YUHANI 6 - Ha`bari Ndjema ya I Maore

Insa asulisa watru wazidi alifu tsano

¹ Ɓaanda ya zile, Insa ashia nyambo ya iƁahari ya Galilaya|Ɓahari ya Galilaya, yakohiriwa tsena Dzia la Tiɓeriyasa.

² Dunia ya watru wengi yakomuɗunga, mana wakoona ãlama za midjuza akozifanya ha wawaɗe.

³ Insa ahea hari mwa mulima, aketsi v̄ale na maswihaɓa yahe.

⁴ Na v̄av̄o Unahanizi wa Mutupio|unahanizi, musherehio wa Mayahudi, uka ukaɓili.

⁵ Ɓas, Insa adzua yamatso, aono amba dunia nyengi ya watru yakomujilia. Sa ile amudzisa Filiɓusa: «Hav̄i ɗe ritsoparao rinunuwe madipe ile watru wanu wapare waɗye?»

⁶ Amudzisa trongo ile, pare amudjereɓu, mana akojua trongo akondroifanya.

⁷ Filiɓusa amudjiɓu: «Madipe ya kima ya turuturu miyateni za fedha kayatsotosha amba kula mutru apare mwana gudru!»

⁸ Na v̄ale wangina tsena mengoni na maswihaɓa yahe, ne ɗe Andreasa, mwananyahe wa Simoni Monye, amuambia:

⁹ «V̄wa mwana mutruɓaɓa v̄anu aliona madipe matsano na fi mbili. Ɓadi iyo trini mbeli na dunia ya watru mauri ɗe iyo?»

¹⁰ Insa arongoa: «Namuketsise idunia.» Na v̄ahanu v̄ale v̄uka kunu dzengi. Ɓas waketsi; watruɓaɓa waka v̄ale, waka indadi ya alifu tsano jauleni.

¹¹ Sa ile Insa arenge madipe yale, ahimidia, amwesa av̄awo watru waka waketsi v̄ale. Afanya ɗe wiyo na zifi, na kula mutru av̄olwa kiasi yahe akotsaha.

¹² Ata wakati wakura, aambia maswihaɓa yahe: «Namurundre magudru yaɓaki, pare v̄usulatsihe ata shitru.»

¹³ Ɓas wayarundru, ata wajadza mahanga kumi na maili ha magudru yaka yaɓaki hari mwa madipe matsano yale, ɓaanda ya watru wahisa uɗya.

¹⁴ Watru wale iv̄o waona iãlama ya midjuza Insa aifanya, warongoa: «Ha kweli, unu ɗe uMutrume akorongolwa amba atsoja ulemenguni.»

¹⁵ Ɓadi Insa ujua yahe amba watru wakoja wamurenge ha nguvu wamufanye mufalume, adzivuru tsena mulimani waye weke.

Insa asendra ha ugaɗa hari mwa maji

¹⁶ Mahariɓi ɓaanda yazinga, maswihaɓa yahe yashuku ɓaharini.

¹⁷ Wapashia djahazi ha ushia nyambo ya Kafarnaumu. Na v̄ale shidza madza ika izingi, ɓadi Insa raha kaka aja awapara.

¹⁸ Ɓahari ika mbovu, mana v̄wakovuma pev̄o yendza nguvu.

¹⁹ Ɓaanda wavura kasi mukaɓala wa ziv̄imo shirini na tsano ata upara thalathini jauleni, wamuono Insa iv̄o akwendra ha ugaɗa iɓahari na ukuruɓia lidjahazi; ɓas waremwa na faza.

²⁰ Ɓadi Insa awaambia: «Unu ɗe wami, musuriye!»

²¹ Wakotsaha wamuv̄ashidze moni na lidjahazi, na sa ile kamwe lidjahazi liwaswili ɓandariju hule wakwendra.

Insa ɗe lidipe la uhayati

²² iDunia yaka yaɓaki nyambo ya lidzia v̄ale imaizi amba djahazi moja tu ɗe laka, na Insa kaka alipashia v̄umoja na maswihaɓa yahe, ɓadi waka walawa ɗe wao tu.

²³ iSuku yaɗunga madjahazi yangina yala ha ulawa Tiɓeriyasa, yawaswili v̄ale kariɓu na v̄uv̄ahanu watru waka waɗya yamadipe ɓaanda ya Raɓi umuhimidia Mungu.

²⁴ Wakati idunia yafahamu amba tsi Insa, wala tsi maswihaɓa yahe waka moni v̄ale, wapashia wao ha wao madjahazi yale, wandre Kafarnaumu ile wamuzunguhe Insa.

²⁵ Umupara yawo nyambo ya iɓahari hule, wamudzisa: «Fundi, afa lini ɗe waja hunu?»

²⁶ Insa awadjiɓu: «Nisumuambiani ha kweli, musunizunguha tsi ɗe iv̄o mwaona ãlama za midjuza, ɓadi ɗe iv̄o mwaɗya madipe, mwakura.

²⁷ Musudzishahilise na shahula muola, ɓadi namudzishahilise na shahula iv̄ao uhayati mukamilifu wa daima, shahula ilio amba uMwana wa Mwanadamu|Mwana wa Mwanadamu atsomuv̄aniyo, mana ɗe waye Ɓaɓa, yaãni Mungu, amukadza umuhuri wahe.»

²⁸ Wamudzisa: «V̄av̄o rifanye trini ata ritsimidze urumishi wa Mungu?»

²⁹ Insa awadjiɓu: «Urumishi wa Mungu, ɗe wanyu uamini uwo amuv̄eleha.»

³⁰ Sa ile wamudzisa: «Ãlama ya midjuza trini utsoifanyao, ile riione, tsena rihuamini? Trini ɗe ujao uifanye?

³¹ Maɓaɓatru waɗyi shahula ihiriwao manna wakati waka padzaju, mauri ɗe inamuna v̄waangihwa: ‹Awav̄a waɗye dipe lalawa pev̄oni.› »

³² Sa ile Insa awaambia: «Nisumuambiani ha kweli, Musa tsi ɗe amuv̄ani lidipe lalawa pev̄oni, ɓadi Ɓaɓangu ɗe amuv̄aoni lidipe la kweli lilawao pev̄oni.

³³ Mana lidipe la Mungu ɗe uwo ashukao ha ulawa pev̄oni, av̄e uhayati ulemengu.»

³⁴ Ɓas, wamuambia: «Mutukufu, riv̄e ha daima dipe lilo.»

³⁵ Sa ile Insa awaambia: «Wami ɗe lidipe la uhayati. Mutru anijiliao, katsoona ndza dahari yahe, na uwo aniaminio, katsoona nyora ata idahari.

³⁶ Ɓadi tsimuambiani amba muniono, wala kamusuamini.

³⁷ Piya wao Ɓaɓa aniv̄aowo, watsonijilia, na wami tsitsotoa v̄ondze uwo anijiliao.

³⁸ Mana tsishuku ulawa pev̄oni nifanye, tsi mav̄endzeleo yangu, ɓadi mav̄endzeleo ya Uwo aniv̄eleha.

³⁹ Na mav̄endzeleo ya Uwo aniv̄eleha, ɗe uka amba wami nisulatsishiwe na ata moja hari mwa piya wao aniv̄awo, ɓadi niwaregeze hayi isuku ya mwiso.

⁴⁰ Mana mav̄endzeleo ya Ɓaɓangu ɗe uka amba mutru yotsi aonao uMwana, amuaminio, akane uhayati mukamilifu wa daima; na wami nitsomuregeza hayi isuku ya mwiso.»

⁴¹ Ɓas, v̄ale Mayahudi yakonguruma ju la Insa iv̄o aka arongoa: «Wami ɗe lidipe lashuka ulawa pev̄oni.»

⁴² Wakorongoa: «Afa unu tsi ɗe Insa, mwana wa Yusufu, ule rimujuao ɓaɓahe na mayahe? Ha namuna jeje, ɓas, arongoao av̄asa amba: ‹Tsishuku ulawa pev̄oni?› »

⁴³ Sa ile Insa awaambia: «Musungurume wanyu na wanyu.

⁴⁴ Kav̄usi ata mutru ashindrao anijiliye neka tsi amba Ɓaɓangu, Uwo aniv̄eleha, tsi ɗe amuv̄inga. Na wami nitsomuregeza hayi isuku ya mwiso.

⁴⁵ V̄uangihwa moni mwa yimiangishio ya yimitrume: ‹Watsosomedzewa piyawo na Mungu.› Kula mutru amuvulishia Ɓaɓa, tsena apara umusomo wahe, unijilia.

⁴⁶ Tsi amba v̄wa mutru aparomuona Ɓaɓa, neka tsi ɗe uwo alawa ha Mungu. Waye uwo, amuono Ɓaɓa.

⁴⁷ Nisumuambiani ha kweli, monyewe uamini, uwo ana uhayati mukamilifu wa daima.

⁴⁸ Wami ɗe lidipe la uhayati.

⁴⁹ Maɓaɓanyu yaɗyi shahula ihiriwao manna padzaju, na wao wafu.

⁵⁰ Lini ɗe lidipe lishukao ulawa pev̄oni, ile mutru aliɗyao, asufe.

⁵¹ Wami ɗe lidipe lilio hayi lashuka ulawa pev̄oni. Neka mutru asuɗya lidipe lini, atsoẽshi dahari. Na lidipe nitsoliv̄ao, ɗe umwili wangu nitsouv̄ao, pare lidunia likane uhayati.»

⁵² Ɓas, Mayahudi yaandrisa ushindrana ha urongoa: «Ha namuna jeje mutru unu atsoshindrao ariv̄e umwili wahe riuɗye?»

⁵³ Sa ile Insa awaambia: «Nisumuambiani ha kweli, neka kamusuɗya umwili wa uMwana wa Mwanadamu, wala kamusunwa idamu yahe, kamusina uhayati hanyuju.

⁵⁴ Mutru aɗyao mwili wangu, tsena anwao damu yangu, ana uhayati mukamilifu wa daima, na wami nitsomuregeza hayi isuku ya mwiso.

⁵⁵ Mana mwili wangu shahula ya kweli, na damu yangu shinoa ya kweli.

⁵⁶ Mutru aɗyao umwili wangu, tsena anwao idamu yangu, waye uɓaki hari mwa uv̄umoja na wami, na wami hari mwa uv̄umoja na waye.

⁵⁷ Mauri ɗe inamuna Ɓaɓa alio hayi aniv̄eleha, tsena niẽshio ha waye Ɓaɓa, mutru aniɗyao, atsoẽshi ha iwami.

⁵⁸ Lini ɗe lidipe lashuka ulawa pev̄oni. Kalisi mauri ɗe lile maɓaɓanyu waliɗya, wafa. Uwo aɗyao dipe lini, atsoẽshi dahari.»

⁵⁹ Insa arongoa trongo zile wakati akosomedza moni na iNyumba ya Uswali ɗagoni Kafarnaumu.

Ɓaãdhwi ya maswihaɓa ya Insa wadzivuru

⁶⁰ Ɓasi ukia yawo marongozi ya Insa yale, wengi wa maswihaɓa yahe warongoa: «Urongozi unu mudziro. Mbani ɗe ashindrao auvulishiye?»

⁶¹ Insa iv̄o ajua rohoni amba maswihaɓa yahe yakonguruma na itrongo ile, awadzisa: «Hali urongozi uwo usumutriani taradudu?

⁶² Ɓasi mutsoka jeje mwamoona uMwana wa Mwanadamu asuhea v̄ahanu aka mwandroni?

⁶³ Roho ɗe iv̄ao uhayati, umwili kaushindri ata trongo. Marongozi yao namuambiani, yao roho na uhayati.

⁶⁴ Ɓadi v̄wa ɓaãdhwi hari mwanyu kawasuamini.» Mana Insa akojua rangu mwandro amba wav̄i ɗe kawakoamini, na uv̄i ɗe atsomuv̄iriao nyuma.

⁶⁵ Aengedza raha: «Iyo ɗe imana namuambiani amba kav̄u mutru ashindrao anijiliye neka kav̄olwa itrongo na Ɓaɓa.»

⁶⁶ Rangu v̄ale wengi wa maswihaɓa yahe wadzivuru, kawakondra na waye tsena.

⁶⁷ Ɓas, Insa adzisa maswihaɓa kumi na maili yahe yale: «He wanyu, kamusutsaha mwandra dzanyu wajau?»

⁶⁸ Simoni Monye amudjiɓu: «Raɓi, ha mbani ɗe ritsendrao? Una yamarongozi ya uhayati mukamilifu wa daima.

⁶⁹ Na wasi riamini, tsena rijua amba wawe ɗe Mutwaharifu wa Mungu.»

⁷⁰ Sa ile Insa awaambia: «Hali wami tsi ɗe namutsahuani wanyu kumi na waili? Ɓadi moja mengoni mwanyu, waye shetwani.»

⁷¹ Na v̄ale akomurongoa ɗe Yudasi mwana wa Simoni Iskarioti, mana waye ɗe akoja amuv̄iriye nyuma, waye alio amba aka moja hari mwa kumi na waili wale.