YUHANI 20 - Ha`bari Ndjema ya I Maore

Muregezeo hayi wa Insa

¹ iSuku ya handra ya umufumo, Mufumov̄ili, Mariama wa shi Magidala andre kaɓurini|kaɓuri asuɓuhi na mapema, raha v̄uka shidza. Aono amba liɓwe lika litolwa kaɓuriju.

² Areme mbio andre amupara Simoni Monye na swihaɓa langina lile Insa akoliv̄endza, awaambia: «Wamutowo Raɓi kaɓurini, na karisujua v̄ahanu wamutria.»

³ Ɓas, Monye na swihaɓa langina lile walawa, wandre kaɓurini.

⁴ Wareme mbio v̄umoja wao waili, ɓadi swihaɓa langina lile lendre mbio rahana Monye, liwaswili kaɓurini kadimu.

⁵ Unyama yahe, aono zizitamba zilishwa v̄otsi, ɓadi kangia.

⁶ Simoni Monye akomuɗunga, awaswili, angia moni na likaɓuri, aono zitamba zile zilishwa v̄ale.

⁷ Na inguo yaka yatrilwa shitswani ha Insa, kayaka na zitamba zile, ɓadi ika iv̄erwa, ihetsiwa v̄ahanu v̄wangina.

⁸ Swihaɓa langina lile laka lawaswili kaɓurini kadimu, lingia wajau. Aono, ɓasi aamini.

⁹ Mana raha kawakoelewa uMuangishio, amba aka alazimu aregeye hayi ulawa ha uwafu.

¹⁰ Ɓas, maswihaɓa yale yaregea hawo.

Insa asumuv̄enushia Mariama wa Magidala

¹¹ Na v̄ale Mariama aka ahimi v̄ondze kariɓu na likaɓuri, akolila. Hari mwa shililo yahe, anyama ha uangalia moni na likaɓuri.

¹² Ɓas, aono malayika mbili zapindra nguo ndjeu, ziketsi v̄ahanu v̄ale umwili wa Insa waka waladzwa, moja shitswani, moja mindruni.

¹³ Zimudzisa: «Mama, manatrini ulilao?» Awadjiɓu: «Mana wamutowo Raɓi wangu, wala tsisujua v̄ahanu wamutria.»

¹⁴ Urongoa yahe trongo zile azingi, na sa ile amuono Insa iv̄o ahima, ɓadi kakojua amba ule ɗe waye.

¹⁵ Insa amudzisa: «Mama, manatrini ulilao? Usumuzunguha mbani?» Na v̄ale Mariama akofikiri amba ule ɗe mutru wa hazi wa likav̄a. Amuambia: «Ɓaɓa, neka wawe ɗe wamutoa, niambiye v̄ahanu wamutria, nendre namurenge.»

¹⁶ Sa ile Insa amuambia: «Mariama!» Azingi, amwesa amuambia Shiheɓraniya: «Rabboni!» (yaãni, «Fundi»).

¹⁷ Insa amuambia: «Usunisike, mana raha tsahea ha Ɓaɓangu. Ɓadi endra wapare wananyangu uwaambiye: ‹Nisuhea ha Ɓaɓangu, amma Ɓaɓanyu, ha Mungu wangu, amma Mungu wanyu.› »

¹⁸ Ɓas, Mariama wa Magidala andre ajudza yamaswihaɓa amba amuono Raɓi, na zile amuambiazo.

Insa asuv̄enushia maswihaɓa yahe

¹⁹ Mahariɓi ya isuku ya handra ya umufumo, yimilongo ya v̄ahanu maswihaɓa waka wangulidzana yika yiɓalwa, ha siɓaɓu ya trisidzo lawo na yaMayahudi. Sa ile Insa aja, ahimi hari mwawo, awaambia: «Salama ju lanyu!»

²⁰ Ɓaanda arongoa zile, awaonesa yimihono na imbavu yahe. Ɓas, yamaswihaɓa yangiliwa na furaha iv̄o wamuona Raɓi.

²¹ V̄ale Insa awaambia raha: «Salama ju lanyu! Mauri ɗe inamuna Ɓaɓa aniv̄eleha, wami wajau nisumuv̄elehani.»

²² Ɓaanda ya marongozi yale, awavudzia na uwaambia: «Namupareni iRoho Ndzitwaharifu.

²³ Wao mutsowaswamihio yamadhambi, watsoswamihiwawo; na wao kamutsowaswamihiwo, kawatsoswamihiwa madhambi yawo.»

Insa asumuv̄enushia Tomasi

²⁴ Tomasi ahiriwao Mbiliju, moja mengoni mwa kumi na waili wale, kaka na wao wakati Insa awajilia.

²⁵ Ɓas, maswihaɓa wasalia wale wamuambia: «Rimuono Raɓi.» Ɓadi awadjiɓu: «Neka tsisuona mihononi hahe ãlama ya yimizumari, wala tsisutria sha yangu hari mwa kovu za yimizumari, na muhono wangu mbavuju hahe, wami tsitsoamini.»

²⁶ Ɓaanda ya suku nane, yamaswihaɓa yaka raha moni na inyumba, na Tomasi aka na wao. Ɓasi Insa aja, na yimilongo yika yiɓalwa; ahimi hari mwawo, arongoa: «Salama ju lanyu!»

²⁷ Amwesa amuambia Tomasi: «Tsengedza hunu sha yaho, amwesa uangaliye mihono yangu. Tsengedza tsena muhono waho, uutriye mbavuni hangu. Usuke mudziro wa uamini, ɓadi amini!»

²⁸ Sa ile Tomasi amudjiɓu: «Raɓi wangu, tsena Mungu wangu!»

²⁹ Ɓas, Insa amuambia: «Ha siɓaɓu amba uniono, ɗe waamini? Waɓarikishiha wao kawaona, ne waamini.»

³⁰ Amwesa Insa afanya raha mbeli za maswihaɓa yahe ãlama za midjuza nyengi zangina zilio amba kazaangihwa moni na ishio ini.

³¹ Ɓadi zini ziangihwa pare muamini amba Insa ɗe Mutsahuliwa, uMwana wa Mungu, na ha uamini, mukane uhayati ha lidzina lahe.