Marko 13 - BIBLIA Maandiko Matakatifu Kwa Watu Wote 2002

Yesu anatangaza uharibifu wa hekalu

¹ Yesu alipokuwa akitoka katika hekalu, mumoja kati ya wanafunzi wake akamwambia: “Mwalimu, angalia mawe haya mazuri na majengo haya makubwa!”

² Yesu akamujibu: “Unaona majengo haya makubwa? Hakutabaki hata jiwe moja juu ya lingine; yote yatabomolewa.”

Mateso yatakayokuwa mbele ya kurudi kwa Yesu

³ Yesu alipokuwa akiikaa kwa mulima wa Mizeituni kuelekea upande wa hekalu, Petro, Yakobo, Yoane na Andrea walipokuwa peke yao pamoja naye, wakamwuliza:

⁴ “Utuambie, mambo hayo uliyotoka kusema yatakuwa wakati gani? Na ni kitambulisho gani kitakachoonyesha kwamba mambo hayo yote yanataka kutimia?”

⁵ Basi Yesu akaanza kuwaambia: “Muangalie vizuri mutu asiwadanganye.

⁶ Watu wengi watakuja wakijiita kwa jina langu, wakisema: ‘Mimi ni Kristo!’ Nao watawadanganya wengi.

⁷ Mutakaposikia habari za matokeo au utetezi wa vita musiogope. Sherti mambo hayo yatukie, lakini hayaonyeshi kama mwisho umefika.

⁸ Kwa maana taifa litapigana na taifa, na ufalme utapigana na ufalme. Kutakuwa tetemeko la inchi pahali mbalimbali. Vilevile kutakuwa njaa. Na haya yote ni kama mwanzo wa maumivu ya kuzaa tu.

⁹ “Mujiangalie vizuri ninyi wenyewe, kwa maana watawapeleka mbele ya tribinali kwa kuwahukumu na kuwapiga fimbo katika nyumba za kuabudia. Vilevile mutapelekwa mbele ya wakubwa na wafalme kwa ajili yangu, kusudi mutoe ushuhuda wangu mbele yao.

¹⁰ Ni lazima Habari Njema ihubiriwe kwanza kwa watu wa kila taifa.

¹¹ Na mutakapokamatwa na kupelekwa kwa kuhukumiwa, musijihangaishe mbele ya wakati juu ya maneno mutakayosema, lakini museme maneno mutakayopewa saa ile ile. Kwa sababu hayatatoka kwenu wenyewe, lakini yatatoka kwa Roho Mutakatifu.

¹² Ndugu atamutoa ndugu, kusudi auawe, na baba atatoa mutoto wake, nao watoto watawageukia wazazi wao na kuwaua.

¹³ Na watu wote watawachukia kwa ajili yangu. Lakini atakayevumilia mpaka mwisho, ataokolewa.

Chukizo la uharibifu

¹⁴ “Lakini mutamwona yule anayeitwa ‘Chukizo Linaloleta Uharibifu,’ akisimamishwa pahali asipopaswa kuwa. (Anayesoma maneno haya aelewe maana yake). Basi watakaokuwa Yudea, wakimbilie kwa milima.

¹⁵ Atakayekutiwa juu ya paa la nyumba asishuke na kuingia ndani ya nyumba kutwaa kitu.

¹⁶ Na mutu atakayekutiwa katika shamba, asirudi kwake kwa kutwaa nguo yake.

¹⁷ Wanawake wenye mimba na wenye kunyonyesha watapata hasara katika siku zile.

¹⁸ Mumwombe Mungu kusudi mambo hayo yasitokee katika wakati wa mvua.

¹⁹ Kwa maana katika siku zile kutakuwa mateso makubwa yasiyoonekana hata kidogo tangu siku ile Mungu alipoumba ulimwengu mpaka sasa, wala hakutatokea tena mateso kama yale.

²⁰ Na kama Bwana asingepunguza siku zile za mateso, hakuna hata mutu mumoja ambaye angeponyoka kufa. Lakini kwa ajili ya wachaguliwa aliowachagua amezipunguza.

²¹ “Kwa hiyo mutu akiwaambia: ‘Kristo yuko hapa!’ au ‘Yuko kule!’ musimusadiki.

²² Kwa maana kutatokea watu wanaojiita kwa uongo ‘Kristo’ pamoja na manabii wa uongo, nao watafanya vitambulisho na maajabu, kusudi ikiwezekana wawadanganye wachaguliwa wa Mungu.

²³ Lakini ninyi mujiangalie vizuri, kwa maana nimewaambia hayo yote mbele.

Kurudi kwa Mwana wa Mutu

²⁴ “Lakini katika siku zile kisha mateso yale, jua litatiwa giza, mwezi hautaangaza,

²⁵ nyota zitaanza kuanguka toka mbinguni na vyote vyenye nguvu vinavyokuwa katika mbingu vitatikiswa.

²⁶ Na halafu wakati ule Mwana wa Mutu ataonekana akikuja katikati ya mawingu kwa uwezo mwingi na kwa utukufu.

²⁷ Halafu atawatuma wamalaika wake katika pande ine za dunia, naye atakusanya watu wake aliowachagua kutoka katika dunia nzima.

Mafundisho kutoka muti wa tini

²⁸ “Muangalilie mufano juu ya muti wa tini. Wakati matawi yake yanapochipuka, nayo majani yao yanapochipuka, ninyi munatambua kwamba wakati wa jua kali unakaribia.

²⁹ Vilevile, wakati mutakapoona mambo hayo niliyotoka kutaja yanatokea, mujue kwamba yeye yuko karibu, na amekuwa kwa mulango.

³⁰ Kweli ninawaambia: hiki kizazi chenu hakitapita mbele ya kutimia kwa mambo haya yote.

³¹ Mbingu na dunia vitatoweka, lakini maneno yangu hayatabadilika hata kidogo.

Mungu pekee anajua wakati wa mwisho

³² “Lakini hakuna mutu anayejua siku ile au saa, hata wamalaika wanaokuwa mbinguni, hata Mwana; isipokuwa Baba peke yake tu.

³³ Mujiangalie, mukeshe, kwa maana hamujui saa wakati ule utakapotimia.

³⁴ Itakuwa kama vile mutu anayefunga safari. Alipotoka kwake akawaachia watumishi madaraka yake, akimupa kila mutu kazi yake. Vilevile akamwagiza mulinzi wa mulango akeshe.

³⁵ Basi muangalie sababu hamujui wakati bwana wa nyumba atakaporudi: labda magaribi, au katikati ya usiku, au wakati jogoo anapowika, au asubui.

³⁶ Mujiangalie, asikuje kwa rafla na kuwakuta mumelala usingizi.

³⁷ Mambo ninayowaambia ninyi, ninayasema kwa wote: mukeshe.”