Isaya 3 - BIBLIA Maandiko Matakatifu Kwa Watu Wote 2002

Fujo katika Yerusalema

¹ Sasa, Bwana wetu Yawe wa majeshi ataondoa kutoka Yerusalema na inchi ya Yuda kila tegemeo: tegemeo lote la chakula na la kinywaji.

² Ataondoa mashujaa na waaskari, waamuzi na manabii, waaguzi na wazee,

³ majemadari na wakubwa, washauri, wachawi wafundi na waganga wenye maarifa.

⁴ Mungu anasema: Nitaweka watoto kuwa wakubwa wao; watoto wachanga watawatawala.

⁵ Watu watatesana, kila mutu na mwenzake; vijana watawazarau wazee, na watu wa ovyo ovyo watawazarau wenye heshima.

⁶ Wakati huo mutu atamwambia ndugu yake wakiwa bado katika nyumba ya baba yao: Wewe uko na nguo; utakuwa mukubwa wetu. Kamata utawala juu ya mabomoko haya!

⁷ Lakini siku hiyo atasema: Mimi siwezi kuwa muponyaji. Ndani ya nyumba yangu hamuna chakula wala nguo. Musinifanye mimi kuwa mukubwa wenu.

⁸ Watu wa Yerusalema wamejikwaa, watu wa Yuda wameanguka, kwa sababu wanamupinga Yawe kwa maneno na matendo, wakizarau utukufu wake kati yao.

⁹ Ubaguzi wao unashuhudia juu yao; wanatangaza zambi yao kama vile watu wa Sodoma, wala hawaifichi. Ole kwao watu hao, kwa sababu wamejiletea maangamizi wenyewe.

¹⁰ Muwaambie watu wa haki jinsi wanavyokuwa na heri, maana watakula matunda ya matendo yao.

¹¹ Lakini ole kwao watu waovu! Mambo yatawaendekea vibaya, maana yale waliyotenda yatawapata wao wenyewe.

¹² Watu wangu watateswa na watoto; wanawake ndio watakaowatawala. Enyi watu wangu, wakubwa wenu wanawapotosha, wanavuruga njia munayopaswa kufuata.

Yawe anawahukumu watu wake

¹³ Yawe yuko tayari kuanza mashitaki, anasimama kwa kuwahukumu watu wake.

¹⁴ Yawe anawashitaki wazee na wakubwa wa watu wake: Ninyi ndio mulioliharibu shamba la mizabibu; mali wamasikini walizonyanganywa ziko ndani ya nyumba zenu.

¹⁵ Muna haki gani kuwagandamiza watu wangu, na kuwatendea wamasikini vibaya? –Ni ujumbe wa Bwana wetu Yawe wa majeshi.

Maonyo kwa wanawake wa Yerusalema

¹⁶ Yawe anasema: Wanawake wa Sayuni wako na kiburi; wanatembea wakiinua kichwa juu, wakirembua macho yao kwa tamaa. Hatua zao ni za maringo, nao wanalilisha mikufu kwenye miguu yao.

¹⁷ Basi, mimi Yawe nitawaazibu; nitawanyoa nywele hao wanawake wa Sayuni, na kuwavua nguo za kufunika uchi wao.

¹⁸ Siku zinakuja ambapo Yawe atawanyanganya wanawake wa Yerusalema vitu vyote wanavyoringia: pete za miguu, vitana, mibano ya nywele,

¹⁹ pete za masikio, vikomo na vitambaa vya ushungi,

²⁰ vitambaa vya kichwa, mikufu, mikaba iliyosokotwa, hirizi na mikufu ya kuleta bahati,

²¹ pete za vidole na pua,

²² nguo za sikukuu, kanzu, vitambaa vya kichwa na mifuko ya mikono,

²³ nguo nzuri, shemizi nzuri, vioo na vitambaa mbalimbali.

²⁴ Kwa pahali pa harufu ya marasi watatoa uvundo; kwa pahali pa mikaba mizuri watatumia kamba; kwa pahali pa nywele nzuri watakuwa na upaa; kwa pahali pa nguo nzuri watavaa magunia; uzuri wao wote utageuka kuwa haya.

²⁵ Wanaume wenu wataangamia kwa upanga, watu wenu wenye nguvu watakufa katika vita.

²⁶ Halafu watu watalia na kuomboleza kwenye milango ya muji; nao wataikaa ndani ya mavumbi katika ukiwa.