Mezali 11 - BIBLIA Maandiko Matakatifu Kwa Watu Wote 2002

¹ Mizani danganyifu ni chukizo kwa Yawe, lakini matumizi ya vipimo vya haki ni furaha kwake.

² Kiburi kinazaa haya, lakini kwa watu wanyenyekevu kuna hekima.

³ Ukamilifu wa watu wa usawa unawaongoza. Upotovu wa wadanganyifu unawaangamiza.

⁴ Utajiri haufai kitu siku ya kasirani, lakini haki inaokoa kutoka kifo.

⁵ Haki ya watu wakamilifu inanyoosha njia yao, lakini waovu wanaanguka kwa uovu wao wenyewe.

⁶ Haki ya watu wa usawa inawaokoa na hatari, lakini wafitini wananaswa kwa tamaa zao wenyewe.

⁷ Mwovu akikufa, tumaini lake nalo linatoweka. Tumaini la asiyemwogopa Mungu ni la bure.

⁸ Mutu wa haki anaokolewa katika shida, na mwovu anaingia mule kwa pahali pake.

⁹ Asiyemwogopa Mungu anaangamiza wengine kwa kinywa chake, lakini mwenye haki anaokolewa kwa maarifa yake.

¹⁰ Watu wa haki wakipata fanaka, muji unashangilia. Waovu wakiangamia, watu wanapiga vigelegele.

¹¹ Muji unafanikishwa kwa baraka za watu wa usawa, lakini unaangamizwa kwa kinywa cha waovu.

¹² Anayemuzarau jirani yake hana akili; mutu mwenye ufahamu anakaa kimya.

¹³ Anayepitapita akichongea anatoa siri, lakini anayeaminiwa anaficha siri.

¹⁴ Pasipo uongozi taifa linaanguka; kwenye kuwa washauri wengi kuna usalama.

¹⁵ Anayejitoa kulipia mugeni deni yake atajuta, lakini anayechukia mapatano yale ana usalama.

¹⁶ Mwanamuke mwema anaheshimiwa; wanaume wenye nguvu wanatajirika.

¹⁷ Mutu mwema anafaidika yeye mwenyewe, lakini mutu mukali anajiumiza mwenyewe.

¹⁸ Faida mwovu anayopata ni ya uongo, lakini anayetenda mema, hakika atapata faida.

¹⁹ Mutu anayekusudia kuwa mwenye haki ataishi, lakini anayechagua kutenda maovu atakufa.

²⁰ Wenye nia mbaya ni chukizo kwa Yawe, lakini wenye mwenendo mukamilifu ni furaha yake.

²¹ Hakika mwovu hataepuka kuazibiwa, lakini wenye haki wataokolewa.

²² Mwanamuke muzuri asiyekuwa na akili ni kama pete ya zahabu kwenye pua la nguruwe.

²³ Matazamio ya wenye haki yana matokeo mazuri; tamaa za waovu zinaleta kasirani.

²⁴ Kuna watu wanaotoa mali yao kwa wingi na kuzidi; lakini wachoyo wanazilinda na kuendelea katika umasikini.

²⁵ Mutu anayetoa kwa moyo safi atafanikishwa. Mutu anayekunywesha mwingine maji, naye atakunyweshwa.

²⁶ Watu wanamulaani mutu anayeficha ngano, lakini wanamutakia baraka mwenye kuiuzisha.

²⁷ Anayetafuta kutenda mazuri anapata upendeleo, lakini anayetafuta kutenda maovu atapatwa na maovu.

²⁸ Anayetegemea mali zake ataanguka, lakini mwenye haki atastawi kama jani bichi.

²⁹ Anayevunja nyumba yake, atavuna upepo. Mupumbafu atakuwa mutumwa wa wenye hekima.

³⁰ Tunda la mwenye haki ni muti wa uzima, na mwenye hekima anavuta watu.

³¹ Ikiwa mwenye haki anapata malipo hapa katika dunia, hakika mwovu na mwenye zambi watalipwa!