Maombolezo 3 - BIBLIA Maandiko Matakatifu Kwa Watu Wote 2002

Azabu, kugeuka na tumaini

¹ Mimi ni mutu niliyepata mateso kwa fimbo ya kasirani ya Mungu.

² Amenikamata na kunitembeza katika giza ambako hakuna mwangaza.

³ Amenyoosha mukono wake juu yangu mimi tu, akiniazibu tena na tena muchana kutwa.

⁴ Amenichakalisha ngozi na nyama, ameivunja mifupa yangu.

⁵ Amenikusanyia na kunizungushia uchungu na mateso.

⁶ Amenikalisha katika giza kama watu waliokufa zamani.

⁷ Amenizungushiia ukuta na siwezi kutoka, amenifunga kwa minyororo mizito.

⁸ Ingawa ninaita na kuomba musaada anazuiza maombi yangu yasimufikie.

⁹ Amezifunga njia zangu kwa mawe makubwa, amepotosha mapito yangu.

¹⁰ Alikuwa kwangu kama dubu anayevizia, kama simba katika maficho.

¹¹ Alinifukuza katika njia yangu, akanirarua na kuniacha ukiwa.

¹² Aliuvuta upinde wake, akanielekezea mushale wake.

¹³ Alinichoma ndani ya moyo kwa mishale, kutoka katika kifuko chake.

¹⁴ Nimekuwa kitu cha kuchekelewa kwa watu wote, muchana kutwa nimekuwa mutu wa kuzomewa.

¹⁵ Amenijaza taabu, akanishibisha uchungu.

¹⁶ Amenisagisha meno katika mawe, akanifanya nigaegae katika majivu.

¹⁷ Moyo wangu haujui tena amani, nimesahau furaha.

¹⁸ Nimewaza: Nimekata tamaa kabisa, tumaini langu kwa Yawe limetoweka.

¹⁹ Kukumbuka taabu na kutangatanga kwangu kunanipa uchungu na sumu.

²⁰ Ninafikiri juu ya hayo siku zote, nayo roho yangu imejaa huzuni.

²¹ Lakini ninakumbuka jambo hili moja, nami ninakuwa na tumaini:

²² Wema wa Yawe haukomi, huruma zake hazina mwisho.

²³ Uaminifu wake ni mukubwa sana, kila mara kunapokucha ni mupya kabisa.

²⁴ Yawe ndiye sehemu yangu, hivyo nitamuwekea tumaini langu.

²⁵ Yawe ni muzuri kwa wanaomutegemea, kwa wote wanaomutafuta.

²⁶ Ni vizuri kwa mutu kungojea kwa utulivu wokovu unaotoka kwa Yawe.

²⁷ Ni vizuri kwa mutu kujifunza uvumilivu tangu wakati wa ujana wake.

²⁸ Heri kwa mutu kukaa peke yake na kimya, mambo mazito yanapomupata kutoka kwa Mungu.

²⁹ Inamupasa kuinama na kujinyenyekeza, labda tumaini litakuwa likingali.

³⁰ Inamupasa kumugeuzia shavu mwenye kumupiga, na kuwa tayari kupokea matusi yake.

³¹ Yawe hatatutupilia milele.

³² Ingawa atatufanya tuhuzunike, atakuwa na huruma tena, kadiri ya wingi wa wema wake.

³³ Yeye hapendelei kuwatesa wala kuwahuzunisha wanadamu.

³⁴ Wafungwa wote katika inchi wanapoteswa na kupondwa,

³⁵ haki za wanadamu zinapopotoshwa mbele ya Mungu Mukubwa,

³⁶ wanapomunyima mutu haki katika tribinali, basi, Yawe haoni hayo?

³⁷ Nani anayeweza kusema kusudi kitu kifanyike ikiwa Yawe asipoamuru ikuwe hivyo?

³⁸ Maovu na mema yanatokea tu kwa amri ya Mungu Mukubwa.

³⁹ Kwa nini mutu anungunike ikiwa ameazibiwa kwa ajili ya zambi zake?

⁴⁰ Tupime na kuchunguza mwenendo wetu tupate kumurudilia Yawe.

⁴¹ Tumufungulie Mungu mioyo yetu na kumwomba kule juu mbinguni:

⁴² Tulikukosea na kukuasi, nawe haujatusamehe bado.

⁴³ Umejifunika hasira yako na kutufuatilia, ukatuua bila huruma.

⁴⁴ Umejifunika wingu kusudi maombi yoyote yasipite.

⁴⁵ Umetufanya kuwa takataka na uchafu kati ya mataifa.

⁴⁶ Waadui zetu wote wanatuzomea.

⁴⁷ Woga na hofu vimetuandama tumepatwa na uharibifu na maangamizi.

⁴⁸ Macho yangu yanabubujika mito ya machozi kwa sababu ya kuangamizwa kwa watu wangu.

⁴⁹ Macho yangu yanatelemusha machozi bila kukoma,

⁵⁰ mpaka Yawe kutoka kule mbinguni aangalie chini na kuona.

⁵¹ Ninahuzini sana kuona yale yaliyowapata wabinti wa muji wangu.

⁵² Nimewindwa kama ndege na hao wanaonichukia bila sababu.

⁵³ Walinitupa ndani ya shimo nikiwa muzima na juu yangu wakalundika mawe.

⁵⁴ Maji yalianza kunifunika kichwa, nami nikafikiri: Huu ni mwisho wangu.

⁵⁵ Kutoka chini ndani ya shimo, nilikulilia ee Yawe.

⁵⁶ Wewe umenisikia nikikulilia: Usiache kusikiliza maombi yangu ya musaada.

⁵⁷ Nilipokuita ulifika karibu nami ukaniambia: Usiogope!

⁵⁸ Ulinitetea katika maneno yangu, ee Yawe, uliyakomboa maisha yangu.

⁵⁹ Uliuona uovu niliotendewa, ee Yawe; uniamulie kwa wema maneno yangu.

⁶⁰ Umeuona uovu wa waadui zangu, na mipango yao yote juu yangu.

⁶¹ Umesikia matukano yao, ee Yawe, na mipango yao yote juu yangu.

⁶² Maneno na mawazo ya waadui zangu siku nzima, ni juu ya kuniangamiza mimi.

⁶³ Wakiikaa au wakienda, ni mimi ndiye wanayemuzomea.

⁶⁴ Uwalipize, ee Yawe, sawasawa na matendo yao, sawasawa na kazi ya mikono yao.

⁶⁵ Uifanye mioyo yao kuwa migumu, na laana yako iwashukie.

⁶⁶ Uwafuatilie kwa hasira na kuwaangamiza toka katika dunia.