YUHANI 21 - Ha`bari Ndjema ya I Maore

Malozi ya Midjuza

¹ Ɓaanda ya v̄ale Insa av̄enushia tsena maswihaɓa yahe wangoni mwa iƁahari ya Tiɓeriyasa|Ɓahari ya Tiɓeriyasa. Na tsini inamuna adziv̄enua:

² Simoni Monye, Tomasi ahiriwao Mbiliju, Natanaeli wa shi Kanaani hari mwa iGalilaya, wana wa Zuɓudu, na maswihaɓa maili yangina ya Insa, waka v̄umoja.

³ Ɓas, Simoni Monye awaambia: «Nisendra nalowe fi.» Wamuambia: «Wasi wajau, risuja na wawe.» V̄ale walawa, wapashia laka, ɓadi uku ule kawapara ata shitru.

⁴ Asuɓuhi yamongia, Insa ahimi wangoni na lidzia la maji. Ɓadi yamaswihaɓa kayakojua amba ule ɗe Insa.

⁵ Insa awadzisa: «Wananyangu, mupara mariziki?» Wamudjiɓu: «Ata hata.»

⁶ Ɓas, awaambia: «Namuvutse uwavu uv̄andre wa hume wa ilaka, na wanyu mutsopara.» Sa ile wauvutsu, amwesa kawakoshindra wauvura tsena ha siɓaɓu ya uwengi wa zifi.

⁷ Ɓasi swihaɓa lile Insa akoliv̄endza limuambia Monye: «Ule ɗe Raɓi!» Simoni Monye ukia yahe amba ɗe Raɓi, aɓanga nguo ya uju yahe mana kaka apindra, amwesa adzivutsu ɓaharini.

⁸ Maswihaɓa yasalia yale yaja na ilaka na ugugura uwavu waka wajaya na fi, mana kawaka mbali na iɓandari, hari mwa ziv̄imo za ule wa kude miyateni jauleni.

⁹ Wakati washuka v̄otsi, waono maha ya moro v̄ale na fi uju, v̄uka na dipe.

¹⁰ Ɓas, Insa awaambia: «Fi zizo mwazipara av̄asa, namuv̄inge wana ɓaãdhwi.»

¹¹ Simoni Monye ahea moni na ilaka, avuru wangoni uwavu waka wajaya fi ɓole zapara miya wa hamsini na traru, ɓadi ata iv̄o zaka nyengi namuna ile, ne uwavu kawarandruha.

¹² Ɓas, Insa awaambia: «Namuje muɗye.» Na kav̄waka ata moja mengoni mwa yamaswihaɓa akosuɓutu umudzisa: «Wawe mbani?» Wakojua amba ɗe Raɓi.

¹³ Ɓas, Insa atsengea, arenge lidipe, awav̄alo, afanya ɗe wiyo na ifi.

¹⁴ Iyo ika ɗe imara ya raru ya Insa av̄enushia maswihaɓa yahe rangu aregezewa hayi ulawa ha uwafu.

Insa asumudhwaminisha Monye raha urumwa wahe

¹⁵ Ɓaanda wahisoɗya, Insa amuambia Simoni Monye: «Simoni, mwana wa Yunasi, hali usuniv̄endza rahana wanu?» Amudjiɓu: «Ewa Raɓi, usujua amba wami uhuv̄endza.» Insa amuambia: «Tsunga wana maɓariɓari wangu.»

¹⁶ Amuambia mara ya v̄ili: «Simoni, mwana wa Yunasi, usuniv̄endza?» Monye amudjiɓu: «Ewa Raɓi, usujua amba nisuhuv̄endza.» Insa amuambia: «Tsunga maɓariɓari yangu.»

¹⁷ Amuambia ha mara ya raru: «Simoni, mwana wa Yunasi, usuniv̄endza?» Sa ile Monye aremwa na huzuni iv̄o amudzisa ha mara ya raru: «Hali usuniv̄endza?» Amudjiɓu: «Raɓi, wawe ujua piya trongo. Usujua amba nisuhuv̄endza.» Insa amuambia: «Tsunga maɓariɓari yangu.

¹⁸ Kweli, nisuhuambia ha kweli, wakati waka mwanahirimu, wakodzifunga wawe monyewe umukandra, amwesa wakwendra v̄ahanu wakotsaha. Ɓadi wakati utsokao muɗuhazi, utsoondzoa mihono yaho, na mutru wangina ɗe atsohufungaowo, na uhuv̄inga v̄ahanu kutsotsaha.»

¹⁹ Arongoa trongo iyo ile aonese ha ufa jeje Monye atsomutukuzao Mungu. Ɓaanda arongoa zile, amuambia: «Niɗunge!»

²⁰ Monye uzinga yahe, aono liswihaɓa lile Insa akoliv̄endza lakowaɗunga, ule alio amba hari mwa umuɗyio aka amunyamia Insa ishifuɓa na umudzisa: «Raɓi, mbani ɗe atsohuv̄iriao nyuma?»

²¹ Umuona yahe, Monye amudzisa Insa: «Raɓi, ɓas mutru unu, trini ɗe itsomuparao?»

²² Insa amudjiɓu: «Neka nisutsaha aɓaki ata wakati nitsoregeao, shuhuli yaho trini? Wawe, niɗunge.»

²³ Rangu v̄ale, zihaɓari zienea hari mwa uwananya wa uaminifu amba swihaɓa lile kalitsofa. Na v̄ale Insa kaka amuambia Monye amba swihaɓa lile kalitsofa, ɓadi amba: «Neka nisutsaha aɓaki ata wakati nitsoregeao, shuhuli yaho trini?»

²⁴ Swihaɓa lilo ɗe lilawao ushahidi na trongo zini, laziangiha. Na wasi risujua amba ushahidifu wahe, kweli.

²⁵ Insa afanya raha trongo nyengi zangina. Na djeli zakoangihwa moja ha moja, tsisufikiri amba lidunia wilo latsoshindra liv̄inge zizio zitsoangihwao.