YUHANI 4 - Ha`bari Ndjema ya I Maore

Mahadisi ya Insa na mutrumama wa shi Samariya

¹ Insa ujua yahe amba watru wa ishama ya Mafarisayo wakia amba akopara na uɓaĩsha maswihaɓa rahana Yahaya|Yahaya Muɓaĩshizi,

² na v̄ale Insa waye yahe tsi ɗe akoɓaĩsha, ɓadi ɗe maswihaɓa yahe,

³ alawia Yudeya, arudi Galilaya.

⁴ Na v̄ale akolazimu av̄ire hari mwa itsi ya Samariya.

⁵ Ɓas, awaswili hari mwa ɗago la shi Samariya lihiriwao Sikari, kariɓu na lishamba Yaãkuɓu aka aliv̄a mwana wahe Yusufu.

⁶ V̄ale ɗe v̄ahanu ishisima ya Yaãkuɓu yaka. Iv̄o Insa aka alemewa na umusafara, aketsi wangoni na ishisima. Ika mukaɓala wa sa ya sita.

⁷ Sa ile v̄uja mutrumama Musamariya, akojoɓua maji. Insa amuambia: «Nimbe maji ninwe.»

⁸ Na v̄ale maswihaɓa yahe yaka yangia ɗagoni, wakwendra wanunuwe zahula.

⁹ Ɓas, mutrumama Musamariya ule amuambia: «Ha namuna jeje wawe Muyahudi unimiao maji ya unwa, wami mutrumama Musamariya?» Arongoa namuna ile, mana Mayahudi kayakoparana na Masamariya.

¹⁰ Insa amudjiɓu: «Na djeli wakojua ineema yadjaãliwa na Mungu, na uwo mbani ɗe ahuambiao amba: ‹Nimbe maji ninwe›, v̄av̄o wawe ɗe watsomumia maji ya unwa, na waye atsohuv̄a maji ya uhayati.»

¹¹ Sa ile mutrumama ule amuambia: «Mutukufu, kusina ndro ya uɓua, na ishisima ya ndrile. Ɓasi hav̄i ɗe utsoparao maji ya uhayati yao?

¹² Hali wawe muɓole rahana ɓaɓatru Yaãkuɓu? Waye ɗe ariv̄a shisima ini, amwesa anwa yamaji waye-waye, v̄umoja na wana wahe na maɓangwe yahe.»

¹³ Insa amudjiɓu: «Mutru yotsi anwao maji yao, atsoona nyora raha.

¹⁴ Ɓadi uwo atsonwao yamaji nitsomuv̄aoyo, katsoona nyora ata idahari. Mana yamaji nitsomuv̄aoyo yatsoka haheju dzitso litriao maji ya uhayati mukamilifu wa daima.»

¹⁵ Sa ile mutrumama ule amuambia: «Mutukufu, nimbe maji yao, pare nasuone tsena nyora, wala nasuje tsena naɓua maji hunu.»

¹⁶ Ɓas, Insa amuambia: «Endra wahire mutrumume waho, uje.»

¹⁷ Mutrumama ule adjiɓu: «Tsisina mutrumume.» Insa amuambia: «Una haki urongowe amba: ‹Tsisina mutrumume.›

¹⁸ Mana madza ukana watruwaume watsano, na uwo ulionawo av̄asa, tsi mume waho. Hari mwa iyo, urongoa kweli.»

¹⁹ Sa ile mutrumama ule amuambia: «Mutukufu, nisuona amba wawe mutrume.

²⁰ Wadzaɗe watru wakoãɓudu mulimani v̄anu, na wanyu musurongoa amba Yerusalemu ɗe v̄ahanu wanadamu walazimu waãɓudu.»

²¹ Insa amuambia: «Mama, niamini, wakati usuja ulio amba tsi ɗe hari mwa mulima unu, wala tsi ɗe Yerusalemu, ɗe mutsomuãɓuduo Ɓaɓa.

²² Musuãɓudu trongo kamuiji; wasi risuãɓudu trongo riijuao, mana ukombofu uja ha ulawa ha yaMayahudi.

²³ Ɓadi v̄usuja wakati, na uwo madza uja, ulio amba watru waãɓuduo ha kweli, watsomuãɓudu Ɓaɓa ha roho, tsena ha ukweli. Mana watru namuna iyo ɗe Ɓaɓa atsahao wamuãɓudu.

²⁴ Mungu waye roho, na ilazimu watru wamuãɓuduo, wamuãɓudu ha roho, tsena ha ukweli.»

²⁵ Mutrumama ule amuambia: «Tsijua amba uMutsahuliwa|Mutsahuliwa asuja, ne ɗe uwo ahiriwao Kristi. Wakati atsojao, atsorijudza piya zitrongo.»

²⁶ Insa amuambia: «Ɗe wami, nilaguao na wawe.»

²⁷ Ɓas v̄ale maswihaɓa yahe yawaswili. Washanga iv̄o wamupara amba akohadisi na mutrumama, ɓadi kav̄waka ata moja amudzisa: «Usutsaha trini?» au: «Manatrini uhadisio na waye?»

²⁸ Ɓas, mutrumama ule alishi mutsungi wa maji wahe v̄ale, andre ɗagoni, aambia watru:

²⁹ «Namuje muone mutru aniambia piya trongo nazifanya. Saɓu waye tsi ɗe Mutsahuliwa?»

³⁰ V̄ale walawa ɗagoni, waja wamupara.

³¹ Wakati ule maswihaɓa yahe yakomurayi: «Fundi, ko uɗye!»

³² Ɓadi awaambia: «Tsina ya uɗya shahula ilio amba wanyu kamuiji.»

³³ Ɓas, v̄ale maswihaɓa yahe yadzisana: «Hali v̄wa mutru amuv̄ingia shitru ya uɗya?»

³⁴ Insa awaambia: «Shahula yangu ɗe wami ufanya yamav̄endzeleo ya Uwo aniv̄eleha, na utsimidza urumwa wahe.

³⁵ Hali kamusurongoa amba mezi minne ɗe yaɓaki, iv̄o mavuna yaje? Ɓadi wami nisumuambiani, namudzuwe yamatso, muangaliye yimindra! Yihivu, ya tayari ya uvunwa.

³⁶ Monyewe uvuna madza asupara mwadjara, asungulidza mavuna ya uhayati mukamilifu wa daima, pare ule ayelao na ule avunao, wafurahi v̄umoja.

³⁷ Ha izo, urongozi unu kweli: ‹Moja ɗe ayelao, na wangina ɗe avunao.›

³⁸ Tsimuv̄elehani mwavune shitru kamwaifanyia hazi. Wangina ɗe wadziruma, na wanyu musuvuna manufa ya hazi zawo.»

³⁹ Ɓas, Masamariya wengi wa liɗago lile waja wamuamini Insa ha siɓaɓu ya urongozi wa mutrumama ule akotoa ushahidi unu: «Aniambia piya trongo nazifanya.»

⁴⁰ Ata wakati Masamariya wale wamujilia Insa, wamumia aɓaki na wao. Ɓas, aɓaki v̄ale suku mbili.

⁴¹ Na watru wengi zaidi waja wamuamini ha siɓaɓu ya marongozi yahe.

⁴² Amwesa wamuambia mutrumama ule: «Av̄asa tsi ɗe ha siɓaɓu ya marongozi yaho ɗe raamini, ɓadi rimukia wasi wenyewe, tsena risujua amba kweli waye ɗe uMuhuyifu wa ulemengu.»

Insa asuzihira mwana wa mufanyizi-hazi wa sirikali

⁴³ Ɓaanda ya suku mbili zile Insa alawa v̄ale, andre Galilaya.

⁴⁴ Mana waye-waye aka alawa ushahidi amba mutrume kav̄olwa usheo hahe.

⁴⁵ Wakati awaswili Galilaya, Magalilaya wamurenge ha uzuri, iv̄o waka waona piya trongo aka azifanya Yerusalemu wakati wa umusherehio, mana wao wajau waka wandre hari mwa musherehio ule.

⁴⁶ Ɓas, arudi ɗagoni Kanaani hari mwa iGalilaya, v̄ahanu aka agaudza maji yake maji ya zaɓiɓu. Na v̄ale v̄uka mufanyizi-hazi wa mufalume alio amba mwana wahe aka muwaɗe ɗagoni Kafarnaumu.

⁴⁷ Mutru ule ukia yahe amba Insa alawa iYudeya ha uja Galilaya, andre amupara, amumia ashuke Kafarnaumu, azihire mwana wahe aka kariɓu na ufa.

⁴⁸ Insa amuambia: «Neka kamusuona ãlama za midjuza na za ãdjaɓu, v̄av̄o wanyu kamuamini.»

⁴⁹ Mutru wa hazi ule amuambia: «Mutukufu, shuka kaɓula raha mwana wangu kafa.»

⁵⁰ Sa ile Insa amuambia: «Endra, ɓadi mwana waho a hayi.» Ɓas, mutru ule aamini urongozi ule Insa amuambiawo, andre dzahe.

⁵¹ V̄ale kamwe akoshuka hahe, warumizi wahe waja wamupara, wamuambia: «Mwana waho a hayi.»

⁵² Awadzisa amba rangu sa ngav̄i umwana apara shikali. Wamuambia: «Sa ya saɓa ya jana ɗe liɓuhuo lamulawia.»

⁵³ Na ɓaɓa ule afahamu amba ɗe sa ile kamwe ɗe Insa aka amuambia: «Mwana waho a hayi.» Ɓas aamini, waye na piya umuraɓa wahe.

⁵⁴ Iyo ɗe iãlama ya midjuza ya v̄ili Insa aifanya wakati alawa Yudeya ha uja Galilaya.