YUHANI 5 - Ha`bari Ndjema ya I Maore

Insa asuzihira shirewe Ɓaitisaida

¹ Ɓaanda ya v̄ale v̄uka musherehio wa yaMayahudi, na Insa ahea Yerusalemu.

² Na Yerusalemu hule, kariɓu na umulongo uhiriwao Mulongo wa Maɓariɓari, v̄uka ɓirika ya maji yakohiriwa Ɓaitisaida Shiheɓraniya, ikana maɓaraza matsano yakana ngidzo zalingana.

³ Maɓarazani v̄ale v̄uka v̄ulala wengi wa wawaɗe, wafa-matso, magoɓo, na zirewe; [na wao wakolindra mugudzuho wa yamaji.

⁴ Mana v̄uka malayika yakoka na ushuka ɓirikani v̄ale na ugudzusa yamaji; yotsi akoshuka wa handra majini v̄ale ɓaanda ya umugudzuho, akozihiriha uwaɗe yotsi akanawo.]

⁵ Na v̄ale v̄uka mutru aka muwaɗe rangu maha thalathini na minane.

⁶ Insa umuona yahe v̄ale alala, tsena akojua amba ule muwaɗe rangu hale, amudzisa: «Usutsaha uv̄one?»

⁷ Muwaɗe ule amudjiɓu: «Fundi, tsisina mutru wa unitria moni na iɓirika maji yamogudzuha. Na wakati nendrao, wangina unitrangulia ashuke.»

⁸ Ɓas, Insa amuambia: «Hima, urenge ɗalo laho, wendre.»

⁹ Sa ile kamwe mutru ule av̄ono, arenge ɗalo lahe, andre. Na ile ika Suku ya Uv̄umuzi.

¹⁰ Ɓasi yamakizi-mbeli wa yaMayahudi waka v̄ale waambia mutru ule av̄onesewa: «Ini Suku ya Uv̄umuzi, kayaruhusu wawe uv̄inga ɗalo laho.»

¹¹ Na waye awadjiɓu: «Mutru aniv̄onesa ɗe aniambia: ‹Renga ɗalo laho, wendre.› »

¹² Wale wamudzisa: «Uwo mbani ɗe ahuambia: ‹Renga ɗalo laho, wendre›?»

¹³ Ɓadi mutru ule av̄onesewa kakojua amba ule mbani, mana Insa kakoonehana moni na idunia yaka v̄ale.

¹⁴ Ɓaanda ya v̄ale Insa amupara mutru ule moni na iNyumba Ndzitwaharifu, amuambia: «Tsini uv̄ono. Usuãswi tsena, ile v̄usuhuhidjiriye trongo mbovu zaidi.»

¹⁵ Sa ile mutru ule andre dzahe, ajudza makizi-mbeli ya Mayahudi yale amba Insa ɗe amuv̄onesa.

¹⁶ Iyo ɗe imana ata Mayahudi yaandrisa umusonga Insa, mana trongo ile akoifanya Suku ya Uv̄umuzi.

¹⁷ Ɓadi Insa awaambia: «Ɓaɓangu a hazini ata av̄asa, na wami wajau ne nisufanya hazi.»

¹⁸ Ɓasi ha izo tsena ɗe yamakizi-mbeli ya Mayahudi yakozidi uzunguha ndzia wamuule. Mana tsi tu amba akovundza iSharia ya iSuku ya Uv̄umuzi, ɓadi akorongoa amba Mungu ɗe Ɓaɓahe kweli-kweli, na ha izo akodzifanya sawa na Mungu.

Yezi ya uMwana wa Mungu

¹⁹ V̄ale Insa arenge umurongo, awaambia: «Nisumuambiani ha kweli, uMwana kafanya ata trongo ha iwaye yahe neka tsi ɗe iyo aonao Ɓaɓahe aifanyao. Mana kula trongo Ɓaɓa afanyao, uMwana uifanya wajau.

²⁰ Mana Ɓaɓa uv̄endza uMwana, na waye umuonesa kula trongo aifanyao. Tsena, atsomuonesa trongo ɓole rahana zini, pare muke hari mwa ushangavu.

²¹ Mana mauri ɗe inamuna Ɓaɓa aregezao hayi watru wafa, awav̄ao uhayati, ɗe inamuna uMwana av̄ao uhayati uwo atsahao.

²² Ɓaɓa waye kahukumu ata mutru, ɓadi adjukumisa uMwana kula hukuma,

²³ pare watru piya wahishimu uMwana mauri ɗe inamuna wamuhishimuo waye Ɓaɓa. Mutru kahishimu uMwana, v̄av̄o waye kahishimu Ɓaɓa, ule amuv̄eleha.

²⁴ Nisumuambiani ha kweli, mutru avulikiao urongozi wangu tsena aaminio ule aniv̄eleha, ana uhayati mukamilifu wa daima. Katsohukumulwa, mana madza avuku uufa, angia uhayatiju.

²⁵ Nisumuambiani ha kweli amba v̄usuja wakati, na uwo madza uwaswili, ulio amba wafu watsokia liji la uMwana wa Mungu. Na wao itsokao amba walikia, watsoẽshi.

²⁶ Mana mauri ɗe inamuna Ɓaɓa aliona uhayati hahe monyewe, ɗe inamuna adjaãlia uMwana akane uhayati hahe monyewe,

²⁷ amwesa amuv̄a yezi ya uhukumu, mana waye ɗe uMwana wa Mwanadamu|Mwana wa Mwanadamu.

²⁸ Musushange na itrongo iyo, mana v̄usuja wakati ulio amba watru piya walio mahaɓurini watsokia ji lahe,

²⁹ na wao watsolawa. Wao wafanya ndjema watsoregezewa hayi, ile wake na uhayati, ɓadi wao wafanya mbovu watsoregezewa hayi, ile wav̄ire hari mwa hukuma.

³⁰ Wami tsishindri nafanya yotsi ha iwami yangu. Ha uɗunga iyo niikiao ɗe nihukumuo; na hukuma yangu, iyo ya haki, mana mav̄endzeleo yangu tsi ɗe niyatsahao, ɓadi mav̄endzeleo ya Uwo aniv̄eleha.»

Misomo yapatana na ushahidi wamuhusu Insa

³¹ «Neka wami ɗe nidzilawiao ushahidi wami monyewe, v̄av̄o ushahidi wangu kausi wa kweli.

³² Ɓadi v̄wa wangina anilawiao ushahidi, na wami nisujua amba ushahidi uwo wa kweli.

³³ Muv̄eleha marenga-haɓari ha Yahaya|Yahaya Muɓaĩshizi, na waye alawia ushahidi ukweli.

³⁴ Hanguju tsi ha mwanadamu ɗe niparao ushahidi; ɓadi nisurongoa zini pare wanyu muhuyiwe.

³⁵ Yahaya aka mwenge wakovua na uwala, na wanyu muka mukuɓali ufurahi mwana muda hari mwa iheu yahe.

³⁶ Ɓadi wami tsina ushahidi muɓole rahana wa Yahaya. Mana zitrendro Ɓaɓa aniv̄azo nizitsimidze, zini kamwe nizifanyao, zisunilawia ushahidi amba Ɓaɓa ɗe aniv̄eleha.

³⁷ Na Ɓaɓa uwo aniv̄eleha, waye-waye ɗe anilawia ushahidi. Kamwaparokia ji lahe, wala uona sura yahe.

³⁸ Na urongozi wahe kausuketsi moni hanyu, mana kamusuamini uwo amuv̄eleha.

³⁹ Wanyu utwali yiMiangishio Mitwaharifu mana musufikiri amba ha wiyo, muna uhayati mukamilifu wa daima. Ne ɗe wiyo-wiyo ɗe yinilawiao ushahidi.

⁴⁰ Wala kamusukiri mwanijilia pare mwakana uhayati.

⁴¹ Utukuziwa na wanadamu tsi ɗe niitsahao.

⁴² Ɓadi wami umujuani, amba kamusina hanyuju uv̄endza wa Mungu.

⁴³ Wami tsija ha lidzina la Ɓaɓangu, wala kamusunikuɓali. Neka mutru wangina asuja ha lidzina lahe monyewe, mutsomukuɓali.

⁴⁴ Ha namuna jeje mutsoshindrao muamini, wanyu murengao sifa zanyu wanyu ha wanyu, ne kamusutsaha mwapara sifa yalawa ha Mungu kana wa v̄ili?

⁴⁵ Mwasufikiri amba wami nitsomushitakini ha Ɓaɓa. Mutru amushitakioni ɗe Musa, uwo mwamuhetsia tama yanyu.

⁴⁶ Mana na djeli mwakomuamini Musa, mwatsoniamini, mana yahusu wami ɗe aangiha.

⁴⁷ Ɓadi neka kamusuamini miangishio yahe, ha namuna jeje mutsoaminio marongozi yangu?»