Mezali 18 - BIBLIA Maandiko Matakatifu Kwa Watu Wote 2002

¹ Anayejitenga na wenzake anajipendelea mwenyewe; anakasirika akipewa shauri lolote jema.

² Mupumbafu hapendezwi na ufahamu; kitu cha maana kwake ni maoni yake tu.

³ Mwovu anapokuja, mazarau yanakuja vilevile; pamoja na haya, matusi yanakuja.

⁴ Maneno ya kinywa cha mutu ni kilindi cha maji; chemichemi ya hekima ni kijito kinachobubujika.

⁵ Si vizuri kumupendelea mutu mwovu, na kumunyima sheria mutu wa haki.

⁶ Maneno ya mupumbafu yanaleta ugomvi; kila neno analosema linasababisha azabu.

⁷ Kinywa cha mupumbafu kinamwangamiza mwenyewe; mudomo wake ni mutego wa kumunasa yeye mwenyewe.

⁸ Maneno ya muchongeaji ni kama chakula kitamu ambacho kinashuka mpaka ndani kabisa ya tumbo.

⁹ Mutu muvivu katika kazi yake ni ndugu ya muharibifu.

¹⁰ Jina la Yawe ni munara imara; mwenye haki anaukimbilia na kuwa salama.

¹¹ Tajiri anazani kwamba mali ni makimbilio yake; anafikiri hayo ni ukuta murefu unaomulinda.

¹² Majivuno ya ndani ya moyo yanaleta maangamizi, lakini unyenyekevu unaleta heshima.

¹³ Kujibu mbele ya kusikiliza ni upumbafu na jambo la haya.

¹⁴ Roho ya mutu inaweza kuvumilia ugonjwa, lakini ukiwa umevunjika moyo, utavumilia namna gani?

¹⁵ Mutu mwenye akili anajipatia maarifa; sikio la mwenye hekima linatafuta maarifa.

¹⁶ Zawadi inamufungulia mutu milango; inaweza kumufikisha mutu mbele ya mukubwa.

¹⁷ Anayejitetea wa kwanza anaonekana kuwa na haki, mpaka pale mupinzani wake atakapoanza kumupinga.

¹⁸ Kura inakomesha ubishi; inaamua kati ya wakubwa wanaopingana.

¹⁹ Ndugu aliyetendewa kosa ni mugumu kuliko muji wenye ukuta; magomvi yanakaza kama vile vifungio vya mulango wa ukuta.

²⁰ Maneno ya mutu yanaweza kumushibisha; anatosheka kwa matokeo ya maneno yake.

²¹ Ulimi una nguvu ya kuleta uzima na kuua; wanaopenda kuutumia watakula matunda yake.

²² Anayemupata muke amepata kizuri; ni zawadi kutoka kwa Yawe.

²³ Masikini anaomba kwa unyenyekevu, lakini tajiri anajibu kwa ukali.

²⁴ Warafiki wengi wanaweza kumwangusha mutu, lakini kuna rafiki mwaminifu kuliko ndugu.