Mezali 12 - BIBLIA Maandiko Matakatifu Kwa Watu Wote 2002

¹ Anayependa mafundisho anapenda maarifa, lakini asiyependa kuonywa ni mujinga.

² Mutu muzuri anapata rehema za Yawe, lakini mwenye nia mbaya analaaniwa na Mungu.

³ Mutu hawezi kudumu katika kutenda maovu, lakini hakuna kitu kinachoweza kumwangusha mutu wa haki.

⁴ Muke mwema ni taji la utukufu kwa mume wake. Anayemupatisha mume wake haya ni kama kidonda ndani ya mifupa yake.

⁵ Mawazo ya mwenye haki ni ya haki; mashauri ya mwovu ni ya udanganyifu.

⁶ Maneno ya waovu shabaha yake ni kuua, lakini kinywa cha mutu wa usawa kinaokoa.

⁷ Waovu wanaangamizwa na kutoweka kabisa, lakini jamaa ya wenye haki itasimama.

⁸ Mutu anasifiwa kadiri ya hekima yake, lakini mwenye moyo wa mafikiri mabaya anazaruliwa.

⁹ Afazali mutu wa chini anayejitegemea kuliko yule anayejitakia makubwa na kukosa chakula.

¹⁰ Mutu mwenye haki anajali nyama wake, lakini huruma za waovu ni kutesa tu.

¹¹ Mulimaji mwenye bidii ana chakula tele, lakini anayefuata mambo yasiyofaa hana akili.

¹² Matumaini ya waovu yanaporomoka na kuharibika, lakini mutu mwenye haki anasimama imara.

¹³ Mutu mwovu ananaswa kwa uongo wake mwenyewe, lakini mwenye haki anatoka katika taabu.

¹⁴ Mutu anafanikiwa kutokana na maneno yake kama vile anavyopata matokeo ya kazi za mikono yake.

¹⁵ Mupumbafu anaona njia yake kuwa sawa, lakini mwenye hekima anasikiliza shauri.

¹⁶ Ujinga wa mupumbafu unajulikana mara moja, lakini mwerevu anazarau matusi.

¹⁷ Musema kweli anatoa ushuhuda wa kweli, lakini mushuhuda wa uongo anasema udanganyifu.

¹⁸ Maneno ya ovyo yanaumiza kama upanga, lakini kusema kwa mwenye hekima kunaponyesha kidonda.

¹⁹ Ukweli unadumu milele, lakini uongo ni wa muda kidogo tu.

²⁰ Wanaopanga maovu wamejaa udanganyifu ndani ya moyo, lakini wanaokusudia mema wana furaha.

²¹ Wenye haki hawapatwi na jambo lolote baya, lakini waovu wanapata hasara nyingi.

²² Kinywa kinachosema uongo ni chukizo kwa Yawe, lakini watu waaminifu ni furaha yake.

²³ Mutu mwerevu anaficha maarifa yake, lakini wapumbafu wanatangaza upumbafu wao.

²⁴ Kuwa na bidii kutamupa mutu cheo, lakini uvivu utamufanya mutumwa.

²⁵ Wasiwasi ndani ya moyo inamukosesha mutu raha, lakini neno zuri linamuchangamusha.

²⁶ Mutu wa haki anaepuka uovu, lakini njia ya waovu inawapotosha wenyewe.

²⁷ Mwindaji muvivu hatapata anachowinda, lakini mwenye bidii atafanikiwa.

²⁸ Haki ni njia ya uzima, lakini uovu unaongoza katika kifo.