatwa na magumu usikimbilie kwa ndugu yako. Afazali jirani ambaye iko karibu kuliko ndugu anayekuwa mbali.

¹¹ Ukuwe na hekima, mwana wangu, upate kunifurahisha moyo, nami sitakosa neno la kumujibu mutu yeyote anayenizarau.

¹² Mwenye akili anaona hatari na kujificha, lakini wajinga wanajitokeza mbele na kuumia.

¹³ Mutu akiahidi mbele yako kubeba muzigo wa mutu mwingine, unyanganye nguo yake; utwae rehani kwake maana amebeba muzigo wa mutu mwingine.

¹⁴ Anayemusalimia jirani yake kwa kelele asubui mapema, itahesabiwa kwamba amemutakia laana.

¹⁵ Muke mugomvi ni kama matone ya mvua yasiyoisha siku ya mvua.

¹⁶ Kumuzuia ni sawa na kuzuia upepo, au kukamata mafuta kwa mukono.

¹⁷ Chuma kinanoa chuma, vilevile mutu anafundishwa na mwenzake.

¹⁸ Anayetunza muti wa tini atakula matunda yake. Anayetumikia bwana wake ataheshimiwa.

¹⁹ Kama uso unavyojiona wenyewe katika maji, ndivyo mutu anavyojijua mwenyewe ndani ya moyo.

²⁰ Kuzimu na shimo la kuangamia havishibi hata kidogo, vilevile macho ya watu hayashibi.

²¹ Zahabu na feza vinapimwa kwa moto, na mutu anapimwa kutokana na sifa zake.

²² Hata kama ukitwanga mupumbafu katika kinu, sawa na ngano, hautaweza kumutenganisha na upumbafu wake.

²³ Angalia vizuri hali ya makundi yako ya nyama; tunza vizuri nyama wako.

²⁴ Maana utajiri haudumu milele, wala taji haidumu kwa vizazi vyote.

²⁵ Nyuma ya kukata majani, wakati nyasi zinachipuka upya, kusanya majani toka kwenye milima.

²⁶ Kondoo watakupatia sufu kwa ajili ya nguo zako, mbuzi nao utawauzisha na kujinunulia mashamba;

²⁷ watakupa maziwa ya kukutoshelea na jamaa yako, na kwa ajili ya wajakazi wako.