2 Samweli 22 - BIBLIA Maandiko Matakatifu Kwa Watu Wote 2002

Wimbo wa ushindi wa Daudi

¹ Daudi alimwimbia Yawe wimbo huu siku ile Yawe alipomukomboa toka katika mikono wa waadui zake, na toka katika mukono wa Saulo.

² Alisema: Yawe ni: kikingio changu, kimbilio langu, mukombozi wangu,

³ Mungu wangu, yule ambaye ninamukimbilia, ngao yangu, nguvu ya wokovu wangu, munara wangu, kimbilio langu. Mwokozi wangu, unaniokoa kutoka watesaji wakali!

⁴ Ninamwita Yawe anayestahili sifa anisaidie, nami ninaokolewa kutoka kwa waadui zangu.

⁵ Mawimbi ya kifo yalinizunguka, mafuriko ya maangamizi yalinishambulia,

⁶ kamba za kuzimu zilinizunguka, mitego ya kifo ilikuwa mbele yangu.

⁷ Katika taabu yangu, nilimwita Yawe; nilimwita Mungu wangu. Toka katika hekalu lake alisikia sauti yangu; kilio changu kilifika katika masikio yake.

⁸ Halafu, dunia ikatetemeka na kutikisika, misingi ya mbinguni ikayumbayumba na kuruka, kwa maana Mungu alikuwa amekasirika.

⁹ Moshi ulifuka kutoka katika pua yake, moto wenye kuteketeza ukatoka katika kinywa chake, makaa ya moto yakatokea.

¹⁰ Aliinamisha anga, akashuka chini, na wingu jeusi lilikuwa chini ya miguu yake.

¹¹ Alipanda juu ya kerubi na kuruka; akaruka juu ya mabawa ya upepo.

¹² Alijifunika giza pande zote; kifuniko chake kilikuwa mawingu mazito ya mvua.

¹³ Umeme ulimetameta mbele yake, makaa ya moto yakawaka.

¹⁴ Yawe alinguruma kutoka mbinguni; Mungu Mukubwa akatoa sauti yake.

¹⁵ Aliwapiga waadui mishale, akawatawanya; alirusha umeme, akawakimbiza.

¹⁶ Yawe alipovikaripia, pumzi ya pua yake ilifunua vilindi vya bahari na misingi ya dunia ikaonekana.

¹⁷ Mungu alinyoosha mukono wake kutoka juu, akanitwaa, alininyanyua kutoka ndani ya maji mengi.

¹⁸ Aliniokoa kutoka adui yangu mwenye nguvu, kutoka hao walionichukia na kuwa na nguvu kunishinda.

¹⁹ Walinishambulia nilipokuwa katika taabu, lakini Yawe alinikinga.

²⁰ Alinileta, akaniweka kwenye nafasi ya usalama; aliniponyesha kwa sababu alipendezwa nami.

²¹ Yawe alinitendea kwa kadiri ya haki yangu; alinilipa kwa vile mikono yangu haina kosa.

²² Maana nimefuata njia za Yawe, wala sikujitenga na Mungu wangu kwa ajili ya uovu.

²³ Nimeshika maagizo yake yote, sikuacha kufuata masharti yake.

²⁴ Mbele yake nilikuwa mukamilifu, nimejikinga nisikuwe na kosa.

²⁵ Yawe amenilipa kwa kadiri ya haki yangu, kwa kadiri ya usafi wangu mbele yake.

²⁶ Wewe ni mwema kwa wema, mukamilifu kwa wakamilifu,

²⁷ bila kosa kwa wale ambao hawafanyi makosa, lakini mukali kwa waovu.

²⁸ Wewe unawaokoa wanyenyekevu, lakini unaangalia wenye majivuno kusudi uwashushe.

²⁹ Ee Yawe, wewe ni taa yangu. Yawe anafanya giza langu likuwe mwangaza.

³⁰ Kwa musaada wako, ninashinda kundi la waaskari; kwa musaada wa Mungu wangu, ninaruka kuta.

³¹ Matendo ya Mungu ni makamilifu. Ahadi ya Yawe ni ya kuaminika. Yeye ni ngao kwa wote wanaomukimbilia.

³² Nani anayekuwa Mungu isipokuwa Yawe? Nani anayekuwa kikingio isipokuwa Mungu wetu?

³³ Ni Mungu ambaye ananipatia nguvu, na anaifanya salama njia yangu.

³⁴ Ameiimarisha miguu yangu kama ya swala, na kunilinda salama juu ya milima.

³⁵ Ananifundisha kupigana vita, mikono yangu iweze kuvuta upinde wa shaba.

³⁶ Umenipa ngao yako ya kuniokoa; umenifanikisha kwa wema wako.

³⁷ Umepanua njia yangu wala miguu yangu haikuteleza.

³⁸ Niliwafuata waadui zangu na kuwaangamiza; sikurudi nyuma mpaka wamemalizika.

³⁹ Niliwamaliza kabisa. Hawakuinuka tena; walianguka chini ya miguu yangu.

⁴⁰ Wewe ulinijalia nguvu ya kupigana vita; uliwaporomosha waadui chini yangu.

⁴¹ Uliwakimbiza waadui zangu, na wale walionichukia niliwaangamiza.

⁴² Walitafuta musaada, lakini hakukukuwa wa kuwasaidia; walimulilia Yawe, lakini hakuwajibu.

⁴³ Niliwatwanga, wakakuwa kama mavumbi, nikawaponda na kuwakanyaga kama matope katika barabara.

⁴⁴ Wewe uliniokoa na mashambulizi ya watu wangu, ukanichunga kuwa mutawala wa mataifa. Watu nisiowajua walinitumikia.

⁴⁵ Wageni walinifikia wakinyenyekea; waliposikia tu habari zangu, walinitii.

⁴⁶ Wageni walivunjika moyo; wakakuja kutoka makimbilio yao wakitetemeka.

⁴⁷ Yawe anaishi! Asifiwe yeye kikingio changu! Atukuzwe Mungu, kikingio na mwokozi wangu.

⁴⁸ Yeye ameniwezesha kulipiza kisasi, ameweka mataifa chini yangu.

⁴⁹ Ameniokoa kutoka waadui zangu. Ee Yawe, ulinitukuza juu ya wapinzani wangu na kuniponyesha kutoka watesaji wakali.

⁵⁰ Kwa hiyo, nitakutukuza kati ya mataifa; nitaliimbia sifa jina lako.

⁵¹ Mungu anamujalia mufalme wake ushindi mukubwa; anamutendea mema muchaguliwa wake, ndiye Daudi na wazao wake milele.