Mezali 15 - BIBLIA Maandiko Matakatifu Kwa Watu Wote 2002

¹ Kujibu kwa upole kunatuliza hasira, lakini neno kali linachochea hasira.

² Ulimi wa mwenye hekima unaeneza maarifa, lakini watu wapumbafu wanamwanga maneno ya ujinga.

³ Macho ya Yawe yanaona kila kitu, yanachunguza kibaya na kizuri.

⁴ Ulimi mupole ni musingi wa uzima, lakini uovu wake unavunja moyo.

⁵ Mupumbafu anazarau mafundisho ya baba yake, lakini anayekubali maonyo ni mwenye akili.

⁶ Katika nyumba ya mwenye haki kuna wingi wa mali, lakini mapato ya waovu yanaleta hasara.

⁷ Mudomo wa mwenye hekima unaeneza maarifa, lakini sivyo kwa mioyo ya wapumbafu.

⁸ Sadaka ya waovu ni chukizo kwa Yawe, lakini maombi ya watu wa usawa yanamufurahisha Mungu.

⁹ Mwenendo wa waovu ni chukizo kwa Yawe, lakini Mungu anawapenda wale wanaofuata mambo ya haki.

¹⁰ Azabu kali ni kwa wanaoacha mwenendo mwema; yeyote anayechukia kuonywa atakufa.

¹¹ Ikiwa Yawe anajua kuzimu na shimo la kuangamia, mawazo ya mwanadamu yataweza namna gani kujificha mbele yake?

¹² Mwenye mazarau hapendi kuonywa, hatafuti hata kidogo maoni ya wenye hekima.

¹³ Moyo wa furaha unaangarisha uso, lakini uchungu unavunja moyo.

¹⁴ Mwenye akili anatafuta maarifa, lakini wapumbafu wanajikulisha upumbafu.

¹⁵ Kwa mwenye kuteswa, kila siku ni mbaya, lakini kwa mwenye raha ni sikukuu.

¹⁶ Afazali kuwa na kidogo na kumwogopa Yawe, kuliko kuwa na mali nyingi pamoja na taabu.

¹⁷ Afazali kula mboga za majani kwa upendo, kuliko karamu ya nyama nono pamoja na chuki.

¹⁸ Mutu wa hasira mbaya anasababisha ugomvi, lakini asiyekuwa mwepesi wa hasira anautuliza.

¹⁹ Njia ya muvivu inajaa miiba, lakini njia ya mutu wa usawa ni wazi kama barabara kubwa.

²⁰ Mutoto mwenye hekima anamufurahisha baba yake, lakini mupumbafu anamuzarau mama yake.

²¹ Upumbafu ni furaha kwa mutu asiyekuwa na akili, lakini mwenye akili anachagua njia inayokuwa sawa.

²² Mipango inaharibika kwa kukosa shauri, lakini kwa washauri wengi, inasimama.

²³ Kutoa jibu zuri kunafurahisha; neno linalofaa kwa wakati wake ni jema sana!

²⁴ Njia ya mwenye hekima inaelekea juu kwenye uzima, kusudi aepuke kuingia chini katika kuzimu.

²⁵ Yawe anabomoa makao ya wenye kiburi, lakini analinda mipaka ya makao ya mujane.

²⁶ Mawazo ya mwovu ni chukizo kwa Yawe, lakini maneno mema yanamufurahisha.

²⁷ Anayetamani faida ya unyanganyi anataabisha jamaa yake, lakini anayechukia kituliro ataishi.

²⁸ Moyo wa mwenye haki unafikiri mbele ya kujibu, lakini kinywa cha mwovu kinatapika uovu.

²⁹ Yawe anajiweka mbali na watu waovu, lakini yuko karibu na wenye haki kwa kuwasikiliza.

³⁰ Uso wenye kuangaa unafurahisha moyo. Habari njema inarudishia mwili nguvu.

³¹ Mutu ambaye anasikiliza maonyo mema ana nafasi yake kati ya wenye hekima.

³² Anayekataa kufundishwa anajizarau mwenyewe, lakini anayekubali maonyo anapata ufahamu.

³³ Kumwogopa Yawe ni mafundisho ya hekima; mbele ya kuheshimika inafaa kuwa munyenyekevu.