1 Mambo ya Siku 14 - BIBLIA Maandiko Matakatifu Kwa Watu Wote 2002

Kazi za Daudi katika Yerusalema

¹ Kisha mufalme Hiramu wa Tiro akatuma wajumbe kwa Daudi, akamupelekea vilevile miti ya mierezi, wajengaji na waseremala, kusudi wamujengee Daudi nyumba ya kifalme.

² Halafu, Daudi akatambua kwamba Yawe amemwimarisha akuwe mufalme wa Israeli, na kwamba ufalme wake umetukuzwa kwa ajili ya Waisraeli, watu wake.

³ Kule Yerusalema, Daudi akaoa wake wengi zaidi, naye alizaa wana na wabinti wengine.

⁴ Haya ndiyo majina ya watoto aliozaa kule Yerusalema: Samua, Sobabu, Natani, Solomono,

⁵ Ibuhari, Elisua, Elipeleti,

⁶ Noga, Nefegi, Yafia,

⁷ Elisama, Beliada na Elifeleti.

Daudi anawashinda Wafilistini

⁸ Wafilistini waliposikia kwamba Daudi amepakwa mafuta kuwa mufalme wa inchi nzima ya Waisraeli, wote wakatoka kwa wingi kwenda kumutafuta. Daudi alipopata habari, akatoka kwenda kupigana nao.

⁹ Wafilistini wakafika wakaanza mashambulizi katika bonde la Refaimu.

¹⁰ Halafu Daudi akamwomba Mungu shauri: “Niende kuwashambulia Wafilistini? Utawatia katika mikono yangu?” Naye Yawe akamwambia: “Kwenda, nitawatia katika mikono yako.”

¹¹ Basi, Daudi akaenda kule Bali-Perasimu, akawashinda; halafu akasema: “Mungu amebomoa ukingo wa waadui zangu kwa mukono wangu, kama mafuriko ya maji yanayoenda mbio.” Kwa hiyo pahali pale panaitwa “Bwana Mwenye Kubomoa.”

¹² Wafilistini walipokimbia, waliacha sanamu za miungu yao kule, naye Daudi akatoa amri zote zichomwe kwa moto.

¹³ Kisha Wafilistini wakafanya mashambulizi katika bonde lile kwa mara ya pili.

¹⁴ Mara hii, Daudi alipoomba shauri kwa Mungu, Mungu akamwambia: “Usiwashambulie kutokea hapa, lakini zunguka nyuma yao na kuwashambulia kutokea mbele ya miti ya miforosadi, halafu uwashambulie kutokea kule.

¹⁵ Na mara moja utakaposikia vishindo vya miguu kwenye vilele vya ile miforosadi, halafu, toka uende katika vita. Nitakuwa nimekwisha kukutangulia kuwapiga waaskari wa Wafilistini.”

¹⁶ Daudi akafanya kama vile alivyoamuriwa na Mungu. Akawapiga waaskari wa Wafilistini kutokea Gibeoni mpaka Gezeri.

¹⁷ Daudi akakuwa na sifa popote katika inchi, naye Yawe akayatia hofu mataifa yote, nayo yakamwogopa sana.