YUHANI 9 - Ha`bari Ndjema ya I Maore

Insa asuzihira mutru adzalwa mufa-matso

¹ Insa uv̄ira yahe ndziani, aono mutru adzalwa mufa-matso.

² Ɓas, maswihaɓa yahe yamudzisa: «Fundi, uv̄i ɗe ãswi, mutru unu au ɗe wadzaɗe wahe, ata adzalwa mufa-matso?»

³ Insa adjiɓu: «Kaisi amba ɗe waye au ɗe wadzaɗe wahe ɗe waãswi, ɓadi pare zitrendro za Mungu ziv̄enuhe haheju.

⁴ Raha rilio mutsana, irilazimu rifanye hazi za Ule aniv̄eleha. Uku usuja, ulio amba kav̄u ata mutru atsoshindrao afanye hazi.

⁵ Wakati ulio amba tsa ulemenguni, wami ɗe inuru ya ulemengu.»

⁶ Ɓaanda arongoa trongo zile, atri mare v̄otsi, afanya ɗongo na mare yahe yale, aliv̄aha matsoju ha kaono ule,

⁷ amwesa amuambia: «Endra wawauso hari mwa iɓirika ya Siloamu.» (Mana ya dzina lilo «uv̄elehwa.») Ɓas, andre awauso, amwesa aregea, aono.

⁸ V̄ale madjirani na watru wasalia wakomuona hale akofanya akrimasikini wakorongoa: «Afa unu mwa tsi ɗe ule akoketsi v̄ale, akofanya akrimasikini?»

⁹ Ɓaãdhwi wakorongoa: «Ɗe waye.» Wasalia wakorongoa: «Ãhã, ɓadi asufana na waye.» Na waye monyewe akorongoa: «Ɗe wami!»

¹⁰ Ɓas, v̄ale wamudzisa: «Ha namuna jeje ata matso yaho yaɓuha?»

¹¹ Adjiɓu: «Mutru ule ahiriwao Insa afanya ɗongo, aliv̄aha matsoju hangu, amwesa aniambia: ‹Endra Siloamu, wawauso.› Ɓas tsendre, tsiwauso, amwesa tsiono.»

¹² Wamudzisa: «A hav̄i mutru uwo?» Awadjiɓu: «Tsisujua.»

¹³ Wakati ule wav̄ingi mutru ule aka afa yamatso ha watru wa ishama ya Mafarisayo.

¹⁴ Na v̄ale ika Suku ya Uv̄umuzi ɗe Insa afanya ɗongo, amuɓua yamatso.

¹⁵ Mafarisayo wao wajau wamudzisa raha namuna jeje ashindra aona. Sa ile awaambia: «Av̄aha ɗongo matsoni hangu, tsendre tsiwauso, ɓas nisuona.»

¹⁶ V̄ale ɓaãdhwi ya Mafarisayo yarongoa: «Mutru uwo kala ha Mungu, mana kasustehi iSuku ya Uv̄umuzi.» Ɓadi wangina warongoa: «Ha namuna jeje muãswifu ashindrao afanye ãlama za midjuza mauri ɗe zizo?» Ɓas, mufaraka ungia hari mwawo.

¹⁷ Amwesa waambia raha mufa-matso ule: «V̄anu wawe, usurongoa trini yahusu uwo ahuɓua yamatso?» Adjiɓu: «Waye mutrume.»

¹⁸ Mayahudi v̄ale kawaamini amba ule aka mufa-matso ɗe ashindra aona, ata mupaka wahiri wadzaɗe wahe.

¹⁹ Wawadzisa: «Unu ɗe umwana wanyu murongoao amba adzalwa mufa-matso? Ɓasi ha namuna jeje av̄asa aonao?»

²⁰ Wadzaɗe wahe wadjiɓu: «Risujua amba unu ɗe umwana watru, tsena adzalwa mufa-matso.

²¹ Ɓadi ha namuna jeje ata aonao av̄asa, au mbani ɗe amuɓua yamatso, karisujua. Namumudzise monyewe, madza aɓalihi, atsorongoa trongo zamuhusu.»

²² Wadzaɗe wahe warongoa zile mana wakoria yaMayahudi, iv̄o waka waafikiana amba mutru atsomukuɓalio Insa amba ɗe Mutsahuliwa, atsoɓalidziwa iNyumba ya Uswali.

²³ Iyo ɗe imana wadzaɗe wahe warongoa: «Madza aɓalihi, namumudzise monyewe.»

²⁴ Ɓas, Mafarisayo yahiri mara ya v̄ili mutru ule aka mufa-matso, wamuambia: «Lav̄a na Mungu amba utsorongoa kweli. Risujua amba mutru uwo muãswifu.»

²⁵ Awadjiɓu: «Neka waye muãswifu, wami tsiji. Ɓadi trongo moja niijuao, tsika mufa-matso, na av̄asa nisuona!»

²⁶ Ɓasi wamudzisa: «Ahufanyia trini? Namuna jeje aɓua matso yaho?»

²⁷ Awadjiɓu: «Madza tsimuambiani, ɓadi kamwavulishia. Manatrini mutsahao muikiye raha? Musutsaha wajau mufanyihe maswihaɓa yahe?»

²⁸ Sa ile wamuruhana na urongoa: «Wawe ɗe ulio swihaɓa wa mutru uwo! Wasi, maswihaɓa ya Musa!

²⁹ Risujua amba Mungu alagua na Musa, ɓadi mutru uwo, wasi kariji v̄ahanu ala.»

³⁰ Ule awadjiɓu: «Isushangidza amba kamuji v̄ahanu ala, ne ɗe aniɓua yamatso.

³¹ Risujua amba Mungu kavulishia maãswifu. Ɓadi mutru amuhishimuo, afanyao mav̄endzeleo yahe, uwo ɗe amuvulishiao.

³² Kav̄waparokilihana amba mutru aɓua matso ya mutru adzalwa mufa-matso.

³³ Neka mutru uwo kala ha Mungu, katsoshindra afanya trongo itsokao yotsi.»

³⁴ Wamudjiɓu: «Udzalwa ha ukamilifu waho hari mwa madhambi, ɗe urisomedzao?» Ɓas, wamuĩdzia.

³⁵ Insa akia amba wamuĩdzia. Sa ile andre amupara, amudzisa: «Hali usuamini uMwana wa Mwanadamu|Mwana wa Mwanadamu?»

³⁶ Adjiɓu: «Uwo ɗe uv̄i, Mutukufu, pare nimuamini?»

³⁷ Insa amuambia: «Usumuona; unu alaguao na wawe, ɗe waye.»

³⁸ Sa ile arongoa: «Nisuamini Raɓi.» Amwesa amusudjudia.

³⁹ Ɓas Insa arongoa: «Tsija ulemenguni v̄anu pare hukuma ike: ile wao kawaono, waone, na wao waonao, wafanyihe wafa-matso.»

⁴⁰ Ɓaãdhwi ya Mafarisayo yaka v̄ale na waye ukia yawo marongozi yale, wamudzisa: «Hali wasi wajau, ne wafa-matso?»

⁴¹ Insa awadjiɓu: «Na djeli muka wafa-matso, kamwatsokana dhambi. Ɓadi av̄asa murongoao: ‹Risuona›, dhambi lanyu la v̄av̄o.»