Ezekieli 21 - BIBLIA Maandiko Matakatifu Kwa Watu Wote 2002

Habari mbaya kwa inchi ya Waisraeli

¹ Neno la Yawe lilinifikia kusema hivi:

² Wewe mwanadamu, geukia upande wa kusini, uhubiri juu ya inchi ya kusini, juu ya wakaaji wa pori la Negebu.

³ Uwaambie wasikilize neno la Yawe. Uwaambie kwamba Bwana wao Yawe anasema hivi: Nitawasha moto kwako, nao utateketeza miti yote, mibichi na yenye kukauka; utaenea tangu kusini mpaka kaskazini wala hakuna atakayeweza kuzimisha ndimi zake. Nao utaunguza watu wote.

⁴ Watu wote watajua kwamba ni mimi Yawe niliyeuwasha na hautazimika.

⁵ Kisha nami nikasema: Ee Bwana wetu Yawe! Watu wanalalamika juu yangu na kusema: Huyu akisema, ni mafumbo tu!

Upanga wa Yawe

⁶ Neno la Yawe lilinifikia kusema hivi:

⁷ Wewe mwanadamu, ugeukie upande wa Yerusalema, uhubiri juu ya nafasi zake za kutambikia, na kutoa unabii juu ya inchi ya Waisraeli.

⁸ Uwaambie Waisraeli kwamba: Yawe anasema hivi: Mimi mwenyewe ninakuja kupambana nanyi. Nitauchomoa upanga wangu ndani ya mufuko wake na kuwaua watu wema na wabaya.

⁹ Tangia kaskazini mpaka kusini, nitawaua watu wote, wema na wabaya, kwa upanga wangu.

¹⁰ Watu wote watajua kwamba mimi Yawe ndiye niliyeuchomoa upanga ndani ya mufuko wake na wala hautarudishwa tena ndani.

¹¹ Nawe mwanadamu, ujikunje kama mutu aliyekata tamaa, uomboleze mbele yao.

¹² Wakikuuliza hivi: Kwa nini unaomboleza? Utawaambia: Ninaomboleza kwa sababu ya habari zinazokuja. Kila mutu atavunjika moyo, mikono yao yote itaregea; kila mutu anayeishi atazimia na magoti yao yataregea. Habari hizo zinakuja kweli, nazo zinatimia. –Ni Bwana wetu Yawe anayesema hivyo.

¹³ Neno la Yawe lilinifikia kusema hivi:

¹⁴ Wewe mwanadamu, toa unabii useme: Yawe anasema hivi: Upanga! Kweli, upanga umenolewa, nao umeangarishwa vilevile.

¹⁵ Umenolewa kusudi ufanye mauaji, umeangarishwa umetemete kama umeme!

¹⁶ Umenolewa na kuangarishwa uwekwe katika mukono wa mwuaji.

¹⁷ Wewe mwanadamu, ulie na kuomboleza upanga huo umenyooshwa juu ya watu wangu, juu ya wakubwa wote wa Waisraeli. Wataangamizwa kwa upanga pamoja na watu wangu. Ujipigepige kifua kwa huzuni.

¹⁸ Hilo litakuwa jaribu gumu sana. –Ni ujumbe wa Bwana wetu Yawe.–

¹⁹ Wewe mwanadamu, utabiri! Piga mikono, upanga ufanye kazi yake, mara mbili, mara tatu. Huo ni upanga wa mauaji nao unawazunguka.

²⁰ Kwa hiyo wamevunjika moyo na wengi wanaanguka. Nimeiweka chongo ya upanga katika milango yao yote. Umefanywa uangae kama umeme, umengarishwa kwa ajili ya mauaji.

²¹ Ewe upanga, shambulia upande wa kuume, shambulia upande wa kushoto; elekeza chongo yako pande zote.

²² Nami nitapiga mikono, kasirani yangu itatosheka. Ni mimi Yawe ninayesema hivyo.

Uamuzi wa Yerusalema

²³ Neno la Yawe lilinifikia kusema hivi:

²⁴ Wewe mwanadamu! Chora njia mbili ambapo upanga wa mufalme wa Babeli utapitia. Njia zote mbili zianzie katika inchi moja. Kwa mwanzo wa kila njia utaweka kitambulisho cha kuonyesha upande muji unapokuwa.

²⁵ Utachora njia upanga utakapopitia kwenda kuufikilia muji Raba wa Waamoni, na njia ingine inayoelekea Yerusalema wenye kuzungukwa na kuta katika inchi ya Yuda.

²⁶ Mufalme wa Babeli anasimama kwa mwanzo wa hizo njia mbili, kwenye masanganjia, apate kuaguza. Anatikisa mishale, anauliza shauri la sanamu ya miungu yake na kuchunguza maini ya nyama.

²⁷ Mushale ulioangukia kwa upande wa mukono wake wa kuume, ulionyesha Yerusalema. Pale wataweka vifaa vya vita kwa kuubomoa. Anaamuru mauaji, kelele za vita zipigwe, vifaa vya vita kwa kubomoa milango viwekwe, lundo ya udongo na minara kwa kuushambulia muji viwekwe vilevile.

²⁸ Lakini watu wa Yerusalema watauzania kuwa ni utabiri wa uongo kwa sababu ya mapatano waliyofanya. Hata hivyo unabii huu utawakumbusha uovu wao na kusababisha kukamatwa kwao.

²⁹ Kwa hiyo, Bwana wetu Yawe anasema hivi: Wote wataweza kuziona zambi zenu. Kila mutu atajua jinsi munavyokuwa na makosa. Kila kitendo munachotenda kinaonyesha zambi zenu. Ninyi mutapata azabu nami nitawatia katika mikono ya waadui zenu.

³⁰ Nawe, mufalme wa Waisraeli, wewe ni mupotovu kabisa. Siku yako imefika, siku ya azabu yako ya mwisho.

³¹ Bwana wetu Yawe anasema hivi: tosha kitambulisho chako cha kifalme na taji yako, maana mambo hayatabaki kama yalivyokuwa. Wanaokuwa chini watanyanyuliwa, wanaokuwa juu watashushwa!

³² Uharibifu! Uharibifu! Hakuna chochote katika muji huu nitakachoacha. Lakini mbele ya hayo kutafika kwanza yule ambaye nimemupa mamlaka ya kuuazibu, ambaye mimi nitamupa muji ule.

Azabu ya Waamoni

³³ Ewe mwanadamu, tabiri juu ya Waamoni na maneno yao ya kuwachekelea Waisraeli: Uwaambie kwamba ninasema hivi: Upanga, upanga! Upanga umenyooshwa kwa kuua, umenolewa upate kuangamiza, umengarishwa uangae kama umeme.

³⁴ Wakati ninyi mumetulia katika maono yenu madanganyifu na utabiri wenu wa uongo, upanga utakuwa tayari kukata shingo za waasi na waovu. Siku imetimia ambapo maovu yenu yataazibiwa.

³⁵ Sasa rudisha upanga ndani ya mufuko wake! Nitawahukumu pahali palepale mulipoumbwa, katika inchi mulipozaliwa.

³⁶ Nitawamwangia kasirani yangu. Moto wa kasirani yangu nitaupuliza juu yenu. Nitawatoa katika mikono ya watu waovu, watu hodari wa kuangamiza.

³⁷ Mutakuwa kama kuni ndani ya moto, damu yenu itamwangika katika inchi. Mutu hatawakumbuka tena. Ni mimi Yawe ninayesema hivyo.