YUHANI 7 - Ha`bari Ndjema ya I Maore

Wananyahe wa Insa kawasuamini

¹ Ɓaanda ya v̄ale, Insa akozingidzia iGalilaya. Kakotsaha angia na ulawa hari mwa iYudeya, mana Mayahudi wakotsaha wamuule.

² Na v̄ale uMusherehio wa yaMayahudi wa Maɓanga ya Haima uka ukuruɓia.

³ Ɓas, wananyahe wamuambia: «Lawa v̄anu, wendre hari mwa iYudeya, ile pare maswihaɓa yaho yaone wajau trongo za ãdjaɓu uzifanyao.

⁴ Mana kav̄u mutru afanyao trongo zahe sirini neka asutsaha ajulihwane ha dhwahiri. Ɓaanda ufanyao trongo zizo, v̄av̄o dzionese ha piya lidunia.»

⁵ Mana ata wananyahe, ne kawakomuamini.

⁶ Ɓas, Insa awaambia: «Wakati wangu raha kawaja, ɓadi hanyuju, kula wakati ɗe uwo.

⁷ Dunia kalishindri muengani, ɓadi wami, lilo unienga, mana nisulilawia ushahidi amba zitrendro zalo za peu.

⁸ Namwendre wanyu hari mwa uMusherehio. Wami tsisendra hari mwa Musherehio uwo, mana wakati wangu raha kawatsimidziha.»

⁹ Ɓas, ɓaanda awaambia trongo zile, aɓaki Galilaya.

Insa hari mwa Musherehio wa Maɓanga ya Haima

¹⁰ Ɓadi ɓaanda wananyahe wahea hari mwa uMusherehio, Insa ahea hule wajau, tsi ha hadhwira, ɓadi ha siri.

¹¹ Ɓas, yaMayahudi yakomuzunguha hari mwa uMusherehio na udzisa: «Afa a hav̄i mwa?»

¹² Watru wakonguruma trongo nyengi ju lahe hari mwa idunia ile. V̄wa wakorongoa: «Waye mutru mwema», ɓadi wasalia wakorongoa: «Ata hata, asulaɓa idunia.»

¹³ Ɓadi kav̄waka ata mutru akomurongoa ha hadhwira, mana wakoria yaMayahudi.

¹⁴ iNusu ya wakati wa uMusherehio yamokoma, Insa ahea hari mwa iNyumba Ndzitwaharifu, aandrisa usomedza.

¹⁵ V̄ale Mayahudi wakoshanga na urongoa: «Ha namuna jeje ajuao yiMiangishio, ne kasoma?»

¹⁶ Insa awadjiɓu: «Musomo wangu niutoao, kausulawa hangu, ɓadi ha Uwo aniv̄eleha.

¹⁷ Mutru atsahao afanye mav̄endzeleo yahe waye Mungu, atsojua neka musomo wangu ulawa ha Mungu, au neka nisulagua ha iwami yangu.

¹⁸ Mutru alaguao ha iwaye yahe, uwo asutsaha sifa zahe monyewe. Ɓadi uwo atsahao sifa za Ule amuv̄eleha, uwo wa kweli, kav̄u unafiki utsokao yotsi haheju.

¹⁹ Hali Musa kamuv̄ani iSharia? Na kav̄u ata moja hanyuju aɗungao iSharia. Manatrini mutsahao muniule?»

²⁰ iDunia imudjiɓu: «Una shetwani! Mbani ɗe atsahao ahuule?»

²¹ V̄ale Insa awadjiɓu: «Tsifanya shitrendro moja ya midjuza, na wanyu piya mushanga.

²² Musa amuv̄ani matahiri, (na v̄ale iyo tsi trongo yalawa ha Musa, ɓadi ha wadzaɗe watru wa hale), na wanyu utahiri mutru ata wala ukana *Suku ya Uv̄umuzi.

²³ Neka mutru atsojua atahiriwe Suku ya Uv̄umuzi pare iSharia ya Musa isuvundzwe, v̄av̄o manatrini munijaliao hasera iv̄o nav̄onesa mutru wa kamili Suku ya Uv̄umuzi?

²⁴ Musunamuwe ha sura, ɓadi namunamuwe ha haki.»

Hali Insa ɗe uMutsahuliwa?

²⁵ Na v̄ale ɓaãdhwi ya wakazi wa Yerusalemu wakorongoa: «Hali unu tsi ɗe ule watsahao wamuule?

²⁶ Na tsunu asulagua ha unafasi v̄anu, wala kawasumuambia ata trongo. Saɓu ha kweli madhwamana wakuɓali amba waye ɗe Mutsahuliwa?

²⁷ Ɓadi mutru unu, wasi ujua v̄ahali ala, na uMutsahuliwa amoja, kav̄u ata mutru atsojuao v̄ahali ala.»

²⁸ Na Insa iv̄o akosomedza moni na iNyumba Ndzitwaharifu, arongoa ha nguvu: «Amba wanyu musunijua, tsena musujua v̄ahali nala? Tsaja ha iwami yangu, ɓadi Uwo aniv̄eleha, waye kweli, na wanyu kamumuji.

²⁹ Wami umujua, mana tsilawa haheju, tsena waye ɗe aniv̄eleha.»

³⁰ Ɓas, wakotsaha wamuziye, ɓadi kav̄waka ata mutru av̄eleha umuhono amusike, mana wakati wahe raha kawaka wapara.

³¹ Na v̄ale hari mwa idunia ile wengi wamuamini, ata wakorongoa: «Wakati uMutsahuliwa atsojao, hali atsofanya trongo za midjuza rahana mutru unu?»

Magogezi yasurumwa yandre yamuziye Insa

³² Watru wa ishama ya Mafarisayo wakia idunia iv̄o yakonguruma trongo zile uhusu Insa. Ɓas, yaMatolezi Maɓole ya Masadaka|Mutolezi-Masadaka na Mafarisayo yav̄eleha magogezi yandre yamuziye.

³³ V̄ale Insa arongoa: «Tsa na wanyu raha hari mwa muda mushashi, amwesa nitsendra ha Uwo aniv̄eleha.

³⁴ Mutsonizunguha, ne kamutsonipara, na v̄ahanu nitsokao, kamushindri uja.»

³⁵ Mayahudi yaambiana: «Hav̄i ɗe atsendrao ata karitsomupara? Saɓu katsendra ha wale waẽshio hari mwa yaMagiriki, andra asomedza yaMagiriki?

³⁶ Mana ya urongozi uwo aurongoa trini amba: ‹Mutsonizunguha, ne kamutsonipara, na v̄ahanu nitsokao, kamushindri uja›?»

Maji yav̄ingao uhayati

³⁷ iSuku ya mwiso ya Musherehio ule, ne ɗe isuku ɓole, Insa ahimi, arongoa ha nguvu: «Neka mutru asuona nyora, nanijiliye, anwe.

³⁸ Mutru aniaminio, mauri ɗe inamuna uMuangishio urongoao: ‹Miro ya maji yiv̄ingao uhayati yitsoshuka ulawa moni hahe› ».

³⁹ Na trongo iyo airongoa husuana na iRoho watru wamuaminio wakoja wav̄olweyo. Mana v̄ale raha iRoho kayaka yadjaãliwa watru, ha iv̄o Insa raha kaka atukuziwa.

Dunia isufarikishana ha siɓaɓu ya Insa

⁴⁰ Ɓas, wakati idunia ile yakia marongozi yale, ɓaãdhwi yakorongoa: «Ha kweli, unu ɗe uMutrume.»

⁴¹ Na wasalia wakorongoa: «Unu ɗe uMutsahuliwa.» Iv̄o wasalia tsena wakorongoa: «Kweli amba Galilaya ɗe v̄ahali uMutsahuliwa atsolawao?

⁴² Hali uMuangishio kausurongoa amba uMutsahuliwa atsoka shilembwe yalawa ha Daudu ɗagoni Ɓaitilham, v̄ahanu Daudu aka?»

⁴³ Ɓasi v̄ungia mufarikishano hari mwa idunia ile ha siɓaɓu ya Insa.

⁴⁴ Ɓaãdhwi yawo wakotsaha wamuziye, ɓadi kav̄waka ata mutru av̄eleha umuhono amusike.

Makizi-mbeli wa yaMayahudi kawamuamini Insa

⁴⁵ Ha izo, magogezi yale yarudi ha yaMatolezi Maɓole ya Masadaka na watru wa ishama ya Mafarisayo. Sa ile wawadzisa: «Manatrini kamwamuv̄inga?»

⁴⁶ Magogezi yale yadjiɓu: «Kav̄waparoka mutru alagua mauri ɗe mutru uwo.»

⁴⁷ Ɓas, Mafarisayo yale yawadjiɓu: «Afa wanyu wajau ne mulaɓiha?

⁴⁸ Hali v̄wa mutru hari mwa yamadhwamana au yaMafarisayo amuamini?

⁴⁹ Ɗe idunia iyo tu kaiji iSharia; wao watru walaãniwa!»

⁵⁰ Ɓas Nikodemu, moja mengoni na yaMafarisayo aka andra ha Insa ina wakati, awaambia:

⁵¹ «Hali Sharia yatru uhukumu mutru kaɓula ya umuvulishia na ujua izo azifanya?»

⁵² Wamudjiɓu: «Wawe wajau wa shi Galilaya? Twalia ha uzuri, na utsoona amba Galilaya kav̄ulawa mutrume.» [

⁵³ Ɓaanda ya v̄ale kula mutru arudi ɗagoni hahe.