YUHANI 3 - Ha`bari Ndjema ya I Maore

Mahadisi ya Insa na Nikodemu ju la uhayati mukamilifu

¹ V̄uka mutru akohiriwa Nikodemu, mwana wa ishama ya Mafarisayo, tsena moja mengoni mwa madhwamana ya Mayahudi.

² Suku mengoni mwa suku, amujilia Insa uku, amuambia: «Mutukufu, risujua amba wawe fundi wav̄elehwa na Mungu. Mana kav̄u mutru ashindrao afanye ãlama za midjuza zizo uzifanyao, neka Mungu kasi na waye.»

³ Sa ile Insa amudjiɓu: «Nisuhuambia ha kweli, neka mutru kadzalwa mara yangina raha, kashindri uona Utawalizi wa Mungu.»

⁴ Nikodemu amudzisa: «Ha namuna jeje mutru ashindrao adzalwe raha neka madza aɗuhwa? Hali atsoshindra angiye mimbani ha mayahe mara ya v̄ili adzalwe?»

⁵ Insa adjiɓu: «Nisuhuambia ha kweli, mutru kadzalwa ha maji na ha iRoho, kashindri ungia hari mwa Utawalizi wa Mungu.

⁶ Iyo yadzalwa ha mwili, uwo mwili, na iyo yadzalwa ha iRoho, iyo roho.

⁷ Usushange iv̄o nahuambia amba: ‹Ilazimu mudzalwe mara yangina raha.›

⁸ Pev̄o uvudzia v̄ahali yotsi itsahao; wawe uikia, ɓadi kuji v̄ahali yala, wala v̄ahali yendrao. Ɗe ha inamuna iyo ha kula adzalwa ha iRoho.»

⁹ Nikodemu amudzisa: «Ha namuna jeje ɓasi trongo zini zitsojuao zihidjiri?»

¹⁰ Insa amudjiɓu: «Afa wawe fundi hari mwa iIsraila, ɗe kuji trongo zini!

¹¹ Nisuhuambia ha kweli, izo rizijuao ɗe rizirongoao, na izo raziona ɗe rilawao ushahidi, ɓadi kamusukuɓali ushahidi watru.

¹² Neka kamusuamini namomuambiani trongo za shi ulemenguni v̄anu, ɓasi ha namuna jeje mutsoaminio namomuambiani trongo za shi pev̄oni?

¹³ Kav̄u mutru ahea pev̄oni neka tsi ɗe uwo ashuka ulawa pev̄oni, ne ɗe uMwana wa Mwanadamu|Mwana wa Mwanadamu.

¹⁴ Mauri ɗe inamuna Musa ahedza inyoha ya shaɓa padzaju, ɗe inamuna uMwana wa Mwanadamu alazimu ahedzewe wajau,

¹⁵ ile pare kula mutru amuaminio akane uhayati mukamilifu wa daima.»

¹⁶ «Mana Mungu av̄endze uulemengu, ata av̄a uMwana moja-moja wahe, ile pare kula amuaminio asupare uangamifu wa dahari, ɓadi akane uhayati mukamilifu wa daima.

¹⁷ Mana Mungu kav̄eleha uMwana wahe ulemenguni amba auhukumu uãdhiɓilwe, ɓadi ulemengu uhuyiwe ha ndzia yahe.

¹⁸ Mutru amuaminio, waye kahukumilwa uãdhiɓilwa, ɓadi uwo kaamini, madza ahukumulwa aãdhiɓiwe ha iv̄o kaamini uMwana moja-moja wa Mungu.

¹⁹ Na hukuma iyo ɗe amba: iNuru ija ulemenguni, ɓadi wanadamu wav̄endze ishidza rahana inuru, mana zitrendro zawo zika mbovu.

²⁰ Mana kula arendrao mbovu, uenga inuru, amwesa kajilia inuru, ha uria zitrendro zahe zaja zajulihwana.

²¹ Ɓadi uwo aliona maendreleo yaɗungao ukweli ujilia inuru, ile pare zitrendro zahe ziv̄enuhe amba zifanyiwa ha uv̄umoja na Mungu.»

Ushahidi wa Yahaya Muɓaĩshizi ju la Insa

²² Ɓaanda ya zile, Insa na maswihaɓa yahe wandre hari mwa liɓavu la Yudeya. Aɓaki hule na wao, amwesa akoɓaĩsha|uɓaĩsha.

²³ Yahaya|Yahaya Muɓaĩshizi wajau akoɓaĩsha Ainoni, kariɓu na Salemu, mana v̄uka maji mengi. Watru wakoja, amwesa wakoɓaĩshiwa.

²⁴ Wakati uwo raha Yahaya kaka atrilwa shiv̄ani.

²⁵ Na v̄ale v̄uka v̄uhimi mashindrano ɓaina ya maswihaɓa ya Yahaya na Muyahudi husuana na itrongo ya utawaza.

²⁶ Waja wamupara Yahaya, wamuambia: «Fundi, ule aka na wawe nyambo ya umuro wa Jurdani, ule wakomulawia ushahidi, v̄anu asuɓaĩsha, na watru piya wasendra hahe!»

²⁷ Yahaya adjiɓu: «Mutru kashindri upara shitru neka kav̄olwayo na Mungu, Monyewe pev̄oni.

²⁸ Wanyu-wanyu mwa mazahidi amba tsirongoa: ‹Wami tsi ɗe uMutsahuliwa|Mutsahuliwa, ɓadi tsiv̄elehwa nimutranguliye.›

²⁹ Monyewe umushe-harusi, ɗe ɓwana-harusi. Ɓadi mwandzani wa ɓwana-harusi alio ɓavuni, amukiao, ujiv̄iwa na ufurahi na liji la ɓwana-harusi. Ɓasi furaha ini ilio yangu, av̄asa ikamiliha.

³⁰ Ilazimu uɓole wahe uengedzehe, na wami niv̄unguhe.»

Uwo ajao ulawa pev̄oni, ɗe umuɓole wa piya

³¹ «Uwo ajao ulawa uju, muɓole rahana piya; uwo alio wa lidunia, waye wa shi duniani, tsena urongoa trongo za shi duniani. Uwo ajao ulawa pev̄oni, muɓole raha na piya.

³² Waye ulawia ushahidi izo aziona na azikia, wala kav̄usi ata mutru akuɓalio ushahidi wahe.

³³ Ɓadi mutru akuɓalio ushahidi wahe, waye udhiɓitisha amba Mungu, waye kweli.

³⁴ Na Uwo Mungu amuv̄eleha, urongoa yamarongozi ya Mungu, mana Mungu umudjaãlia iRoho ɓila shiv̄imo.

³⁵ Ɓaɓa uv̄endza uMwana, amwesa adhwaminisha piya zitrongo mihononi hahe.

³⁶ Monyewe uamini uMwana ana uhayati mukamilifu wa daima, ɓadi uwo ahara uamini uMwana katsoona uhayati, ɓadi hadhaɓu ya Mungu uketsi ju lahe.»