YUHANI 16 - Ha`bari Ndjema ya I Maore

¹ «Tsimuambiani trongo zini, pare musukwale na uaminifu wanyu.

² Mutsoɓalidziwa ziNyumba za Uswali. Na v̄usuja wakati amba yotsi atsomuulanio, atsofikiri amba asumurumishia Mungu.

³ Watsofanya namuna iyo mana kawamujua Ɓaɓa, wala wami.

⁴ Tsimuambiani trongo zizo, pare wakati wamoja, munahane amba tsimuambianizo.» «Ɓadi tsamuambianizo rangu mwandro, mana tsika na wanyu.

Hazi ya iRoho Ndzitwaharifu

⁵ Av̄asa nisendra ha Uwo aniv̄eleha, na kav̄u ata moja hari mwanyu anidzisao: ‹Usendra hav̄i?›

⁶ Ɓadi ha iv̄o namuambiani trongo zizo, roho yanyu ingiliwa na huzuni.

⁷ Ɓadi nisumuambiani zikweli: ya ɓorwa hanyuju ya wami ulawa. Mana neka tsalawa, Musaidizi katsomujiliani; ɓadi neka nisendra, nitsomuv̄eleshedzeaniwo.

⁸ Na wakati atsojao, atsodhiɓitisha ulemengu amba ukoseha yahusu dhambi, muhakisho mbeli za Mungu, iv̄o na hukuma:

⁹ yahusu lidhambi, ɗe iv̄o kawasuniamini;

¹⁰ yahusu umuhakisho, ɗe iv̄o nendrao ha Ɓaɓa, kamutsoniona tsena;

¹¹ na yahusu ihukuma, ɗe iv̄o umutawalizi wa lidunia lini ahukumulwa.

¹² Tsina raha trongo nyengi za umuambiani, ɓadi kamushindri uzitrika av̄asa.

¹³ Ɓadi wakati itsokao amba aja, waye iRoho ya ukweli, atsomuv̄ingani hari mwa piya ukweli, mana katsorongoa ha iwaye yahe, ɓadi atsorongoa izo azikia, amwesa atsomujudzani trongo zijao.

¹⁴ Atsov̄enusa utukufu wangu, mana atsorenga zalawa hangu, amujudzenizo.

¹⁵ Piya izo Ɓaɓa alionazo, zangu. Iyo ɗe imana narongoa amba atsorenga zalawa hangu, amujudzenizo.»

Huzuni ya yamaswihaɓa itsogauha furaha

¹⁶ «Hari mwa muda mushashi, kamutsoniona tsena; na ɓaanda ya mwana muda tsena, mutsoniona raha, [mana nisendra ha Ɓaɓa].»

¹⁷ Ɓas v̄ale ɓaãdhwi ya maswihaɓa yahe yaambiana: «Afa v̄av̄o asutsaha ariambiye trini? Amba: ‹Hari mwa muda mushashi, kamutsoniona tsena; na ɓaanda ya mwana muda tsena, mutsoniona raha.› Tsena: ‹Mana nisendra ha Ɓaɓa›?»

¹⁸ Warudi waambiana: «Trongo iyo airongoao, mana yahe trini ‹hari mwa muda mushashi›? Karisujua itrongo airongoao.»

¹⁹ Insa ajua amba wakotsaha wamudzise trongo. Ɓas awaambia: «Musudzisana hari mwa trongo nairongoa amba: ‹Hari mwa muda mushashi, kamutsoniona tsena; na ɓaanda ya mwana muda tsena, mutsoniona raha›.

²⁰ Kweli, nisumuambiani ha kweli, mutsolila na usikitiha, wakati ulio amba lidunia litsojiv̄iwa. Mutsoka hari mwa huzuni, ɓadi ihuzuni yanyu itsogauha furaha.

²¹ Wakati mutrumama adzao, waye uremwa na huzuni, mana wakati wahe uwaswili. Ɓadi amohisa udza umwana, waye kanahana tsena utungu ule, mana waye ukana furaha iv̄o v̄wadzalwa mwanadamu ulemenguni.

²² Wanyu wajau, av̄asa mwa hari mwa huzuni. Ɓadi nitsomuonani raha, na iroho yanyu itsofurahi, tsena ifuraha yanyu, kav̄u ata mutru atsoshindrao amutoleyeniyo.

²³ iSuku iyo kamutsonidzisa tsena trongo itsokao yotsi. Kweli, nisumuambiani ha kweli, trongo mutsomumiao Ɓaɓa ha lidzina langu, atsomuv̄aniyo.

²⁴ Ata upara av̄asa kamwamia ata trongo ha lidzina langu. Namumiye, na wanyu mutsopara, ile furaha yanyu ikamilishihe.

²⁵ Tsimuambiani trongo zini ha mifano. Wakati usuja amba tsitsorongoa tsena na wanyu ha mifano, ɓadi nitsomujudzani dhwahiri trongo zahusu Ɓaɓa.

²⁶ iSuku iyo mutsomia ha lidzina langu, wala tsisumuambiani amba nitsomumiliani ha Ɓaɓa.

²⁷ Mana Ɓaɓa waye umuv̄endzani ha iv̄o mwaniv̄endza, amwesa muamini amba tsilawa hahe, waye Mungu.

²⁸ Tsilawa ha Ɓaɓa, tsija ulemenguni; na av̄asa nisulawa ulemenguni, nirudi ha Ɓaɓa.»

²⁹ Sa ile maswihaɓa yahe yamuambia: «Tsini av̄asa usurongoa dhwahiri, wala kusurumia mifano.

³⁰ Av̄asa rijua amba usujua piya zitrongo, na tsi paka mutru ahudzise shitru. Iyo ɗe imana ata riaminio amba ulawa ha Mungu.»

³¹ Insa awadjiɓu: «Av̄asa musuamini iv̄o?»

³² uWakati usuja, na madza tsunu uja, amba mutsotsambaliha kula mutru hahe, tsena mutsonilisha weke. Ɓadi tsisi weke, mana Ɓaɓa a v̄umoja na wami.

³³ «Tsimuambiani trongo izo, ile pare mukane utrulivu wa roho hari mwa uv̄umoja wanyu na wami. Mutsoka hari mwa usongefu ulemenguni v̄anu, ɓadi namudzitriye ɓari! Wami madza tsishindri ulemengu.»