Mezali 20 - BIBLIA Maandiko Matakatifu Kwa Watu Wote 2002

¹ Divai inaleta mazarau na kileo kinaleta ugomvi; yeyote anayevutwa navyo hana hekima.

² Kasirani kali ya mufalme ni kama simba anayenguruma; anayemukasirikisha anahatarisha maisha yake.

³ Ni jambo la heshima kuepuka ugomvi; wapumbafu ndio wanaogombana.

⁴ Muvivu halimi wakati wa kulima; wakati wa mavuno atatafuta lakini hatapata kitu.

⁵ Mafikiri ya mutu ndani ya moyo wake ni kama kilindi cha maji; lakini mutu mwenye akili anajua kuyachota mule.

⁶ Watu wengi wanajivunia kuwa wema, lakini mwaminifu wa kweli anapatikana wapi?

⁷ Heri watoto wa mutu wa haki mwenye mwenendo mukamilifu!

⁸ Mufalme anapoikaa kwa kutoa hukumu, anapepeta uovu wote kwa macho yake.

⁹ Nani anayesubutu kusema: “Nimetakasa moyo wangu; mimi nimetakasika na zambi yangu?”

¹⁰ Mizani danganyifu na vipimo danganyifu, vyote ni chukizo kwa Yawe.

¹¹ Hata mutoto anajulikana kwa matendo yake, kama ni safi na sawa.

¹² Sikio linalosikia na jicho linaloona, vyote viwili vimefanywa na Yawe.

¹³ Usipende usingizi usikuje kuwa masikini; ukuwe macho nawe utakuwa na chakula kingi.

¹⁴ Mununuzi analalamika: “Hakifai, hakifai,” lakini akiondoka anajisifu amepunguziwa bei.

¹⁵ Kuna zahabu na wingi wa mawe ya bei kali; lakini kitu cha bei kali zaidi ni maneno ya maarifa!

¹⁶ Mutu akiahidi kumukopesha mutu asiyejulikana, unyanganye nguo yake kuwa rehani.

¹⁷ Chakula kinachopatikana kwa udanganyifu ni kitamu, lakini nyuma kinakuwa kama muchanga ndani ya kinywa.

¹⁸ Mipango mizuri inafanyika kwa kushauriana; ukitaka kuanza vita inafaa kufikiri kwanza.

¹⁹ Mupiga domo hafichi siri. Kwa hiyo umwepuke mutu wa kusemasema.

²⁰ Anayemulaani baba yake au mama yake, mwangaza wa uzima wake utazimika kama taa katika giza.

²¹ Mali iliyopatikana kwa haraka kwa mwanzo, haitakuwa ya heri kwa mwisho.

²² Usiseme: “Nitalipiza ubaya niliotendewa.” Umutegemee Yawe naye atakusaidia.

²³ Mizani danganyifu ni chukizo kwa Yawe, na vipimo visivyokuwa vya haki ni kitu kibaya.

²⁴ Hatua za mutu zinaongozwa na Yawe; mwanadamu anaweza namna gani kuelewa njia yake?

²⁵ Ni hatari kusema kwa muzaha “Nitamutolea Mungu hiki!” na kuanza kufikiri nyuma ya kufanya naziri ile.

²⁶ Mufalme mwenye hekima anapepeta waovu; anawaazibu bila huruma.

²⁷ Zamiri ya mutu ni taa ya Yawe; inachunguza nafsi ya mutu mpaka ndani kabisa.

²⁸ Wema na uaminifu unamukinga mufalme; utawala wake unaimarishwa kwa haki.

²⁹ Utukufu wa vijana ni nguvu zao. Uzuri wa wazee ni kichwa chenye imvi.

³⁰ Mapigo yanayoumiza ni dawa ya kuondoa uovu; fimbo inasafisha nafsi mpaka ndani kabisa.