YUHANI 2 - Ha`bari Ndjema ya I Maore

Harusi ɗagoni Kanaani

¹ iSuku ya raru ɓaanda ya v̄ale, v̄uka harusi ɗagoni Kanaani hari mwa liɓavu la Galilaya. Mayahe wa Insa aka v̄ale,

² na Insa aka akariɓisiwa wajau hari mwa iharusi v̄umoja na maswihaɓa yahe.

³ Iv̄o maji ya zaɓiɓu yaka yakoma, mayahe wa Insa amuambia: «Kawasina tsena maji ya zaɓiɓu.»

⁴ Insa amudjiɓu: «Mama, manatrini uniambiao wami trongo iyo? Wakati wangu raha kawapara.»

⁵ Sa ile mayahe aambia mayeleshezi yaka v̄ale: «Namufanye piya izo atsomuambiaonizo.»

⁶ Na v̄ale v̄uka mitsungi sita ya ɓwe, yakorumilwa na Mayahudi wamotawaza. Kula moja uka uv̄ingi ziv̄imo mbili ata traru.

⁷ Sa ile Insa awaambia: «Namujadze maji mitsungi yiyo.» Wayijadza ata yakoja yitrise.

⁸ Amwesa awaambia: «Namuɓuwe, muv̄inge ha ragisi wa ikaramu.» Ɓas, watru wale wayav̄ingi.

⁹ Ragisi wa ikaramu ule alaulia maji yale yagaudziwa maji ya zaɓiɓu, wala kakojua v̄ahali yalawa, ɓadi mayeleshezi yale ɗe yakojua. Sa ile amuhiri ɓwana-harusi,

¹⁰ amuambia: «Watru piya uyeleshea raɓuzi maji ya zaɓiɓu mazuri, ata neka watru wano ha nguvu ɗe wayelesheao yale tsi mazuri. Ɓadi wawe uhetsi yamazuri yanu ata upara av̄asav̄anu!»

¹¹ Iyo ɗe iãlama ya midjuza ya handra yahe Insa aifanya ɗagoni Kanaani hari mwa liɓavu la Galilaya. Ha izo av̄enusa utukufu wahe, na maswihaɓa yahe yamuamini.

¹² Ɓaanda ya v̄ale ashuku ɗagoni Kafarnaumu v̄umoja na mayahe, wananyahe watruɓaɓa na maswihaɓa yahe, ɓadi kawaɓaki hule suku nyengi.

Insa asuĩdzia maɓahazazi moni mwa iNyumba Ndzitwaharifu

¹³ Wakati wa Unahanizi wa uMutupio|unahanizi wa yaMayahudi uka ukuruɓia; ɓas, Insa ahea Yerusalemu.

¹⁴ Na moni mwa iNyumba Ndzitwaharifu|Nyumba Ndzitwaharifu apara waudzizi-nyombe, maɓariɓari, na ndiwa, na waɓadilizi-marike waka waketsi v̄ale.

¹⁵ Ɓas, arenge hamba, aifanya sapa-sapa, amwesa awaĩdzia piyawo Nyumbani v̄ale, atrusu na maɓariɓari yawo na nyombe zawo. Tsena atsanya turuturu za waɓadilizi-marike wale, na uv̄indrusa zimeza za hazi zawo.

¹⁶ Aambia raha waudzizi ndiwa wale: «Namutowe zitru zini v̄anu! Musufanye iNyumba ya Ɓaɓangu amba nyumba ya ɓiashara!»

¹⁷ Sa ile maswihaɓa yahe yanahana amba v̄uangihwa: «iHuɓa nilionayo na inyumba yaho, mauri moro univudzao.»

¹⁸ Ɓas, Mayahudi wamudzisa: «Ãlama trini ya midjuza utsorionesao, ike udhiɓitifu amba utsojua ufanye trongo zini?»

¹⁹ Insa awadjiɓu: «Namukomowe nyumba ndzitwaharifu iyo, na wami hari mwa suku traru, nitsoimidza.»

²⁰ Sa ile yaMayahudi yamuambia: «iNyumba Ndzitwaharifu ini irenge maha aruɓaini na sita iyo uundrwa, na wawe amba hari mwa suku traru utsoshindra uimidze?»

²¹ Ɓadi inyumba ndzitwaharifu Insa akoirongoa, ɗe umwili wahe.

²² Ɓas, ɓaanda aregezewa hayi ulawa ha uwafu, maswihaɓa yahe yanahana amba aka arongoa trongo ile; na v̄ale ɗe waamini uMuangishio Mutwaharifu, na urongozi ule Insa aurongoa.

Insa ujua piya zilio rohoni ha wanadamu

²³ Wakati Insa aka Yerusalemu hari mwa umusherehio wa Unahanizi wa Mutupio, wengi wa watru waja wamuamini uona yawo ziãlama za midjuza akozifanya.

²⁴ Ɓadi Insa, waye kakana uaminifu na wao, mana akojua namuna yawo piya.

²⁵ Kayaka amba paka ajudziwe hali za mwanadamu, mana waye-waye akojua zilio moni ha mwanadamu.