Maombolezo 5 - BIBLIA Maandiko Matakatifu Kwa Watu Wote 2002

Kuomba huruma

¹ Ukumbuke, ee Yawe, mambo yaliyotupata! Utuangalie, uone haya yetu!

² Inchi yetu imepewa kwa wageni, nyumba zetu kwa watu wengine.

³ Tumekuwa wayatima, bila baba, wamama zetu ni kama wajane.

⁴ Maji yetu tunayapata kwa feza, kuni zetu kwa kuzinunua.

⁵ Tunalazimishwa kufanya kazi kama punda, tumechoka, lakini haturuhusiwi kupumzika.

⁶ Tumewanyooshea Wamisri na Waasuria mikono, kusudi tupate chakula cha kutosha.

⁷ Babu zetu walitenda zambi na sasa hawako tena; nasi tunabeba makosa yao.

⁸ Watumwa wanatutawala, wala hakuna wa kutuokoa toka katika mikono yao.

⁹ Chakula chetu tunakipata kwa kuhatarisha maisha yetu, maana wauaji wanazungukazunguka katika jangwa.

¹⁰ Ngozi zetu zinawaka moto kama furu, kwa sababu ya njaa inayotuchoma.

¹¹ Wanawake wetu wanatendewa kwa kinguvu katika Sayuni, na wabinti wetu katika miji ya Yuda.

¹² Wakubwa wetu wametundikwa kwa mikono yao; wazee wetu hawapewi heshima yoyote.

¹³ Vijana wanalazimishwa kusaga ngano kwa mawe, watoto wanayumbayumba kwa mizigo ya kuni.

¹⁴ Wazee wameacha kutoa mashauri yao, vijana wameacha kuimba.

¹⁵ Furaha ya mioyo yetu imetoweka, michezo yetu imegeuzwa kuwa maombolezo.

¹⁶ Taji tuliojivunia imeanguka. Ole kwetu maana tumetenda zambi!

¹⁷ Kwa ajili ya hiyo tumeugua ndani ya moyo, kwa ajili ya hiyo macho yetu yamefifia.

¹⁸ Maana mulima Sayuni umeachwa utupu, mbweha wanazungukazunguka humo.

¹⁹ Lakini wewe Yawe unatawala milele, kiti chako cha kifalme kinadumu kwa vizazi vyote.

²⁰ Sababu gani umetusahau kwa muda murefu hivyo na kutuacha siku nyingi hivyo?

²¹ Utugeuze, ee Yawe, kusudi tukurudilie. Uturudishie hali ya zamani.

²² Au, umetukataa kabisa? Umetukasirikia sana?