2 Mambo ya Siku 17 - BIBLIA Maandiko Matakatifu Kwa Watu Wote 2002

Yosafati anawekwa kuwa mufalme

¹ Naye Yosafati mwana wake akatawala pahali pa baba yake Asa, akajiimarisha juu ya inchi ya Israeli.

² Aliweka majeshi katika miji yote ya inchi ya Yuda yenye kuta, na katika maeneo mengine ya Yuda akaweka waaskari walinzi, na katika miji ya Efuraimu ambayo baba yake Asa aliiteka.

³ Yawe alikuwa pamoja na Yosafati kwa sababu alifuata njia za kwanza za babu yake Daudi, wala hakumwabudu mungu Bali.

⁴ Yeye alimutafuta Mungu wa babu yake na kutii amri zake, wala hakufuata matendo ya Israeli.

⁵ Yawe, akauimarisha ufalme wa Yuda katika mikono ya Yosafati, nao watu wote wakamuletea zawadi, akatajirika sana na kuheshimika.

⁶ Alipenda sana ndani ya moyo kumutumikia Yawe, na zaidi ya hayo, alipaharibu pahali pote pa kuabudia miungu mingine na sanamu za Ashera, mungu wa kike, katika inchi ya Yuda.

⁷ Katika mwaka wa tatu wa utawala wake, Yosafati akawatuma wakubwa hawa wafundishe katika miji ya Yuda: Ben-Haili, Obadia, Zakaria, Netaneli na Mikaya.

⁸ Walawi kenda na Makuhani wawili wakaandamana nao. Walawi hao walikuwa Semaya, Netania, Zebadia, Asaeli, Semiramoti, Yonatani, Adonia, Tobia na Tobu-Adonia; nao makuhani walikuwa Elisama na Yoramu.

⁹ Walitwaa kitabu cha Sheria ya Yawe, wakazunguka nacho katika miji yote ya Yuda wakifundisha watu.

Ukubwa wa Yosafati

¹⁰ Yawe akaogopesha falme zote jirani za inchi ya Yuda, zikaogopa kupigana vita na Yosafati.

¹¹ Vilevile Wafilistini wamoja wakamuletea Yosafati zawadi pamoja na feza nyingi na Waarabu wengine nao wakamuletea kondoo dume elfu saba na mia saba, na mbuzi dume elfu saba na mia saba.

¹² Kwa hiyo Yosafati akaendelea kuwa mukubwa zaidi. Akajenga makimbilio na miji ya hazina.

¹³ Naye alikuwa na hazina kubwa katika miji ya Yuda. Kule Yerusalema, aliweka waaskari wa jeshi mashujaa.

¹⁴ Hii ndiyo hesabu yao kulingana na ukoo za babu zao: Adina alikuwa jemadari wa vikundi vya waaskari elfu wa kabila la Yuda. Chini yake, kulikuwa waaskari elfu mia tatu.

¹⁵ Wa pili nyuma yake katika cheo alikuwa jemadari Yohanani, akiwa na waaskari elfu mia mbili na makumi nane,

¹⁶ na wa tatu alikuwa Amasia mwana wa Sikiri, akiwa na waaskari mashujaa elfu mia mbili. Amasia alijitolea kwa mapenzi yake kumutumikia Yawe.

¹⁷ Jemadari wa vikundi vya waaskari waliotoka katika kabila la Benjamina alikuwa Eliada, mutu hodari, naye alikuwa na waaskari elfu mia mbili, wenye pinde na ngao.

¹⁸ Wa pili nyuma yake alikuwa Yozabadi, aliyekuwa na waaskari elfu mia moja makumi nane waliojitayarisha kwa vita.

¹⁹ Watu wote hao walimutumikia mufalme kule Yerusalema, na zaidi ya hayo, aliweka waaskari wengine katika miji ile mingine yenye makimbilio kote katika inchi ya Yuda.